जनप्रतिनिधिबीच किचलो

पालिका प्रमुखले मनोमानी गरेको अधिकांशको भनाइ
ठाकुरसिंह थारु

नेपालगन्ज — संघीय सरकारले उपमहानगरपालिकालाई व्यवस्थित ढंगले सञ्चालन गर्न महाशाखा गठनका लागि मागेको सुझावमा प्रमुख र उपप्रमुखबीच मत बाझिएको छ ।

संघीय सरकारले उपमहानगरपालिकालाई व्यवस्थित तरिकाले सञ्चालन गर्न महाशाखा गठन गर्न मागेको सुझाव विवाद भएपछि नेपालगन्ज उपमहानगरपालिकाका उपप्रमुख उमा थापामगर र वडा अध्यक्षहरू पत्रकार सम्मेलन गर्दै ।तस्बिर : ठाकुरसिंह थारू । कान्तिपुर

उपप्रमुख उमा थापामगर र उनी निकट वडाध्यक्षले मंगलबार पत्रकार सम्मेलन गरेर नगर प्रमुखको कार्यशैलीप्रति असन्तोष जनाएका छन् । नगर प्रमुख धवलशमशेर राणाले महाशाखा गठन गर्दा कर्मचारी व्यवस्थापनमा समस्या हुने तर्क गरे । ‘महाशाखा बनाउने हो भने सहसचिवको नेतृत्वमा थप जनशक्ति आवश्यक पर्छ । जसको व्यवस्थापनमा चुनौती छ,’ उनको दाबी छ । उपप्रमुखले भने आफू राजधानी भएका बेला बोर्ड बैठक राखिएको बताइन् । आफूलाई जानकारी नदिई महाशाखा गठन आवश्यक नभएको सुझाव सरकारलाई पठाएको उनको भनाइ छ ।

वडाध्यक्ष पनि बहुमतको दम्भ प्रमुखमा रहेको बताउँछन् । उपप्रमुख मगरले महाशाखा गठन नगरिए उपमहानगरलाई नगरतर्फ धकेल्न खोजेजस्तो देखिने बताइन् । ‘महाशाखा गठनको निर्णयबाट पछि हट्नु उपमहानगरलाई फाइदाजनक छैन,’ उपप्रमुख मगरले भनिन् । नेपालगन्ज १२ का अध्यक्ष बुद्धिसागर सुवेदीले बहुमतको आडमा गलत निर्णय भइरहेको आरोप लगाए ।

Yamaha

अहिले बाँकेमा जनप्रतिनिधिबीच यस्तै किचलो बढ्दो छ । डुडवा गाउँपालिका जनप्रतिनिधिबीच मनमुटाव छ । गाउँपालिका प्रमुख नरेन्द्र चौधरीले एकलौटी गर्दै आएको गुनासो वडाध्यक्षको छ । त्यस्तै विकास बजेटबाट आफ्ना लागि ६३ लाख ५० हजारमा स्कारपियो गाडी र १४ भन्दा बढी मोटरसाइकल किनेको भन्दै वडाध्यक्षले आपत्ति जनाएका हुन् । प्रमुखले आफ्ना निकटलाई उपभोक्ता समितिमा राखेपछि वडाध्यक्षसँगको विवाद चुलिएको हो ।

वडा ३ का अध्यक्ष भण्डरीलाल यादव, ४ का सगीर खाँ र ६ का मोहनराम मिश्राले गाउँपालिकाका प्रमुखले एकलौटी निर्णय गर्दै आएको बताउँदै आन्दोलनको चेतावनी दिएका छन् । ‘प्रमुखले हाम्रा वडामा पनि आफ्ना निकटका व्यक्तिलाई उपभोक्ता समिति अध्यक्ष बनाएका छन् । गतिलो काम भएको छैन,’ वडा ६ का अध्यक्ष मिश्रा भने, ‘जनताको करबाट प्रमुखले आधा करोडको गाडी चढ्छन् । यो राम्रो काम भएन ।’

गाउँपालिका प्रमुख चौधरीले भने बोर्डको निर्णयअनुसार नै आफूले काम गरिरहेको दाबी गरे । बोर्ड बैठकमा बहुमत कार्यपालिका सदस्यले गरेको निर्णय सबैले मान्नु पर्ने उनको तर्क छ । ‘केही असहमति भए बोर्ड बैठकमा कुरा राख्नुपर्‍यो । बाहिर हल्ला गरेर हुँदैन,’ उनले भने, ‘प्रमुख एक्लैले कसरी मनोमानी गर्न सक्छ ? आरोपहरू सबै गलत हुन् ।’

त्यस्तै राप्ती सोनारी गाउँपालिका प्रमुख लाहुराम थारु र उपप्रमुख धनीकुमारी खत्रीबीच अधिकारको विषयलाई लिएर चरम असन्तुष्टि थियो । उपप्रमुख खत्रीले सार्वजनिक रूपमै प्रमुखबारे टिप्पणी गर्न थालेपछि पार्टी नेताहरूले सहजीकरण गरेका थिए ।

उपप्रमुख खत्रीले आफूले कुनै भूमिका नपाएको गुनासो गर्दै आएकी थिइन् । हाल भने विवाद टुंगिएको छ । ‘हामीबीच हाललाई विवाद छैन,’ उनले भनिन् ।

जनप्रतिनिधिहरूबीच अधिकार क्षेत्र र विकासका कामलाई लिएर विवाद हुने गरेको छ । विकास निर्माणका काममा प्रमुख एक्लैले निर्णय गर्दा उपप्रमुख र वडाध्यक्षहरूबीच विवाद हुने गरेको हो । वडाध्यक्षहरूले आफ्नो वडामा आफैंले काम गर्न पाउनुपर्ने माग गर्दै आएका छन् ।

Esewa Pasal

प्रकाशित : श्रावण २४, २०७५ ०९:११
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

खेल पूर्वाधार अधुरै

प्रतियोगिता प्रभावित हुने आशंका
ठाकुरसिंह थारु

नेपालगन्ज — आठौं राष्ट्रिय खेलकुद प्रतियोगिता हुन चार महिना बाँकी छ । तर, त्यसका लागि आवश्यक भौतिक पूर्वाधार निर्माण धेरै बाँकी छन् । अधिकांश खेलस्थल अधुरा छन् । पूर्वाधार पूरा नभएको खण्डमा राष्ट्रिय प्रतियोगिता प्रभावित हुने खतरा बढेको छ ।

केन्द्रले समयमै बजेट निकासा नगर्दा निर्माण कार्यले गति लिन सकेको छैन । यसले यहाँ हुने प्रतियोगिता प्रभावित हुने आशंका बढाएको छ ।

‘आठौं राष्ट्रिय खेलकुद प्रतियोगिता सफलताका लागि हामी तीव्र गतिमा लागिपरेका छौं तर सबै कुरा पैसामै ठोकिन्छ,’ क्षेत्रीय खेलकुद विकास समितिका अध्यक्ष भीम ओलीले भने, ‘समयमै भौतिक पूर्वाधार निर्माण गर्न नसकिने हो भने राष्ट्रिय प्रतियोगिता प्रभावित हुनसक्छ ।’

मंसिर २१ देखि २८ सम्म हुने प्रतियोगितालाई आवश्यक १३ ठूला आयोजना निर्माणाधीन छन् । ती सबै आयोजनालाई पूरा बजेट आएको छैन । कोहलपुरमा अन्तर्राष्ट्रिय क्रिकेट मैदान निर्माण भइरहेको छ । ९० लाख रुपैयाँ खर्च भइसकेको मैदानमा पिच निर्माणका लागि थप १० लाख छुटयाइएको छ । यति रकमले एकछेउको काम पनि पूरा नहुने अध्यक्ष ओली बताउँछन् ।

नेपालगन्ज रंगशालाको ट्रयाक र फिल्ड निर्माणका लागि साढे ६ करोड रुपैयाँ खर्च भइसकेको छ । दर्शक र भीआईपी प्यारापिट निर्माणका लागि २१ करोड लाग्ने अनुमान गरिएको छ । त्यसका लागि पनि राष्ट्रिय खेल परिषद् (राखेप) ले बजेट निकासा गरेको छैन । नेपालगन्जको काराकाँदोमा जुडो एकेडेमी निर्माण भइरहेको छ । त्यसलाई २३ लाख रुपैयाँ निकासा भएको छ । उक्त रकम एकेडेमी निर्माणमा अपुग हुने जनाइएको छ ।

नेपालगन्जमा भारोत्तोलन प्रतियोगिता भवनका लागि ५५ लाख खर्च भइसकेको र अझ ३० लाख रुपैयाँ माथिल्लो तलाका लागि आवश्यक देखिएको छ । सुटिङ रेन्जका लागि एक करोड आवश्यक पर्नेमा ४५ लाख रुपैयाँमात्रै बजेट आएको अध्यक्ष ओलीले बताए । पौडी पोखरीका लागि १५ करोडको काम भइरहेको छ । करिब अन्तिम चरणमा रहेको निर्माणका लागि थप रकम आवश्यक पर्नेछ । बाँकेको खजुरामा शुक्र भलिबल स्टेडियम निर्माण भइरहेको छ । २ करोड रुपैयाँको लागतमा निर्माण भइरहेको स्टेडियमका लागि ८८ लाख रुपैयाँ निकासा भएको छ ।

कबड्डी प्रतियोगितालाई बर्दियाको बाँसगढीमा हल निर्माण भइरहेको छ । १ करोड ७५ लाखमा निर्माण हुने भनिएको कभर्डहलका लागि जम्मा १५ लाख निकासा भएको छ । बर्दियाको ठाकुरबाबा गाउँपालिका भुरिगाउँमा खोखो कभर्डहल निर्माण जारी छ । १ करोड ७५ लाखमा निर्माण हुने हलका लागि १५ लाखमात्रै बजेट निकासा भएको क्षेत्रीय खेलकुद विकास समितिले जनाएको छ ।

बर्दियाको गुलरियामा कभर्डहल निर्माण गर्न १ करोड २० लाख रुपैयाँ बजेट तोकिएको छ । तर त्यसका लागि पनि १५ लाख बजेट निकासा भएको छ । देउखुरीको लमहीमा क्रिकेट मैदान निर्माण भइरहेको छ । ६० लाख खर्च भइसकेको र थप १५ लाख छुट्याइएको छ । तर, त्यति बजेटले भने क्रिकेट मैदान निर्माण हुन नसक्ने जनाइएको छ ।

दाङको बेलझुण्डीमा रंगशाला निर्माण भइरहेको छ । २५ करोड लागतमा निर्माण भइरहेको रंगशालाका लागि बजेट निकासा हुन सकेको छैन । दाङको तुल्सीपुरमा कराँते कभर्डहल निर्माणका लागि एक करोड लागत लाग्नेछ । तर, त्यसका लागि २५ लाख रुपैयाँ मात्रै निकासा भएको छ ।

आठौं राष्ट्रिय खेलकुद प्रतियोगिताको लोगो र मस्कट हात्तीको छावा राखिएको छ । प्रतियोगिताको नारा र गीत यसअघि नै सार्वजनिक भइसकेको छ । प्रतियोगिताको नारा ‘आठौं खेलकुद हाम्रो प्रदेशमा, पसिना र पौरख आफ्नै देशमा’ तय गरिएको छ । उक्त नारा सदस्यसचिव केशवकुमार विष्टले लेखेका हुन् । प्रतियोगिताको गीत नारायण खतिवडाले लेखेका छन् ।

प्रदेश ५ मा बाँके र बर्दिया राष्ट्रिय निकुन्ज रहेकाले पर्यटन प्रवद्र्धनका लागि मस्कट हात्तीको छावा तय गरिएको हो । उनले लोगोमा शान्तिका दूत गौतम बुद्ध, शान्तिको प्रतीक परेवा, बर्दियाको राष्ट्रिय निकुन्ज ठाकुरद्वारालाई प्रतिविम्बित गरिएको छ । लोगोमा सात प्रदेश झल्काइएको छ ।

राष्ट्रियताको पहिचानका लागि चन्द्रसूर्यअंकित झण्डा पनि समेटिएको छ । ३५ खेलमा प्रतिस्पर्धा हुने प्रतियोगिताका लागि करिब डेढ अर्ब रुपैयाँ बजेट खर्च हुने अनुमान गरिएको छ ।

प्रकाशित : श्रावण २२, २०७५ ०७:५८
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT