अनुपात नमिल्दा गुणस्तरमा समस्या

अमृता अनमोल

बुटवल — शिक्षक दरबन्दी पुन: वितरण सुझाव कार्यदलको तथ्यांकअनुसार पाल्पाको बगनासकाली गाउँपालिकामा प्राथमिक तहमा एक शिक्षक बराबर १२ विद्यार्थी छन् ।

पाल्पाकै रिब्दीकोटमा एक शिक्षकको भागमा १४ विद्यार्थी पर्छन् । कपिलवस्तुको विजयनगरमा भने एक शिक्षक बराबर १ सय २६ विद्यार्थी छन् । निम्न माध्यमिक तहमा पनि पाल्पाकै बगनासकाली गाउँपालिकामा एक शिक्षकको जिम्मामा २० विद्यार्थी मात्रै छन् ।

कपिलवस्तुको विजयनगरमा भने एक शिक्षक बराबर २ सय ४९ विद्यार्थी अनुपात छ । माध्यमिक तहमा गुल्मीको रूरू गाउँपालिकामा एक शिक्षक बराबर १३ विद्यार्थी छन् । सबैभन्दा बढी रूपन्देहीको मर्चवारी गाउँपालिकामा एक शिक्षक बराबर १ सय ८७ विद्यार्थी छन् ।

Yamaha

शिक्षा नियमावलीले विद्यार्थी शिक्षक अनुपात हिमालमा ४०, पहाडमा ४५ र तराई तथा उपत्यकामा ५० हुनुपर्ने व्यवस्था गरेको छ । यसलाई घटाउँदै विद्यालय क्षेत्र विकास योजनाले विद्यार्थी–शिक्षक अनुपात हिमाली क्षेत्रमा ३०, पहाडी क्षेत्रमा ३५ र तराई तथा उपत्यकामा ४० रहनुपर्ने अवधारणा ल्याएको छ ।

तर, प्रदेश ५ मा भने यो अवधारणाअनुसार शिक्षक व्यवस्थापन भएका छैनन् । यसले गर्दा सामुदायिक विद्यालयको व्यवस्थापन र शैक्षिक गुणस्तर कायम गर्ने विषय चुनौतीपूर्ण बनेको सरोकारवालाको गुनासो छ ।

प्रदेश ५ जस्तै देशभरको दरबन्दी मिलानका लागि संघीय सरकारले महाश्रम शर्माको संयोजकत्वमा गठन गरेको दरबन्दी पुन: वितरण सुझाव कार्यदलले ७ वटै प्रदेशमा सुझाव संकलन थालेको छ । आइतबार बुटवलमा आयोजना गरेको सुझाव संकलन कार्यक्रममा सरोकारवालाले शैक्षिक गुणस्तरका लागि विद्यालयमा आएका विद्यार्थी संख्याका आधारमा मात्रै दरबन्दी मिलान गर्न नहुने सुझाव दिए ।

विद्यार्थी संख्या मात्रै होइन, विषय शिक्षक, प्राविधिक शिक्षक र मातृभाषा शिक्षकको पनि व्यवस्था हुने गरी विषय र कक्षा हेरेर दरबन्दी मिलान गर्न शिक्षक संघ रूपन्देहीका अध्यक्ष तथा शान्ति नमुना माविका प्रधानाध्यापक कुलप्रसाद लामिछानेले आग्रह गरे ।

कक्षा व्यवस्थापनका लागि एक कक्षामा ३० भन्दा बढी विद्यार्थी राख्नु नपर्ने वातावरण बनाउन सहभागीले सुझाव दिए । ‘कक्षा ३ सम्मका बालबालिकालाई त ३० जनाभन्दा बढी राखेर हेर्नै सकिँदैन,’ जनज्योति मावि कपिलवस्तुका प्रधानाध्यापक विष्णुप्रसाद भण्डारीले भने, ‘बरु ठूलो कक्षामा धेरै विद्यार्थी राख्ने गरी सानो कक्षामा विद्यार्थी घटाउनुपर्छ ।’

उच्च माध्यमिक तहका शिक्षक, प्राविधिकतर्फका प्रशिक्षकको व्यवस्थापन र धार्मिक वैकल्पिक प्रकृतिका विद्यालयमा शिक्षक व्यवस्थापनका लागि छुट्टै दरबन्दी सिर्जना गर्न उनले आग्रह गरे ।

Esewa Pasal

प्रकाशित : भाद्र १८, २०७५ ०९:२६
प्रतिक्रिया
पठाउनुहोस्
ADVERTISEMENT

श्रीलंकाका राष्ट्रपति लुम्बिनी आउनुपूर्व हतियार सहित दुई जना पक्राउ

अमृता अनमोल

बुटवल — श्रीलंकाका राष्ट्रपति मैत्रीपाला सिरिसेना लुम्बिनी भ्रमण आउनु पूर्व रुपन्देही प्रहरीले हतियार सहित दुई जनालाई पक्राउ गरेको छ।

पक्राउ पर्नेहरूमा कपिलवस्तु जिल्ला शुद्धोधन गाउँपालिका-५ का २० वर्षीय राजेन्द्र लोध र रुपन्देही जिल्ला गैडहवा गाउँपालिका-१ का २० वर्षीय सुनल कुमार यादव रहेका छन्। उनीहरूको साथबाट एक थान नलकटुवा पेस्तोल र एक थान चक्कु बरामद भएको छ । उनीहरूले प्रयोग लु ३९ प २९१९ नम्बर मोटरसाइकल समेत प्रहरीले नियन्त्रणमा लिएको छ।

दुई वटा मोटरसाइकलमा चार जनाको समूहमा कपिलवस्तुदेखि लुम्बिनी पुगेका मध्ये दुई जना पक्राउ परेका छन् भने दुई जना फरार रहेका छन्। कपिलवस्तुबाट लुम्बिनी आउने क्रममा उनीहरुलाई लुम्बिनी सांस्कृतिक नगरपालिका-६ लोखडिया चोकबाट शुक्रबार राति नियन्त्रणमा लिइएको प्रहरीले स्रोतले बतायो।

श्रीलंकाका राष्ट्रपति लुम्बिनी आउनु अघि उनीहरू किन र के कारण हतियार बोकेर लुम्बिनी आए भन्ने विषय प्रहरीले अनुसन्धान गरिरहेको जनाएको छ। प्रहरीका अनुसार फरार अन्य दुई जना खोजी जारी छ।

श्रीलंकामा सशस्त्र विद्रोही समूह लिबरेसन अफ तमिल टाइगर इलम (लिट्टे) को अस्तित्व श्रीलंकामा नरहेपनि तमिल सामुदायको सञ्जाल संसारभर रहेकोले श्रीलंकाका राष्ट्रपतिलाई तामिल समूहबाट सुरक्षा खतरा रहेको सुरक्षा निकायले विश्लेषण गरेको छ।

सोही अनुसार लुम्बिनीको सुरक्षा व्यवस्था कडा पारिएको छ। राष्ट्रपतिको लुम्बिनी भ्रमणको क्रममा उनको सुरक्षाको लागि देशको चारवटै सुरक्षा निकाय नेपाल प्रहरी, सशस्त्र प्रहरी, नेपाल सेना र राष्ट्रिय अनुसन्धान विभागलाई परिचालन गरिएको छ।

प्रकाशित : भाद्र १६, २०७५ १२:५९
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT