बालविवाह गर्ने जोडी मण्डपबाटै पक्राउ

काशीराम डाँगी

रोल्पा — बालविवाह गरेको अभियोगमा प्रहरीले रोल्पा नगरपालिका-२ ह्वालीगाउँबाट एक जोडीलाई पक्राउ गरेको छ । कानुनविपरीत विवाह गरेका दुलाहा राजकुमार खड्कासहित दुलहीलाई प्रहरीले बुधबार पक्राउ गरेको हो । प्रहरीका अनुसार उमेर नपुग्दै विवाह गरेका किशोरकिशोरीलाई दुलाहा खड्काको घरबाटै पक्राउ गरी जिल्ला प्रहरी कार्यालयमा पुर्‍याइएको हो ।

प्रहरी नायव उपरीक्षक ज्ञानेन्द्रप्रसाद फुयालले बालविवाह गरेको अभियोगमा पक्राउ गरिएका किशोरकिशोरीको जोडीलाई कानुनअनुसार कारबाही प्रक्रिया अघि बढाइएको बताए । विवाह गरेका केटाकेटी दुवैको उमेर १७ वर्ष छ । बालविवाह गरेको प्रमाणित भएमा तीन वर्षसम्म जेल चलान गर्ने र ३० हजार रुपैयाँसम्म जरिवाना हुने प्रावधान छ । मुलुकी ऐन २०७४ को विवाहसम्बन्धी कसुरमा बीस वर्ष नपुगी कसैले विवाह गर्न वा गराउन नहुने उल्लेख छ ।

Yamaha

अधिकारकर्मी र गाउँलेहरुले सम्झाईबुझाई गर्दा पनि बालविवाह रोक्न नमानेपछि प्रहरीले उजुरीका आधारमा विवाहस्थलबाटै उनीहरुलाई पक्राउ गरेको हो । नगरपालिका-२ को रेउघास्थित प्रहरी चौकीमा विवाह रोक्ने उद्देश्यले बालविवाह न्यूनीकरण समितिले उक्त बालविवाह हुनु एक दिनअघि मंगलबार उजुरी दिएको थियो । समितिकी अध्यक्ष सविना घर्तीमगरले बालविवाह अत्यधिक बढेकाले रोक्न प्रहरीसँग सहयोग माग्दै उजुरी दर्ता गरेकी थिइन् । उजुरी अनुसार जिल्ला प्रहरी प्रमुख प्रनाउ फुयालले विवाह रोक्न प्रहरी परिचालन समेत गरेका थिए । तर, केटापक्षले प्रहरी र बालविवाह न्यूनीकरण समितिको सल्लाहविपरीत बुधबार बिहानै धुमधामले विवाह गरेका थिए । केटाका बुबा मैते खड्का विदेश छन् भने आमा दिलसरीलाई पनि प्रहरीले जिल्ला प्रहरी कार्यालयमा सोधपुछका लागि लिएको छ ।

वडाध्यक्ष खिमबहादुर घर्तीमगरले बालविवाह रोक्न पटक पटक पहल गरे पनि केटा पक्षले बेवास्ता गरेको बताए । विवाह गर्नुअघि नै केटाकेटी दुवैले माध्यमिक तहको पढाइ छोडेका थिए । प्रहरीले बालविवाह भोजमा सहभागीलाई समेत सोधपुछका लागि बोलाउने भएको छ । प्रनाउ फुयालले केटाकेटीको बयानपछि अरुसँग पनि सोधपुछ गर्न बोलाउन सकिने बताए ।

प्रकाशित : वैशाख १९, २०७५ १७:२०
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

उमेश मृत्युदण्ड प्रकरण : 'अदालतले ब्लडमनीबारे बोलेको छैन'

होम कार्की

काठमाडौँ — साउदी अरबस्थित नेपाली दूतावासले उमेश यादवको बचाउको लागि ब्लडमनीको विषयमा केही नबोलेको प्रस्ट पारेको छ ।

उमेश यादवको बचाउको लागि भन्दै विभिन्न ठाँउमा रकम संकलन गर्न थालेपछि नेपाली दूतावासले ध्यानकर्षण भएको जनाएको हो । गत वैशाख २ गते साउदीको दमामस्थित पुनरावेदन अदालतले पाकिस्तानी नागरिक मोहम्मद लतिफ बसिरको हत्या अभियोगमा झिटैया, धनुषाका यादवलाई मृत्युदण्ड दिने फैसला गरेको थियो । यसअघि जनरल कोर्टले १५ मार्च २०१७ मा यादवलाई ११ वर्ष कैद, ११ सय कोर्रा र साउदीबाट निकाला गर्ने फैसला सुनाएको थियो । जनरल कोर्टको फैसला चित्त नबुझेपछि सरकारी वकिलको कार्यालयले पुनरावेदन गएको हो ।

‘अदालतले यादवलाई उक्त सजाय यहाँको सार्वजनिक कानुन अन्तर्गत दिइएको हो । फैसलामा नीजि अधिकार र ब्लडमनीको विषयमा कुनै कुरा उल्लेख भएको छैन,’ दूतावासद्वारा बुधबार जारी बिज्ञप्तिमा भनिएको छ, ‘यी दुवै विषय फैसलामा केही उल्लेख नभएकोले ब्लडमनी संकलन गर्ने र उक्त रकम पीडित परिवारलाई बुझाएपछि माफी पाउने भन्ने विषय दूतावासबाट कुनै ब्यक्ति तथा निकायलाई जानकारी गराइएको छैन ।’

दूतावासले यादवको बचाउन भन्दै कानुनी उपायको खोजी गरी उच्च प्राथमिकताका साथ काम भइरहेको जनाएको छ । अदालतको फैसला चित्त नबुझेकोले दूतावासले २६ अप्रिलमा पुनरावेदन गरिसकेको छ ।

अदालतको फैसला आएपछि उमेशको परिवारको तर्फबाट सरोज रायले पाकिस्तानको फैसलावादस्थित वासिरको पीडित परिवारसँग ब्लडमनी दिने/लिने विषयमा सम्झौता गरेका थिए । पीडित परिवारले ३० लाख रुपैयाँ लिई यादवलाई माफी दिन तयार भएका थिए । पीडित परिवारले माफी दिने भएपछि देशविदेशमा ब्लडमनी संकलन सुरु गरेको छ ।

यादव जुवेलस्थित केन्द्रीय कारागारमा छन् । त्यस जेलमा उमेशसहित २२ नेपाली छन् ।

घटना विवरण
३ जुलाई २००७ मा उमेशले पाकिस्तानी सहकर्मी बसिरको हत्या गरेका थिए । बिन लादेन कम्पनीमा कार्यरत दुवैजना ह्युम पाइप निर्माण गर्थे । हत्याबारे फैसलामा लेखिएको विवरण र उमेशको भनाइ फरक–फरक छ ।

फैसलामा आर्थिक लेनदेनको विषयमा सुतिरहेका बेला रडले हानेर बसिरको हत्या गरेको उल्लेख छ । उमेशले भने कार्यस्थलमा झगडा हुँदा मृत्यु भएको बताउँदै आएका छन् । त्यसलगत्तै भागेका यादव नेपाल पैसा पठाउने बेला बैंकबाट पक्राउ परेका थिए । फैसला गर्ने पुनरावेदन अदालतका न्यायाधीशले नियतवस हत्या गरेको भन्दै माफी दिन नसकिएको बताएका छन् । ‘आर्थिक लेनदेनमा कुरा नमिल्दा हत्या गरेको देखियो । उनीसँग भएको १२ हजार रियाद पनि लिएर गएको देखिन्छ । जुन जानीबुझी र नियतवस थियो । यो सरिया कानुनअनुसार ठूलो अपराध हो,’ न्यायाधीशको भनाइ उद्धृत गर्दै राउतले भने, ‘अदालतले रियादस्थित पाकिस्तानी दूतावासमा ब्लडमनी दाबी गर्न भनेको थियो । कोही नआएपछि फैसला गर्न बाध्य भयौं ।’

प्रकाशित : वैशाख १९, २०७५ १६:५८
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT