सीमामा निगरानी

जिल्ला वर्डफ्लु रोग नियन्त्रण प्राविधिक समितिको सदरमुकाममा बसेको बैठकले सीमानजिक संक्रमण देखिएकाले निगरानी र सतर्कता अपनाउने निर्णय गरेको थियो । पशु सेवा कार्यालयले जिल्लाका १० वटै स्थानीय तहलाई रोगबारे सचेत पार्दै लिखित जानकारी गराएको थियो । प्रहरी उपरीक्षक मनोज यादवले सीमाबाट हुने अवैध चोरी तस्करी पूर्ण रूपमा रोक्न नाकामा कडाइ गरिएको बताए । सीमा सतर्कता अपनाउन थालेसँगै वर्डफ्लुको जोखिम बोकेका कुखुराका चल्ला सीमाबाट बरामद गर्न थालिएको उनले बताए । मुख्य भन्सार नाका कृष्णनगर, छोटी भन्सार मर्यादपुर र चाकलचौडामा अहिले विशेष कडाइ गर्न थालिएको छ । त्यस्तै, पैदल यात्रु मात्र आवतजावत गर्ने दर्जनभन्दा बढी नाकामा सुरक्षा बढाइएको छ ।

सरकारले ०६२ सालदेखि भारतबाट पन्छीजन्य पदार्थको आयातमा प्रतिबन्ध लगाएको छ । छिमेकमा वर्डफ्लुको प्रकोप देखिँदा कपिलवस्तु पनि उच्च जोखिममा पर्ने कुखुरा व्यवसायी प्रकाश घिमिरेले बताए । ‘यसको नियन्त्रणमा सबै सरोकारवालाले चासो दिन जरुरी छ,’ उनले भने, ‘नभए यहाँ पनि भयावह स्थिति आउन सक्छ ।’