लक्षित बजेट खोज्दै महिला
बुटवल — स्थानीय तहले लक्षित वर्गअन्तर्गत महिलाका लागि छुट्टै बजेट विनियोजन गरेपछि घरधन्दामा व्यस्त मधेसी समुदायका महिला आफ्ना लागि आएको बजेट खोज्न थालेका छन् ।स्थानीय तह र वडामा महिलाले बजेटमा चासो राख्न थालेका हुन् ।
‘महिलाका नाममा आएको बजेट महिलाले नै थाहा नपाई सकिने गरेको छ,’ रोहिणी १, बगाहकी शान्ति हरिजनले भनिन्, ‘यसैले चालु आवको सुरुमै बजेटको सोधीखोजी थालेका हौं ।’ रोहिणी, ओमसतिया, मायादेवीसहित जिल्लाका ५ स्थानीय तहमा महिला नागरिक सञ्जाल गठन भएका छन् ।
सन्जालमा आबद्ध भएर सुशासनका लागि लक्षित बजेट र त्यसको दुरुपयोग तथा सार्वजनिक काममा हुने अनियमितता समेत रोक्न महिलाले अभियान चलाएका हुन् । ‘सुशासनका लागि सबैभन्दा पहिलो काम सरकारी बजेटको सदुपयोग रहेछ,’ ओमसतिया गाउँपालिका छोटकी, रामनगरकी सरस्वती यादवले भनिन्, ‘यसैले गाउँपालिका र वडामा निगरानी बढाएका छौं ।’ स्थानीय तहमा महिलाकै नाममा आएको बजेट धेरै अपारदर्शी भएको सुनेकाले पनि सोधीखोजी गरेको उनले बताइन् ।
अभियानको सुरुवातमा अध्यक्ष तथा जनप्रतिनिधिलाई भेटेर वडामा जाने बजेटबारे सोधिन्छ । त्यसपछि आफ्ना आवश्यकताअनुसारको बजेट बनाउन आग्रह गरिन्छ । ‘मधेसका हामी महिला घरधन्दामै व्यस्त हुन्छौं । पुरुषसरह यताउता डुल्न र बुझ्न पाउँदैनौं,’ रोहिणी ७, पजरकट्टी ७ की समूह सदस्य जयन्ती पासीले भनिन्, ‘धेरै स्थानीय तहले बजेटको दुरुपयोग गरेका छन् । यसैले बजेट दुरुपयोग रोक्न अभियान चलाएका हौं ।’ आफ्नो क्षेत्रमा रहेका विद्यालय, सामुदायिक वन, स्वास्थ्य संस्थालगायतका कामबारे पनि महिलाले चासो राख्न थालेका छन् ।
पहुँचबाट टाढा रहेका नागरिकलाई समेत विकासको मूलधारमा ल्याउन स्थानीय तहमार्फत योजना निर्माण, बजेट विनियोजन र कार्यान्वयन हुने गरेको छ । लक्षित वर्गको प्रत्यक्ष फाइदा हुने योजना, उत्थान तथा सीप र क्षमता विकासका लागि हरेक स्थानीय तहमा पुँजीगत बजेटको ३५ प्रतिशत रकम छुट्याइने व्यवस्था छ । त्यसमा महिला र बालबालिकालाई १०/१० प्रतिशत र दलित, अपांग, ज्येष्ठ नागरिक, पिछडा वर्गलगायतलाई १५ प्रतिशत बजेट पर्छ ।
अधिकांश महिला शीर्षकको बजेट भने आवश्यकता भन्दै साझा विकासमा लगाइएको छ । रुपन्देहीका मधेसी समुदाय बाहुल्य क्षेत्रमा पनि यो चलन बढी छ । स्थानीय तहले भने लक्षित वर्ग त्यसमा पनि महिलाबाट रचनात्मक कार्यक्रमका प्रस्ताव नआउने र आएका पनि उपयुक्त नहुने कारणले लक्षित वर्गका लागि छुट्याइएको रकम अन्य योजनामा खर्च गरेको बताउँछन्। तर, मधेसी महिलाले त्यो मान्दैनन् ।
‘मधेसका महिला बोल्न नसक्ने र उनीहरूले वास्ता नगर्ने गरेकाले बजेट अन्यत्रै खर्च हुने गरेको रहेछ,’ रोहिणी गाउँपालिका ३ की सदस्य माया चौधरीले भनिन्, ‘अब हामी महिला आफैं पनि चनाखो हुँदै छौं ।’ लक्षित बजेट महिलाकै क्षेत्रमा खर्च गर्न दबाब दिने उनले बताइन् । ओमसतिया गाउँपालिकाका अध्यक्ष हीरा केबटले महिलाले विकास बजेटमा चासो नराख्दा अनुमानका भरमा धेरै बजेट बनाएको बताए । ‘माग जायज भए र महिला आफैं चनाखो भएर आए उनीहरूले भने अनुसार खर्च गर्न सकिन्छ,’ उनले भने, ‘पछिल्लो समय महिलाहरू जागरुक भएका छन् । यो राम्रो पक्ष हो ।’
महिला तथा बालबालिका कार्यालय प्रमुख शारदा बस्यालले कार्यक्रममा छुट्याइएको रकम, खर्चको सदुपयोग, निर्णयमा सहभागिताका बारेमा महिलाले सोधीखोजी गरे मात्रै कार्यान्वयन गर्ने निकाय पारदर्शी हुने बताइन् । ‘अब महिला आबद्ध संघसंस्था तथा कार्यालयले पनि कार्यक्रम सार्वजनिक, सार्वजनिक सुनुवाइ, सामाजिक परीक्षण, लैंगिक बजेट परीक्षणलगायत काम गर्नुपर्छ,’ उनले भनिन्, ‘यसले बजेट सदुपयोग हुन्छ । सुशासन र पारदर्शिता पनि कायम हुन्छ ।’