सिफारिसबिनै जग्गा पास

कान्तिपुर संवाददाता

परासी — मालपोत कार्यालय परासीले सिफारिसबिनै जग्गा पास गरेको घटना सार्वजनिक भएको छ । केही महिनाअगाडि सार्वजनिक जग्गा व्यक्तिका नाममा दर्ता गरेको घटना सेलाउन नपाउँदै वडाको सिफारिसबिनै बकसपत्र पास गरेको रहस्य खुलेको छ ।

स्थानीय तहको अधिकार हनन गरेर गैरकानुनी काम गरेको भन्दै जनप्रतिनिधिले विरोध जनाएका छन् ।


सुनवल नगरपालिका १३ मा अंशबन्डाबापतको जग्गा पास गर्दा स्थानीय तहको सिफारिसबिना नै बकस गरेर पास गरिएपछि घटना सार्वजनिक भएको हो । मालपोत कार्यालयले जग्गा बेचबिखन र खरिद गर्दा अनिवार्य रूपमा बाटो, घर वा अन्य संरचना भए/नभएको भनेर वडा कार्यालयको सिफारिस माग्ने गर्छ ।


स्थानीय तहको सिफारिस नै नमागी सुनवल १३ का ज्ञानप्रसाद पाण्डेको जग्गा बुहारीका नाममा बकसपत्र स्वरूप रजिस्ट्रेसन पास भएको हो । कित्ता नम्बर २३७ को १ कट्ठा १२ धुर जग्गा मालपोतका कर्मचारीको मिलेमतोमा पास भएको सुनवल १३ का वडाध्यक्ष कृष्णप्रसाद देवकोटाले बताए ।


स्थानीय ज्ञानप्रसाद पाण्डेका दुई छोरा नेत्रलाल पाण्डे र अरूण पाण्डेले अंशबापत पाउनुपर्ने जग्गा स्थानीय तहको सिफारिसबिना नै अरूण पाण्डेकी पत्नी सुमित्रा पाण्डेका नाममा भदौ ६ गते पास गरिएको हो । ‘मालपोत कार्यालयको लापरबाही देखियो,’ वडा नम्बर १३ का वडाध्यक्ष देवकोटाले पत्रकार सम्मेलन गर्दै भने, ‘आफ्नो अख्तियारीभन्दा बाहिर गएर मालपोत कार्यालयले जननिर्वाचित स्थानीय तहलाई नै पाखा लगाउने काम गर्‍यो ।’


स्थानीयले जग्गा रजिस्ट्रेस गर्दा नाता प्रमाणित, घरगोठ सिफारिस, तिरो तिरेको रसिदबिना पास भएकाले आर्थिक चलखेल भएको भन्दै संलग्न कर्मचारीलाई कारबाही गर्न माग गरेका छन् । मालपोत कार्यालय परासीका अधिकृत शिवध्वज अधिकारीले कर्मचारीले गल्ती गरेको स्वीकार्दै कार्यालयका तर्फबाट विभागीय कारबाही गरिने बताए । ‘पटकपटक यस्तो गल्ती दोहोरिएको छ,’ उनले भने, ‘कार्यालयको बदनाम गराउने छुट कसैलाई छैन ।’

प्रकाशित : भाद्र १३, २०७५ १२:४४
प्रतिक्रिया
पठाउनुहोस्

रोपाइँ जात्राको रौनक

कान्तिपुर संवाददाता

पाल्पा — सांस्कृतिक सहर तानसेन र ग्रामीण भेगमा मंगलबार रोपाइँजात्राको रौनकता छायो । जिल्लाका तानसेनबाहेक नायरनम्तलेस, मस्याम, सराई, जब्गादी, हुमिन, माझकोट, रामपुरलगायत स्थानमा रोपाइँ जात्रा निकालिएको छ ।

सिमसिमे पानीको वास्ता नगरी विभिन्न समुदायले रोपाइँ जात्रा निकालेका हुन् । ग्रामीण भेगमा नेवारी र अन्य समुदायको सहयोगमा रोपाइँ जात्रा निकाल्ने चलन छ । तानसेनमा भने नेवार समुदायभन्दा पनि अन्य समुदायबाट नै परम्परा धान्ने काम भएको छ । रोपाइँ जात्रा यहाँ प्रत्येक वर्ष गाईजात्राको भोलिपल्ट निकालिन्छ ।


खर्चिलो जात्रा भएकाले आर्थिक अभाव भने सधैं रहन्छ । ‘धेरै कलाकार प्रयोग गर्नुपर्ने
भएकाले निकै खर्चिलो छ,’ तानसेन ५ अर्चलेका यामबहादुर कार्कीले भने, ‘तैपनि प्रत्येक वर्ष
निकालिएको छ ।’


मान्छे नै जुवामा नारिएर हलो तान्दै हिँडेको दृश्य गज्जब देखिन्छ । काठमाडौं उपत्यकापछि पश्चिम पहाडी जिल्लामा सबैभन्दा धेरै जात्रा यहाँ निकालिन्छ । रोपाइँ जात्राको रौनक अन्यभन्दा अलग्गै हुन्छ । हातहातमा बीउ बोकेर साँच्चै केटी र केटीको भेषमा केटाहरू सडकमा पन्चेबाजाको तालमा धान रोप्छन् ।


‘रोपाइँ जात्राको खर्चको हिसाबभन्दा पनि कसरी खर्च धान्ने भन्ने हुन्छ,’ स्थानीय फणीन्द्र बस्यालले भने, ‘सबैको सहयोगले नै निरन्तरता दिन सकिएको छ ।’ जात्रामा कोदालो बोकेर बाउसे गर्ने अघि–अघि हिँड्नुपर्छ । त्यसको पछिपछि रोपाहारलाई साथ दिन्छन् । पञ्चेबाजाको तालमा गीत गाएर नाच्नेको छुट्टै रौनक हुन्छ ।


नर्तकीहरू पनि कम्ती हुँदैनन् । पञ्चेबाजाको तालमा उनीहरूको नाचले दर्शक लोभ्याउँछ । त्यसमा हँसाउनेले पनि दर्शकलाई मनोरञ्जन दिएकै हुन्छन् । सडक पेटीमा जात्रा हेर्नेको भीड पनि उस्तै हुन्छ ।


‘धेरै वर्षपछि यस वर्ष जात्रा हेर्ने अवसर मिल्यो,’ तानसेनका विष्णु खनालले भने । तानसेन ५ अर्चले टोल विकास संस्था, तानसेन १ बराङदीको गणेश टोल विकास संस्थालगायतले तानसेनमा जात्रा निकाले । ‘रोपाइँ जात्रा हेर्दा निकै रमाइलो लाग्छ,’ तानसेन ५ की बबिता विष्टले भनिन्, ‘त्यसैले प्रत्येक वर्ष जात्रा हेर्न मन लाग्छ ।’ रोइला र असारे भाकामा नाचगान गर्दै हिँडेको देख्दा खेतमा यस्तो प्रचलन हराए पनि जात्रामा देख्न पाइएको स्थानीय सिर्जना विष्टले बताइन् ।


प्रकाशित : भाद्र १३, २०७५ १२:४३
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT