दाङमा ६० किलो चरेससहित पाँच जना पक्राउ

दुर्गालाल केसी

दाङ — प्रहरीले दाङमा दुई दिनको अवधिमा ६० किलो चरेससहित पाँच जनालाई पक्राउ गरेको छ । लमही नगरपालिका–९, अमिलियामा लागुऔषधको कारोबार भैरहेको सूचनाका आधारमा छापा मार्दा ६० किलो चरेससहित तीन पुरुष र दुई महिला पक्राउ परेको जिल्ला प्रहरीले जानकारी दिएको छ ।

पक्राउ पर्नेमा मुसीकोट नगरपालिका–११ रुकुुम पश्चिमका ४५ वर्षीय प्रेमबहादुर घर्ती, दार्माकोट गाउँपालिका–५ सल्यानका ३५ वर्षीय डिल्लीराज चन्द, पुथाउत्तरगंगा गाउँपालिका–१ काल्दुङ रुकुम पूर्व घर भई हाल घोराही उपमहानगरपालिका १५ बस्दै आएकी ३० वर्षीया रुपा घर्ती पुन, भूमे गाउँपालिका–२ रुकुम पूर्वकी २७ वर्षीया सपना पुन मगर र धु्रबजंग बुढा छन् ।

Yamaha

उनीहरुले रुकुमबाट चरेस ल्याएको बताएको जिल्ला प्रहरी प्रमुख एसपी कृष्णहरी शर्माले जानकारी दिए । लागुऔषध कारोबार बारे थप अनुसन्धान भैरहेको उनले बताए ।

प्रकाशित : भाद्र ४, २०७५ ०९:०६
ADVERTISEMENT
प्रतिक्रिया
पठाउनुहोस्
ADVERTISEMENT

५० विमानस्थलमध्ये ४३ घाटामा

काठमाडौं विमानस्थलको आम्दानी ७ अर्ब
सुरज कुँवर

काठमाडौँ — मुलकभरका ५० विमानस्थलमध्ये ४३ घाटामा देखिएका छन् । त्रिभुवन अन्तर्राष्ट्रिय विमानस्थलसहित पोखरा, भैरहवा, लुक्ला, भरतपुर, सिमिकोट, नेपालगन्जबाहेक अन्य सबै घाटामा चल्दै आएका छन् ।

हाल नियमित र चार्टर गरी २९ वटा विमानस्थल चालु अवस्थामा छन् । यो सूचीमा रहेका २२ वटा विमानस्थल घाटामा छन् । नागरिक उड्डयन प्राधिकरणका अनुसार ठूलो घाटामा रहेका विमानस्थलमा जनकपुर, धनगढी, सिमरा, सुर्खेत, विराटनगर, जुम्ला, रुकुम, रुम्जाटार, थामखर्क, तुम्लिङटार छन् ।

यसैगरी सिमरा, सुर्खेत, चन्द्रगढी, तुम्लिङटार पनि घाटामै सञ्चालित छन् । पहाडी रुटअन्तर्गत बाजुरा, भोजपुर, डोल्पा, जोमसोम, जुम्ला, खानीडाँडा, फाप्लु, रारा पनि घाटामै देखिन्छन् । नियमित व्यावसायिक उडान नहुने तर चार्टर उडान हुने लामीडाँडा, रामेछाप, चौरजहारी, सल्ले, रुम्जाटार, ताप्लेजुङ र थामखर्क पनि घाटाकै सूचीमा छन् ।

यी २२ वटाबाहेक थप २१ वटा विमानस्थल वर्षौंदेखि बन्द छन् । बन्दमध्ये मेघौली, साँफेबगर, डोटी, मनाङ, कालिकोट, कमलबजार (अछाम) लगायतका विमानस्थलमा बेलाबेला राजनीतिक दबाबका कारण परीक्षण उडान भए । सरकार स्वामित्वको नेपाल वायुसेवा निगमले आन्तरिक रुटलाई बेवास्ता गरेको र नौवटा निजी एयरलाइन्स नाफामा केन्द्रित हुनु लगायतका कारणले यी नियमित सञ्चालनमा ल्याउन सरकार असफल देखिँदै आएको छ । ‘नागरिक उड्डयन प्राधिकरणले पछिल्ला वर्ष थपेको पूर्वाधार लगानी र बजेट विनियोजनअनुसार ७ वटा विमानस्थल पनि घाटामै छन् । कुनै पनि नाफामा देखिँदैनन्,’ प्राधिकरणका प्रवक्ता वीरेन्द्रप्रसाद श्रेष्ठले भने ।

प्राधिकरण थप नयाँ ५ वटा विमानस्थल निर्माणाधीन अवस्थामा छन् । यिनमा अर्घाखाँची, गुल्मी, इलाम, कालिकोट, र खिजीचण्डेश्वरी (ओखलढुंगा) विमानस्थल छन् । यीमध्ये इलाम र गुल्मीमा परीक्षण उडान भइसकेको छ । प्राधिकरणका अनुसार देशभर निर्माणाधीनसहित ५५ विमानस्थल छन् । धावनमार्ग कालोपत्रे गरिएका विमानस्थलको संख्या ३१ पुगेको छ ।

विमान अभावले यी सञ्चालनमा ल्याउन नसकिएको सरकारी अधिकारी बताउँछन् । पर्यटनमन्त्री रवीन्द्र अधिकारीले आइतबार मन्त्रालयमा आयोजना गरिएको वार्षिक समीक्षा बैठकमा आगामी दिनमा निजी एयरलाइन्सलाई दुर्गम क्षेत्रमा पनि उडान गराउन बाध्यकारी नियम ल्याउन निर्देशन दिएका छन् । ‘नाफाका रुटमा उड्ने एयरलाइन्सलाई कम्तीमा दुइटा दुर्गम क्षेत्रमा अनिवार्य सेवा दिनुपर्ने नियम बनाउनू,’ मन्त्री अधिकारीले समीक्षा बैठकमा प्राधिकरणका महानिर्देशक सञ्जीव गौतमलाई भने ।

प्राधिकरणको बजेट ४५ अर्ब
प्राधिकरणले चालु वर्षका लागि ४५ अर्ब १७ करोड रुपैयाँ बराबरको बजेट तर्जुमा गरेको छ । यसमा नेपाल सरकारबाट २० अर्ब ८५ करोड रुपैयाँ र प्राधिकरणको हिस्सा २४ अर्ब ३२ करोड रुपैयाँ रहेको छ ।

प्राधिकरणले गत वर्ष विदेशी पर्यटकबाट संकलन गरिने विमानस्थल विकास शुल्कअन्तर्गत १ अर्ब ९७ करोड रुपैयाँ र अन्य आम्दानीबाट ५ अर्ब ८६ करोड रुपैयाँ गरी ७ अर्ब ८४ करोड रुपैयाँ हाराहारी आम्दानी गरेको छ । प्राधिकरणलाई सरकारको सेयर, अनुदान, ऋणसमेत गरेर ९ अर्ब ८७ करोड रुपैयाँ थियो । गत आर्थिक वर्ष सर्वाधिक आम्दानी गर्नेमा मुलुकको एक मात्र अन्तर्राष्ट्रिय विमानस्थल थियो ।

त्यहाँबाट मात्रै ७ अर्ब २५ करोड रुपैयाँ आम्दानी भएको प्राधिकरणले जनाएको छ । यो अघिल्लो वर्षको दाँजोमा १० प्रतिशत वृद्धि हो । आर्थिक वर्ष ०७३/७४ मा त्रिभुवन अन्तर्राष्ट्रिय विमानस्थलको आम्दानी ६ अर्ब ६२ करोड रुपैयाँ थियो ।

प्रकाशित : भाद्र ४, २०७५ ०९:०३
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT
ADVERTISEMENT