गाई पालेरै मासिक ५० हजार

करिश्मा चौधरी

बाँके — कोहलपुर १४ की राधा भण्डारी बिहान उठेदेखि नसुत्दासम्म काममै खटिन्छिन्् । धेरै मान्छे जागिरका पछि दौडिन्छन् । तर, राधाले भने भएको जागिर छाडेर घण्टौं काममा खटिन थालिन्, त्यसमै उनी सन्तुष्ट छन् । आफ्नै पौरखले कमाएको आम्दानीले उनका सबै दु:ख बिर्साइदिएको छ ।

बाँकेको कोहलपुर १४ की राधा भण्डारी गाईको स्याहार गर्दै । तस्बिर : करिश्मा

८ वर्षअघि ४ वटाबाट सुरु गरेको उनको फर्ममा अहिले १८ गाई छन् । मासिक ५० हजार रुपैयाँ आम्दानी हुन्छ । ‘हुन त बिहान उठेदेखि नसुत्दासम्म काममै खटिनुपर्छ, आराम भन्ने छैन,’ उनी भन्छिन्, ‘कतै जान फुर्सद पाइँदैन, मिहिनेत धेरै छ तर पनि सन्तुष्ट छु ।’ नोकरी गरेको भए भ्याइनँ वा सकिनँ भन्न नपाइने भएकाले छाडेर आफ्नै व्यवसायमा लागेको उनले बताइन् ।

श्रम र आम्दानी दुवै हिसाबले गाईपालन व्यवसाय सजिलो छ । तत्कालै आम्दानी हुन्छ । आज दुहुनो गाई किने भोलिबाटै आम्दानी हुन्छ । राधाले झन्डै ६ वर्ष अध्यापन गरिन् । दु:ख र परिश्रमअनुसार आम्दानी नभएपछि उनलाई चित्त बुझेन अनि श्रीमान्सँगै मिलेर व्यवसाय सुरु गरिन् । उनको फर्ममा अहिले ६ दुहुना गाई छन्। दैनिक ६० लिटर दूध उत्पादन हुन्छ । सबैले पशुपालन छाड्न थालेपछि कसले पाल्छ भन्ने लागेर आफूले पाल्न थालेको उनले बताइन् ।

Yamaha

थोरैबाट सुरु गरे पनि अझै ठूलो फर्म बनाउने उनको लक्ष्य छ । गाई पाल्न थालेपछि राधालाई शिक्षकको जागिरभन्दा व्यवसाय नै राम्रो लाग्यो । ‘जागिरभन्दा त धेरै सजिलो नि, शारीरिक मिहिनेत त बढी नै हुन्छ,’ उनले भनिन्, ‘तर, सन्तुष्टि लाग्छ । आफ्नै मर्जीले काम गर्दा आनन्द हुन्छ ।’ उनलाई थाइराइड र दमजस्ता रोगले सताइरहन्थ्यो । तर, अहिले बिहानदेखि बेलुकासम्म नियमित परिश्रमले ती दुवै रोग निको भएका छन् ।

राधालाई उत्पादित दूध बेच्न कहिल्यै समस्या भएन । अहिले आफ्नै डेरी खोलेका छन् । मल पनि घरबाटै बिक्री हुन्छ । हिउँदमा आफ्नै बारीको घाँसले पुग्छ । वर्षातको घाँसका लागि १० कट्ठा जग्गा भाडामा लिएको उनले बताइन् । मनैदेखि गाई पाल्छु भन्ने इच्छा भए मात्रै व्यवसायमा आउन उनले सुझाइन् । अरूको देखेर रहरले मात्रै आउँदा गाह्रो हुने राधा बताउँछिन्् । आफैं खटिनुपर्छ । अरूलाई मात्रै लगाएर सफलता मिल्न नसक्ने राधाको अनुभव छ ।

गाईपालन सुरु गर्दा राधाले कुनै तालिम लिएकी थिइनन् । तर, अहिले विभिन्न तालिमसँगै अनुभव पनि उनीसँग छ । ‘म आफैं सामान्य डाक्टर भइसकें,’ उनले भनिन्, ‘अहिले गाईलाई कुन समयमा कस्तो रोगले आक्रमण गर्न सक्छ, र के गर्ने भन्ने बुझेकी छु ।’ गाईलाई खोरेतबाट जोगाउनुपर्ने उनले बताइन् । खोरेतले गर्भवती गाईलाई आक्रमण गरेमा सुत्केरी हुँदा ज्वरो आउने र पिसाबमा रगत देखिने समस्या हुन्छ । त्यस्तो अवस्थामा गाईको ज्यानै पनि जान सक्ने भएकाले धेरै ख्याल गर्नुपर्ने उनको तर्क छ ।

पशु सुत्केरी हुँदा किसानलाई जोखिम पर्छ भनेर कोहलपुर नगरपालिकाले पशु सुत्केरी भत्ताको कार्यक्रम ल्याएको छ । गाई र भैंसी सुत्केरी हुँदा यो भत्ता दिइने भएको हो । नगरपालिकाले यसै वर्ष ल्याएको कार्यक्रम भएकाले सुरु भइसकेको छैन । तर, यो सुविधा लिन फर्म दर्ता गरिएको र पशुको बिमा गरेको हुनुपर्ने नगरपालिकाले जनाएको छ । यस कार्यक्रमले किसानलाई सहयोग र प्रोत्साहन मिल्ने उनले बताइन् ।

प्रकाशित : भाद्र ५, २०७५ ०९:१७
प्रतिक्रिया
पठाउनुहोस्
ADVERTISEMENT

तानसेनमा पार्किङ र रुट निर्धारण

माधव अर्याल

तानसेन (पाल्पा) — साताअघि तानसेन नगरपालिका २ बडीज्ञानटोलमा भएको दुर्घटनामा दुईको ज्यान गएपछि नगरपालिकाले ट्राफिक व्यवस्थित बनाउन अग्रसरता देखाएको छ ।

जिल्ला प्रहरी, प्रशासन तथा ट्राफिकको सहकार्यमा नगरपालिकाले पार्किङ क्षेत्र र गाडीका लागि रुट निर्धारण गरेको हो । ग्रेड नमिलेको र मापदण्ड नपुगेको सडकमा दुर्घटना हुँदा ज्यान गएपछि नगरपालिकाले चासो देखाएको हो ।

सर्वपक्षीय अन्तरक्रियापछि ट्राफिक व्यवस्थापनका लागि २७ बुँदे निर्णय भएको नगरपालिका सूचना अधिकृत विष्णुप्रसाद पौडेलले बताए । ‘तानसेन नगरभित्रको ट्राफिक व्यवस्थालाई अबदेखि कडाइ गरिने भएको छ,’ उनले भने, ‘विगतको निर्णय कार्यान्वयन भएको भए अहिले यस्तो दुर्घटना हुने थिएन ।’ विगतमा पटक–पटक ट्राफिक व्यवस्थापनका विषयमा धेरै निर्णय भए । तर, अहिलेसम्म भएका निर्णयको सही कार्यान्वयन हुन नसक्दा बेलाबखतमा दुर्घटना हुने गरेको छ । तानसेन बजारभित्रै हुने दुर्घटनाबाट ज्यानै जाने, घाइते हुने, अंगभंग भएका घटना धेरै छन् । पहाडी जिल्ला र पुरानो सहर भएकाले यहाँ पार्किङ तथा सवारी आवतजावतमा समस्या छ ।

नगरपालिकाका अनुसार अब गुल्मी जाने मालबाहक तथा ठूला सवारीका लागि होलाङदीबाट–सेतीपोखरी–ढुंगाखानी–बाइपास सडक सञ्चालन गर्ने व्यवस्था मिलाइएको छ । हुलाकचोक–बडीज्ञानटोल हुँदै बसपार्क झर्ने ठाडो सडकमा चारपांग्रे सवारी प्रवेश निषेध गरेको नगरपालिकाले जनाएको छ ।

अत्यावश्यक एवं सुरक्षासँग जोडिएको साधनलाई प्रवेश निषेध गरिने छैन । निर्माण सामग्री र पानी बोक्ने सवारीलाई राति ८ देखि बिहान ५ बजेसम्म प्रवेश दिन सकिने सर्वपक्षीय निर्णय भएको नगरपालिकाले जनाएको छ । शीतलपाटी ठाडो गल्लीलाई बिहान ९ देखि ११ र बेलुकी ४ देखि ६ बजेसम्म दुवैतर्फबाट चारपांग्रे प्रवेश निषेध गरेको छ ।

अन्य समयमा ठाडोगल्ली चोकबाट शीतलपाटी एकतर्फी सवारी चलाउने व्यवस्था मिलाइने भएको छ । शीतलपाटीबाट भगवती टोलतर्फ जाने जनता मावि स्कुलको तलको घुम्ती हुँदै ठाडो गल्ली चोकसम्म एकतर्फी हुनेछ । टुँडिखेल वीरेन्द्रपार्क आसपासको सडकक्षेत्र तथा नारायणस्थान चोक क्षेत्रमा पार्किङ पूर्णनिषेध गरिनेछ ।

तेर्सो सडक र असन टोलमा विगतदेखि लागू गरिँदै आएको एकतर्फी नियम कायमै छ । असनटोल र शीतलपाटी ठाडो गल्लीमा मोटरसाइकललाई पार्किङ निषेध गरिएको छ । उक्त स्थानमा राखिने मोटरसाइकललाई सहज पार्किङ गर्न असनटोल रेडक्रस फूलबारी क्षेत्रमा व्यवस्थापन गरिने नगरपालिकाको योजना छ ।

विशालबजार क्षेत्रको अव्यवस्थित पार्किङलाई न्यूनीकरण गर्न साइराम मन्दिरसम्मको सार्वजनिक सडकलाई एकतर्फी चारपांग्रे र अर्कोतर्फ मोटरबाइक पार्किङ क्षेत्र तोकिने भएको छ । तानसेनदेखि पश्चिमतर्फ जाने/आउने भाडाका सवारी साधनका लागि गौरीशंकर होटलअगाडिको खाली भाग प्रयोग गरिनेछ । पार्किङका लागि पुष्प स्मृति पुस्तकालयअगाडिको तल्लो खुला भूभागलाई प्रयोग गर्ने निर्णय भएको सूचना अधिकारी पौडेलले जानकारी दिए । पहिलो चरणमा बजारभित्रका शिक्षण संस्था, अस्पताल एवं मुख्यबजार (लहरे पीपलदेखि टक्सारचोक र असनटोल र तेर्सो सडकसम्मको क्षेत्रलाई हर्न निषेधित क्षेत्र घोषणा गरिएको छ ।

मिसन अस्पताल क्षेत्रको अव्यवस्थित पार्किङलाई न्यूनीकरण गर्न लायन्स धर्मशालाअगाडि र भूसलडाँडा सडकको एकतर्फी सार्वजनिक जग्गामा पार्किङ गर्ने व्यवस्था मिलाइएको छ ।

सडक पेटी अतिक्रमणलाई निरुत्साहन गर्न पाल्पा उद्योग वाणिज्य संघ संयोजक रहने गरी व्यापार संघका प्रतिनिधि, नगर प्रहरी, उपभोक्ता अधिकारकर्मी सम्मिलित कार्यदल गठन गरिनेछ ।

प्रकाशित : भाद्र ५, २०७५ ०९:१६
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT