३ वर्षदेखि अधुरै बसपार्क

१५ महिनामा निर्माण सम्पन्न गर्ने सम्झौता
करिश्मा चौधरी

बाँके — निर्माण सुरु भएको दुई वर्षमा पनि नेपालगन्ज बसपार्कको आधा काम भएको छैन । पटक–पटक म्याद थप्दासमेत अहिलेसम्म ४० प्रतिशत मात्रै काम भएको छ । निर्माणमा ढिलाइले यात्रु, यातायात व्यवसायी, गाडी चालक, स्थानीय व्यापारीलगायत सेवाग्राहीले सास्ती खेप्नुपरेको छ ।

नेपालगन्ज बसपार्क क्षेत्रमा काम गरिरहेका कामदारहरू ।तस्बिर : करिश्मा । कान्तिपुर

२०७२ चैतमा युनाइटेड बिल्डर्ससँग १५ महिनामा काम सक्ने गरी १४ करोड ९४ लाख रुपैयाँमा सम्झौता भएको थियो । तोकिएको समयमा काम नभएपछि पटक–पटक गरेर पाँच महिना म्याद थप गरिएको नेपालगन्ज उपमहानगरपालिका इन्जिनियर सुरज गुप्ताले बताए । थपिएको समयमा पनि काम पूरा भएन । त्यसपछि नगर कार्यपालिका बैठकले ०७५ फागुन अन्तिमसम्म सक्ने गरी पुन: समय थपेको छ ।

यसअघि ढिलाइ भए पनि अहिले निर्माणले गति लिएको इन्जिनियर गुप्ताले बताए । ‘वर्षात्ले निर्माणमा केही बाधा भए पनि अहिले गतिमै भइरहेको छ,’ गुप्ताले भने, ‘अहिले ठेकेदार कम्पनीले पनि बुझेको छ । उसलाई पनि काम समयमै सक्नुपर्ने बाध्यता छ । वर्षाको समय सकिएपछि कामको गति अझै बढ्छ ।’

Yamaha

आधुनिक सुविधासहित बनाउन थालिएको बसपार्क साढे चार बिघा क्षेत्रफलमा फैलिएको छ । बसपार्कमा टर्मिनल भवन, सपिङ बिल्डिङ, चमेनागृह, पक्की पार्किङ क्षेत्र, शौचालय निर्माण गर्न थालिएको हो । निर्माण कम्पनीले बसपार्कको मुख्य प्रवेशद्वार र पर्खाल निर्माणको पनि जिम्मा लिएको छ । बसपार्क निर्माणमा ढिलाइ हुँदा थुप्रै समस्या भोग्नु परेको यातायात व्यवसायी तेन्जी शेर्पाले बताए ।

समयमै निर्माण नसक्दा काउन्टर सञ्चालन गर्न पनि मुस्किल भएको छ । वर्षात्मा हिलो अनि हिउँदमा धूलोको मारमा परेका यात्रु टिकट काट्न पनि कम आउने गरेको शेर्पाले सुनाए । ‘हिलोको बीचमा काउन्टर राख्नुपरेको छ । को आउँछ यस्तोमा टिकट काट्न ? धेरैजसो त चोकतिरबाटै गाडी चढ्छन्,’ शेर्पाले भने, ‘एकदमै धेरै जाम पर्छ । बसपार्क रोड नै बसपार्कजस्तै बनेको छ । त्यसमाथि सडक निर्माण भइरहेको छ । गाडी राख्ने ठाउँ छैन । होटल, पसलहरूका अगाडि राख्दा गाली खानुपर्ने समस्या छ ।’

केही गाडी सडकमै राख्नुपरेको अनि केही गाडी हिलोमा राख्न बाध्य भएको शेर्पाले बताए । यसरी सेवा दिन निकै गाह्रो भएकाले छिट्टै बसपार्क निर्माणको काम सक्न सरोकारवालाले पहल गर्नुपर्ने व्यवसायी शेर्पाको आग्रह छ । बसपार्क निर्माणमा ढिलाइ हुँदा त्यस आसपासका व्यापारीले पनि सास्ती भोग्नुपरेको छ ।

बसपार्क रोडमा होटल व्यवसाय गरिरहेकी सुभद्रा क्षत्रीले बसपार्क निर्माणमा धेरै समय लगाउँदा व्यापार घटेको बताइन् । बसपार्क सञ्चालनमा आएको समयभन्दा अहिले आधाले व्यापार घटेको उनको दाबी छ । ‘बसपार्क सञ्चालन हुँदा धेरै मान्छे आउँथे र राम्रो व्यापार थियो,’ उनले भनिन्, ‘तर, अहिले त मान्छे नै कम आउँछन् ।’ गाडी चालकले होटलअगाडि गाडी राख्दा झन् गाह्रो हुने सुभद्राले बताइन् ।

‘अगाडि गाडी राख्दा व्यापारमा घाटा भएको छ,’ उनले भनिन्, ‘गाडी नराख्न भन्दा कसैले टेर्दैनन् ।’ बसपार्क नबन्दा गाडीहरू सडकमै छन् । कुन ठाउँ जाने गाडी कता छन् भन्ने थाहापत्तो नै हुँदैन । जता ठाउँ हुन्छ, त्यतै गाडी राख्ने बाध्यता गाडी चालकलाई छ । यसले यात्रुलाई गाडी र गाडीले यात्रु पाउन गाह्रो भएको छ । नेपालगन्ज–सुर्खेत खण्डमा गाडी चलाउने यामबहादुर पुलामीले समयमै बसपार्क नबन्दा गाडी पार्किङ गर्न र यात्रु चढाउन समस्या भएको बताए । ‘पार्किङ गर्ने ठाउँ छैन । सडकमा राख्दा व्यापारीले राख्न दिँदैनन्,’ उनले भने, ‘गाडी राख्ने ठाउँ फिक्स नहुँदा यात्रु पाउन पनि गाह्रो छ ।’ यसले यात्रुलाई पनि समस्या भएको उनी बताउँछन् ।

सडकमा गाडी राख्दा यहाँ आवतजावत गर्ने थुप्रै सर्वसाधारणले पनि समस्या भोग्नुपरेको छ । अचेल यो सडकमा धेरै जाम पर्छ । जाम नपरेको समयमा पनि सडकछेउमा गाडी पार्किङ गरिएका हुन्छन् । बीचमा गाडी गुडिरहेको हुन्छ ।

पैदलयात्री गाडीहरूको बीचबीचबाट ठाउँ खोज्दै हिँड्नुपर्ने हुँदा दुर्घटना पनि बढेको छ । ‘ढुक्कले हिँड्न सकिएको छैन,’ पैदलयात्री राकेश केसीले भने, ‘कहिले यो साइड हिँड्नुपर्छ, कहिले त्यो साइड पुग्नुपर्छ । कहिलेकाहीं त गाडीको बीचबाटै छिर्नुपर्ने समस्या पनि छ ।’

Esewa Pasal

प्रकाशित : श्रावण ३१, २०७५ ०९:२७
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

मासु र डेरी पसल मापदण्डविपरीत

करिश्मा चौधरी

बाँके — कोहलपुर नगरपालिकाका अधिकांश मासु र डेरी पसल मापदण्डविपरीत सञ्चालन भएका छन् । बजार अनुगमन समितिका अनुसार नगरका ९० प्रतिशतभन्दा बढी मासु र डेरी पसल मापदण्ड पूरा नगरेरै सञ्चालन भइरहेका हुन् ।

समितिले गरेको अनुगमनमा व्यवसायीले आवश्यक सरसफाइ नगरेको, कम गुणस्तरका वस्तु बेचेको, पसल दर्ता नगरी चलाएको, खुला रूपमा पशुपक्षी बध गरेको पाइएको छ ।

पशुपक्षीको बध र खुला स्थानमा मासु बिक्री वितरण गरिनु जटिल समस्या रहेको नगर उपप्रमुख तथा उपभोक्ता हित संरक्षण समिति संयोजक सञ्जुकुमारी चौधरीले बताइन् । यस्तो समस्याको दीर्घकालीन समाधानका लागि नगरपालिकाले भदौ ३ गते मासु व्यवसायीसँग अन्तरक्रिया गर्ने तयारी गरेको छ । व्यवसाय सञ्चालनका मापदण्ड, कानुनी व्यवस्था र प्राविधिक कुराबारे अन्तरक्रिया हुनेछ । ‘पहिले त व्यवसायीलाई नियमबारे जानकारी गराउनुपर्‍यो,’ संयोजक चौधरीले भनिन्, ‘पसल कसरी चलाउनुपर्छ भनेर उहाँहरूलाई बुझाउनुपर्‍यो । त्यसपछि पनि अटेर गरे कारबाही गर्छौं ।’

बजार अनुगमन समिति संयोजक कर्णबहादुर थापाका अनुसार समितिले अहिले उपभोक्ताको दैनिक सरोकारका खाद्यान्न, औषधि, माछामासु, डेरी, फलफूलजस्ता क्षेत्रलाई केन्द्रित गरेर अनुगमन गरिरहेको छ । उपभोक्ताको क्षेत्र धेरै भए पनि स्वास्थ्यसँग प्रत्यक्ष सरोकार राख्ने विषयलाई प्राथमिकता दिएको उनले बताए । मासु र डेरीमा धेरै समस्या देखिए पनि अरूमा गत वर्षभन्दा अलि सुधारोन्मुख रहेको संयोजक थापाको भनाइ छ ।

समितिले अनुगमनका क्रममा दर्ता, नवीकरण, मूल्यसूची, वस्तुको परिमाण, गुणस्तर, सरसफाइ, बिललगायतको अनुगमन गर्छ । यी मापदण्ड पूरा नगरे समितिले सुरुमा कसुर हेरेर सजग गराउने वा चेतावनी दिने गरेको छ । त्यसपछि पनि अटेर गरे कारबाहीको दायरामा ल्याउँछ ।

अहिलेसम्म कारबाही भने भएको छैन । ‘अहिले त सजग मात्र गराएका छौं,’ संयोजक थापाले भने, ‘अब सुरुमा अन्तरक्रिया गर्छौं त्यसपछि पछि पनि अटेर गर्नेलाई कारबाही नै गर्छौं ।’ अटेर गर्ने व्यवसायीलाई तत्काल र दीर्घकालीन कारबाही हुन्छ ।

प्रकाशित : श्रावण २६, २०७५ ०८:५३
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT