प्रदेशसभामा मुख्यमन्त्रीको जवाफ ‘बजेटका सबै पोका खुल्छन्’

कान्तिपुर संवाददाता

रूपन्देही — मुख्यमन्त्री शंकर पोखरेलले लुम्बिनीमा मोनोरेल सञ्चालन गर्ने सरकारको योजना रणनीतिक सोचका साथ आएको बताएका छन् । प्रदेशसभा बैठकमा बुधबार उनले योजना महत्त्वाकांक्षी भए पनि प्रदेश सरकारले अध्ययन गरेर तयार पारेको प्रस्ट्याए ।

मोनोरेलसँगै विद्युतीय बस पनि चलाउने सरकारको योजना छ । ‘त्यसको पूर्ण अर्थ र महत्त्व छ,’ उनले भने, ‘यी दुवै योजनाले लुम्बिनी क्षेत्रमा पर्यटकको बसाइँ लम्ब्याउन महत्त्वपूर्ण योगदान गर्नेछन् ।’ प्रदेशको बजेटले मात्र नपुग्ने भएकाले संघीय सरकारसँग थप बजेट माग गरिने समेत उनले बताए ।

सरकारले आगामी वर्षका लागि पेस गरेको बजेटमाथिको सैद्धान्तिक छलफल बुधबारदेखि सकिएको छ । छलफलपछि मुख्यमन्त्री पोखरेलले विपक्षी र सत्तापक्षकै प्रदेशसभा सदस्यले उठाएका विषयवस्तुमाथि प्रकाश पारेका थिए । विपक्षी दल कांग्रेसले केही योजना बिनाबजेट आएको र त्यस्ता योजनाका लागि पोका–पोकामा बजेट राखिएको भन्दै स्पष्ट पार्न माग गरेको थियो ।

मुख्यमन्त्री पोखरेलले सरकारले ल्याएका कुनै पनि योजना विपक्षीले आरोप लगाउन मिल्ने खालका नभएको दाबी गरे । ‘पाल्पाको रामपुरदेखि रोल्पाको होलेरी हुँदै कपुरकोटसम्म पुग्ने सडकका लागि ५ करोड रकम छ,’ उनले भने, ‘त्यो सडकले धेरै निर्वाचन क्षेत्र जोडेको छ ।’ उनले सबै योजनाको अध्ययन र मापदण्ड बनाएर बजेट ल्याइएकाले कार्यान्वयनमा ढुक्क हुन आग्रह गरे । उनले विपक्षीलाई योजना अध्ययन गरेर, बजेट केलाएर अनि विश्लेषण गरेर मात्र निर्णय लिन आग्रह गरे । संघीय सरकारले २० अर्ब बजेट समपूरक कोषमा राखेको र त्यसलाई आधार बनाएर प्रदेश ५ मा ३ अर्ब आउने अनुमानका साथ केही योजनामा रकम उल्लेख नगरिएको पनि उनले स्पष्ट पारे । कृषि यन्त्रीकरणमा २० करोड, सहकारी विकास कोषमा १५ करोड, कृषि उत्पादनमा आधारित अनुदान १० करोड सबै जिल्लाका लागि भएको उनले बताए ।

त्यस्तै, ५२ प्रादेशिक निर्वाचन क्षेत्रमा स्थापना गर्न लागिएका कृषि स्मार्ट गाउँ, स्थानीय तहमा शीत भण्डार, सभाहल, खेल मैदान सबै जिल्लाका लागि भएको मुख्यमन्त्रीले प्रस्ट्याए । ‘यी सबै त्यही पोकाका बजेट हुन्,’ उनले भने, ‘यी पोका खोल्दा सबैतिर बजेटै बजेट छ, त्यसरी बुझ्नुहोला ।’ मोनोरेल चलाउने योजना बनाइएको रामग्रामदेखि लुम्बिनी हुँदै तिलौराकोटका सबै क्षेत्रमा प्रतिपक्षीले चुनाव जितेको भन्दै उनले आफ्ना क्षेत्रमा मात्र बजेट राखेको नबुझ्न आग्रह गरे ।

छलफलमा केही प्रदेशसभा सदस्यले लुम्बिनी क्षेत्रलाई बजेटले नछोएको बताएका थिए । त्यसमा स्पष्ट पार्दै उनले लुम्बिनी क्षेत्र अझै संघीय सरकारबाट प्रदेश सरकार मातहत नआएकाले बजेट विनियोजन गर्न समस्या परेको स्पष्ट पारे । मोनोरेलको सम्भाव्यता अध्ययन, पर्यटकीय बस र भैरहवामा विद्युतीय बस सञ्चालनका लागि योजना बनाइएको उनले बताए ।

नियमावली पारित, विधेयक पेस
प्रदेशसभा नियमावली मस्यौदा समितिले पेस गरेको प्रदेश ५ को प्रदेशसभा पहिलो संशोधन नियमावली २०७५ सर्वसम्मतिले पारित भएको छ । नियमावलीमाथिको छलफल सकिएपछि सभामुख पूर्णबहादुर घर्तीले बुधबारको बैठकमा नियमावली निर्णयार्थ पेस गरेका थिए । नियमावली पारित भएपछि अब प्रदेश ५ मा संसदीय समिति ६ वटा बन्नेछन् ।

बुधबारको बैठकमा प्रदेश सरकार आर्थिक मामिला तथा योजना मन्त्रीसमेत रहेका मुख्यमन्त्री पोखरेलले विनियोजन विधेयक २०७५ पेस गरेका छन् । सरकारले पेस गरेको विनियोजन विधेयक पारित भएपछि सरकारलाई बजेट खर्चने बाटो खुल्नेछ ।

प्रकाशित : असार ७, २०७५ ०९:५४
प्रतिक्रिया
पठाउनुहोस्

झुम्सा–चरंगे ट्रयाक खुल्यो

सिद्धबाबा खण्ड पहिरोले असुरक्षित बनेपछि विकल्पमा यो सडक खनिएको हो
माधव अर्याल

पाल्पा — सिद्धार्थ राजमार्गअन्तर्गत सिद्धबाबा खण्डको विकल्पका रूपमा अघि सारिएको झुम्सा–चरंगे मोटरबाटोको ट्रयाक खुलेको छ ।

सिद्धबाबा खण्डमा जोखिम बढेपछि झुम्सा–चौकीभञ्ज्याङ–चरंगे–धागो कारखाना खण्डलाई वैकल्पिक मार्गका रूपमा प्रस्ताव गरिएको थियो । स्थानीय तह र उपभोक्ता समितिकै पहलमा मंगलबार नयाँ ट्रयाक खुलेको हो ।

ट्रयाक खुलेसँगै सिद्धार्थ राजमार्गको झुम्साबाट २१ किमि बुटवल नजिकैको धागो कारखानासम्म पुग्न सकिने भएको छ । दूरीका हिसाबले झुम्सा–बुटवल ९ किलोमिटर मात्र भए पनि सिद्धबाबाको जोखिम न्यूनीकरणका लागि नयाँ ट्रयाक उपयुक्त विकल्प हो । जिल्ला समन्वय समितिको नेतृत्वमा तानसेन नगरपालिका, तिनाउ, बगनासकाली, रिब्दीकोट गाउँपालिकाका साथै देवदह नगरपालिका रूपन्देहीको सहयोगमा ट्रयाक खुलेको तिनाउ गाउँपालिकाले जनाएको छ ।

स्थानीय सरकारले आफ्नै लगानीमा वैकल्पिक मार्गको नयाँ ट्रयाक खोल्ने काम पूरा गरेको जिल्ला समन्वय समिति प्रमुख दयाराज बस्यालले बताए । प्रमुख जिल्ला अधिकारी विष्णुप्रसाद ढकाल, तिनाउ गाउँपालिका अध्यक्ष ओमबहादुर घर्तीलगायतको टोली तीनवटा साना सवारी साधन र दुई मोटरसाइकलमा सिद्धार्थ राजमार्गको झुम्साबाट चौकीभञ्ज्याङ हुँदै धागो कारखाना पुगेको थियो ।

ट्रयाक खोल्न स्थानीय तह र जिससको गरी झन्डै १ करोड रुपैयाँ खर्च भइसकेको छ । नयाँ ट्रयाक निरीक्षण तथा अनुगमनपछि जिसस प्रमुख बस्यालले गाउँपालिका र नगरपालिकाको आर्थिक सहयोगले छिट्टै सफलता मिलेको बताए । पाल्पा र रूपन्देहीका प्रशासकहरूको नैतिक साहस र सबैको सद्भावका कारण छिट्टै ट्रयाक खोल्न सम्भव भएको उनको भनाइ छ । ‘यसले सिद्धबाबा क्षेत्रमा खस्ने पहिरोबाट बर्सेनि हुने जनधनको क्षति रोक्न मद्दत पुग्नेछ,’ उनले भने ।

दोभान गाउँपालिका अध्यक्ष ओमबहादुर घर्तीले काम सुरु गरेको एक महिनामा ट्रयाक खुलेको बताए । ‘यस सडकले पाल्पाली मात्र नभएर पश्चिमाञ्चलका धेरैलाई खुसी बनाएको छ,’ उनले भने । झुम्सादेखि चौकी भञ्ज्याङसम्को सात किमी र रूपन्देहीको धागो कारखानाबाट चरंगे मुढावास साढे सात किलोमिटरमा यसअघि नै ट्रयाक खोलिएको थियो । चौकीभञ्ज्याङबाट मुढावाससम्मको करिब साढे ५ किलोमिटरमा नयाँ ट्रयाक खुलेको हो । रूपन्देही र पाल्पा जोड्ने सडक भएकाले यसमा दुवै जिल्लाका उपभोक्ताले संयुक्त समिति बनाएर काम गरिरहेका थिए ।

जिल्लाका जनप्रतिनिधिहरूले आगामी आर्थिक वर्षमा सडक फराकिलो बनाउने र ग्राभेलसम्मको काम सक्ने रणनीति अघि सारिएको बताएका छन् ।

सिद्धबाबाको वैकल्पिक मार्गका लागि प्रदेश ५ सरकारले आगामी आर्थिक वर्षलाई १० करोड रुपैयाँ विनियोजन गरेको छ । संघीय सरकारले पनि बजेटमा सिद्धबाबाको पहिरो रोकथामका लागि सुरुङमार्गको अध्ययन र काम अघि बढाउने उल्लेख गरेको सडक डिभिजन कार्यालयले जनाएको छ ।

प्रकाशित : असार ७, २०७५ ०९:५३
पूरा पढ्नुहोस्
प्रतिक्रिया
पठाउनुहोस्