आगामी वर्ष जेठमै फरफारक

कान्तिपुर संवाददाता

पाल्पा — आगामी वर्ष जेठ महिनाभित्रै वडाध्यक्ष र गाउँपालिका प्रमुखको टेबुलमा योजना फरफारकको कागजपत्र नरहने गरी कार्यक्रम अघि बढाउने रिब्दीकोट गाउँसभाले निर्णय गरेको छ । यहाँका जनप्रतिनिधिले गाउँसभामा लिखित प्रतिबद्धता जनाउँदै असारमा योजना फस्र्योटको काम नहुने जनाए ।

पाल्पाको रिब्दीकोट गाउँपालिकामा मंगलबार आगामी वर्षको बजेट सार्वजनिक गर्दै । तस्बिर : माधव अर्याल

मंगलबार सकिएको गाउँसभामा यसमा सबैको एकमत देखिएको हो । गाउँपालिका र वडाले गर्ने योजना जेठमै सकिने गरी काम गर्ने योजना बनाउन लिखित प्रतिबद्धता गरिएको अध्यक्ष नारायणबहादुर जीसीले बताए । उनका अनुसार यस वर्ष विगतमा जस्तै असारको २७ गतेसम्म पनि योजना फरफारकका लागि कागजपत्र टेबुलमा आए । ‘आगामी वर्ष यस्तो अवस्था आउने छैन भन्नेमा पूर्ण विश्वस्त छु,’ उनले भने, ‘योजना सम्झौता समयमै गरिनेछ र रकमान्तरको काम पनि वैशाखभित्र सकेर जेठमा सबै सकिनेछन् ।’

विगतमा कर्मचारीले गर्दा र जनप्रतिनिधि आएर काम गर्दा फरक हुनुपर्ने थियो तर आफूले यस वर्ष नसकेको अध्यक्ष जीसीले स्वीकारे । ‘योजना सम्झौता ढिला भयो,’ उनले भने, ‘त्यसैले फस्र्योट पनि सुस्त भयो ।’ कतिपय बजेट सक्नका लागि योजना बन्ने भएकाले आगामी वर्षमा त्यस्ता योजना कटौती गरिएको उनले बताए । टुक्रे र वडाका योजनाले पनि धेरै समय ढिला गराएको उनले बताए । ‘आउने वर्षबाट यस्तो हुँदैन,’ उनले भने, ‘सकेसम्म चाँडै योजना सम्पन्न गर्ने गरी काम अघि बढ्नेछ ।’

८ वडा रहेको रिब्दीकोटमा ५ सयभन्दा बढी योजना छन् । गाउँपालिका र वडाले सञ्चालन गर्ने योजनालाई सकेसम्म फागुन/चैतसम्म सक्ने गरी काम गर्न सबैको एकमत देखिएको उनले बताए । गाउँपालिकाकी उपाध्यक्ष लक्ष्मी खनालले जनताका माग र चाहना धेरै भएकाले योजना पनि सोहीअनुसार हुँदा कतिपय काम ढिला हुन गएको बताइन् । उनले आगामी वर्षमा तालिम, गोष्ठीजस्ता कार्यलाई कम गर्दै त्यस्ता खर्चबाट भौतिक पूर्वाधारका काम गरिने बताइन् । वडाध्यक्ष तथा प्रवक्ता विष्णु खनालले असारको अन्तिम सातासम्म पनि फाइल फस्र्योटका लागि आउने गरेको बताए ।

‘आगामी वर्षमा सबैले समयमै योजना सक्ने प्रतिबद्धता जनाएकाले समस्या नआउला भन्ने लागेको छ,’ उनले भने, ‘जनताले जनप्रतिनिधि बहाल भएको अनुभूति गर्ने गरी काम गरिनेछ ।’

गाउँसभाले पास गरेको आगामी आव ०७५/७६ को नीति, कार्यक्रम तथा बजेट सार्वजनिक गर्दै आउने वर्षमा योजना पनि कम छनोट गरिएको अध्यक्ष जीसीले बताए । गाउँपालिकाको कुल ३५ करोड ९६ लाख २० हजार बराबरको प्रस्तावित बजेट छ । यहाँ पूर्वाधार विकासतर्फ ४ करोड ५१ हजार र सामाजिक विकासमा २ करोड ५७ लाख रहेको छ । सार्वजनिक तथा क्षमता विकासमा ८२ लाखका साथै आर्थिक विकासमा १ करोड ३९ लाख र प्रशासनिक खर्चतर्फ ३ करोड ८७ लाख बजेट विनियोजन गरिएको प्रमुख प्रशासकीय अधिकृत अनिल पौडेलले बताए ।

गुणस्तरीय भौतिक पूर्वाधार निर्माण, सडक स्तरोन्नति, कृषि तथा पशु व्यवसायको आधुनिकीकरण, जडीबुटी उद्यानको स्थापनालाई प्राथमिकता तोकिएको छ ।

शिक्षा, स्वास्थ्य, सरसफाइ, अति विपन्न, पछि परेका समुदाय र एकल महिला केन्द्रित कार्यक्रममा विशेष जोड दिइएको छ ।

प्रकाशित : असार २८, २०७५ ११:१५
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

विद्यार्थी टिकाउन दिवा खाजा

नगरपालिकाले दैनिक प्रतिविद्यार्थी २५ रुपैयाँका दरले रकम उपलब्ध गराउँछ
कान्तिपुर संवाददाता

बुटवल — रूपन्देहीको मणिग्रामका अनुज त्रिपाठी विद्यालय जानु पर्‍यो कि रुन्थे । बालविकास कक्षामा जाने बानी लगाउन अभिभावकलाई निकै गाह्रो पर्‍यो । ढिलो गरी आउने र खाजा नल्याउने समस्याले शिक्षकहरू पनि आजित थिए । शान्ति नमुना मावि मणिग्रामका तिनै अनुज अहिले नियमित विद्यालय जान्छन् ।

रुपन्देहीको शान्ति नमुना माविका विद्यार्थी दिवा खाजा खाँदै । तस्बिर : अमृता अनमोल

विद्यालयमा खाजा खान पाइने भएपछि उनी खुसी हुँदै आउँछन् । ‘पढ्न पाइन्छ । खेल्न पाइन्छ,’ ५ वर्षे अनुजले भने, ‘खाजा खान पनि पाइन्छ । स्कुल आउन मजा लाग्छ ।’ पटक–पटक गयल हुने सदीक्षा कुमाल पनि अहिले नियमित विद्यालय आउन थालेकी छन् । विद्यालय आउँदा रुने उनी अहिले अभिभावकले घर बस्न भने रुन्छिन् । विद्यालय छुट्टी हुने दिन नरमाइलो मान्छिन् । कक्षा १२ सम्म पढाइ हुने यो विद्यालयको बालविकास कक्षामा १ सय ५५ विद्यार्थी छन् ।

बालबालिका नियमित नहुने बालविकास कक्षाको सबैभन्दा ठूलो समस्या थियो । विद्यालयले खाजा खुवाउन थालेपछि सदीक्षा र अनुजजस्ता धेरै विद्यार्थी नियमित विद्यालय आउन थालेका छन् । ‘स्कुल आउनासाथ आज के खाने भनेर सोध्छन् ।

स्कुल छुट्टी भएर जाँदा पनि भोलि के खाने भन्छन्,’ बालविकास कक्षाकी सहयोगी कार्यकर्ता रामकुमारी न्यौपानेले भनिन्, ‘खाजा खान पाएपछि विद्यार्थी निकै खुसी छन् ।’ विद्यार्थीलाई विद्यालयमा टिकाउने उपाय धेरै हुन सक्छन् । शान्ति नमुना माविजस्तै रूपन्देहीको तिलोत्तमा नगरपालिकाका सामुदायिक विद्यालयले दिवा खाजा खुवाएर विद्यार्थीलाई नियमित गराउने अभ्यास थालेका छन् । नगरभित्रका सबै बालविकास कक्षाका विद्यार्थीलाई खाजा खुवाउन तिलोत्तमा नगरपालिकाले सहयोग गरेको हो । खाजाले विद्यार्थी आकर्षित गरेपछि नगरले कक्षा ५ सम्म नै यस्तो व्यवस्था लागू गर्ने योजना बनाएको छ ।

तिलोत्तमा नगरपालिकामा ४३ वटा सामुदायिक विद्यालय छन् । ती सबैमा बालविकास कक्षा छ । चालु शैक्षिक सत्रमा ती बालविकास कक्षामा १ हजार ३ सय २८ बालबालिका भर्ना भएका छन् । ती सबैलाई विद्यालयले जेठ ९ देखि दिवा खाजा दिन थालेको हो । खाजा खान सबै विद्यालयमा खाजा तालिका बनाइएको छ । सोही अनुसार खुवाइन्छ । यसले घरबाट खाजा नल्याउने बालबालिकालाई विद्यालय समयभर रोक्न सकिएको र अभिभावकले घरबाट पैसा पठाउने समस्या पनि टरेको प्रधानाध्यापक कुलप्रसाद लामिछानेले बताए ।

नगरप्रमुख वासुदेव घिमिरेले सामुदायिक विद्यालयमा आकर्षण बढाउन, विद्यार्थी टिकाउन र पोषणमा सुधार ल्याउन दिवा खाजा कार्यक्रम गरिएको बताए । ‘नगरपालिकाबाट विद्यालय खुलेको दिनको हिसाबले दैनिक प्रतिविद्यार्थी २५ रुपैयाँका दरले विद्यालयलाई रकम दिने गरेका छौं,’ उनले भने, ‘यसबाट विद्यालयले तालिका बनाएर खाजा खुवाउने गरेका छन् ।’

खाजाको निरन्तरताका लागि नगरपालिकाले आगामी वर्षको बजेटमा समेत १ करोड रुपैयाँ विनियोजन गरेको छ । ‘दिवा खाजा कार्यक्रमले विद्यार्थीलाई विद्यालय ल्याउन, नियमित बनाउन र दिनभर विद्यालयमै राख्न सहज भएको छ,’ जनजागृति मावि व्यवस्थापन समिति अध्यक्ष यादवप्रसाद सापकोटाले भने, ‘विद्यार्थीको सिकाइ उपलब्धि पनि बढाउन सकिएको छ ।’

प्रकाशित : असार २८, २०७५ ११:१४
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT