पर्यटकीय गन्तव्य बन्दै तकसेरा

हरि गौतम

रुकुमपूर्व — पुथाउत्तरगंगा गाउँपालिकाअन्तर्गत १० र ११ नम्बर वडामा रहेको तकसेरालाई पर्यटकीय गन्तव्य बनाइने भएको छ । ५ नम्बर प्रदेश सरकारले गन्तव्य बनाउने तयारी गरेको हो ।

रुकुमपूर्व पुथाउत्तरगंगा १० स्थित महेन्द्र माध्यमिक विद्यालय र तक गाउँ । तस्बिर : हरि

मगर समुदायको बाहुल्यता तथा मिलेको बस्तीलाई गन्तव्य बनाउने निर्णय गरिसकेको छ ।

तकसेरालाई पर्यटकीय गन्तव्य बनाउन चालु आर्थिक वर्षमा सरकारले बजेटसमेत विनियोजन गरेको छ । ‘तकसेरालाई पर्यटकीय गन्तव्य बनाउने तयारी स्वरूप चालु आर्थिक वर्षमा एक करोड बजेट विनियोजन गरिएको छ,’ प्रदेशसभा सदस्य तथा उक्त निर्वाचन क्षेत्रबाट निर्वाचित प्रदेशसभा सदस्य तेजबहादुर ओलीले भने, ‘त्यसका लागि अन्य आवश्यक तयारी पनि थालिसकिएको छ ।’

Yamaha

गन्तव्य बनाउन परियोजनाको विस्तृत अध्ययन प्रतिवेदनका साथै भौतिक पूर्वाधारका काम चालु आर्थिक वर्षमा सुरु गरिनेछन् । भौतिक योजना तथा पूर्वाधार मन्त्रालयले उक्त योजनाको कार्यान्वयन गर्ने छ ।

यसमा स्थानीय तह वडा तथा सर्वसाधारणलाई समेत सहभागी गराउने गरी निर्देशिका तयारी भइरहेको सांसद ओलीले बताए । उनका अनुसार चालु वर्षमा पर्यटकीय क्षेत्रको सम्भाव्यता अध्ययन, तकसेरा पुग्ने र तकसेराबाट बाहिर जाने पदमार्गको निर्माण, होमस्टेका लागि आधारभूत तालिम, होमस्टे स्थापना तथा सञ्चालन, तकसेरा र त्यस आसपासका पर्यटकी क्षेत्रको प्रचार प्रसार डकुमेन्टेसन र मर्मत सम्भारका काम पनि यसै वर्षमा हुनेछन् ।

सार्वजनिक शौचालय निर्माण, मगर समुदायको जातीय वेशभूषा, चालचलन, खानपानलगायत समेटिएको संग्राहलय स्थापना पनि चालु वर्षमै गर्ने तयारी छ ।

पहिल्यै हेर्नलायक मिलेको गाउँ रहेको तकसेरालाई पर्यटकीय गन्तव्यको रूपमा विकास गरेर समग्र जिल्लाको पर्यटकीय प्रचार प्रसारका साथै पर्यटन मार्फत नै विकास गर्न सकिने सम्भावना रहेको सांसद ओलीले बताए ।

‘नमूना पर्यटकीय गन्तव्य बनाउने उद्देश्यसहित प्रदेश सरकारले चालु वर्षमा बजेट विनियोजन गरेको हो, यसबाट तकसेरा मात्रै नभएर समग्र जिल्लालाई नै पर्यटकीय गन्तव्य बनाउन टेवा पुग्ने गरी काम गर्ने योजना छ,’ ओलीले भने । प्रदेश सरकारबाट तकसेरालाई पर्यटकीय गन्तव्य बनाउने गरी बजेट विनियोजन भएपछि स्थानीय पनि खुसी भएका छन् ।

प्रकाशित : भाद्र २०, २०७५ ०९:१९
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

चिकित्सक नहुँदा उपचार प्रभावित

अमृता अनमोल

बुटवल — दैनिक बिरामीको चाप हुने यहाँस्थित सरकारी लुम्बिनी अस्पतालमा दरबन्दीअनुसारका चिकित्सक छैनन् ।

९७ चिकित्सकको दरबन्दी भएकोमा अहिले ३७ जना कार्यरत छन् । यसले उपचार सेवा पनि चुस्त छैन ।

टाढाबाट आएका बिरामी उपचारका लागि पालो कुर्न बाध्य छन् । यसले निजी अस्पतालमा महँगो सेवा लिन बाध्य छन् । गत भदौं १२ गते अर्घाखाँचीको छत्रदेवकी मीना खत्री प्रसूति समस्या लिएर आइन् । शल्यक्रियाका लागि पालो नपाएपछि सिद्धार्थ बाल तथा महिला अस्पताल आम्दामा पुगिन । नि:शुल्क प्रसूति सेवाका लागि झन्डै ५६ हजार खर्च भएको बताइन् ।

अस्पतालमा ५० विशेषज्ञ र ४७ जना मेडिकल अधिकृतको दरबन्दी छ । अहिले १५ विशेषज्ञ र ४२ जना मेडिकल अधिकृतको दरबन्दी रिक्त छ । दरबन्दीका चिकित्सक पनि काजमा गएका छन । अस्पताल विकास समितिले १७ मेडिकल अधिकृत नियुक्त गरेको छ । त्यसमध्ये ५ जना छैनन् ।

यसबाहेक डेन्टल सर्जन, नाक कान घाँटीलगायतका २/२ जनाको दरबन्दी रिक्त छ । अस्पतालका सूचना अधिकृत लक्ष्मीराज रेग्मीले दरबन्दी अनुसारका चिकित्सक पठाउन पटक–पटक आग्रह गरे पनि बेवास्ता भएको बताए । ‘बिरामीको चापअनुसार चिकित्सक छैनन्,’ उनले भने, ‘सेवा प्रभावित छ ।’

अस्पतालमा १५ विभागको विशेषज्ञ उपचार गर्नुपर्ने कार्यादेश छ । त्यसमध्ये १० मात्रै चलेका छन् । न्युरो, ग्यास्ट्रो इन्टेरोलोजी, नसा तथा स्नायु रोग उपचार सेवा न्युरोलोजी, नेफ्रोलोजी र युरो सर्जरी सञ्चालनमा छैनन् ।

मेडिकल सुपरिन्टेन्डेन्ट कृष्ण खनालले दरबन्दीअनुसार चिकित्सक नहुँदा अत्यावश्यक मानिएका उपचार सेवा सुरु गर्न नसकेको बताए । ‘विशेषज्ञकै अभाव छ । मेडिकल अधिकृतको त खडेरी छ,’ उनले भने, ‘पूर्वाधार अभावले नयाँ सेवा सुरु गर्न सकेका छैनौं ।’

यहाँ भएका चिकित्सकले पनि पूरै समय अस्पतालमा बिताउँदैनन् । निजी क्लिनिकमा व्यस्त हुन्छन् । समयमा विशेषज्ञ सेवा नपाउँदा २ वर्षयता अस्पतालमा प्रसूतिका ८ सहित १५ बिरामीले ज्यान गुमाएका छन् ।

अस्पतालले चिकित्सक हतार र थकानमा हुने भए पनि लापरबाही नभएको दाबी गरेको छ । यो अस्पताल विसं १९६७ सालमा ६ बेडबाट सुरु भएको हो । लामो समय १ सय बेडसहित अञ्चल अस्पतालका रूपमा थियो । २०७३ जेठ ७ मा स्तरोन्नति गरी उपक्षेत्रीय अस्पताल बनाइएको थियो । यससँगै ३ सय बेडको स्वीकृति मिलेको थियो । विकास समितिले थप १ सय बेड सञ्चालन गर्नुपर्ने प्रावधान छ । अहिले २ सय १० वटा बेड मात्रै राखिएको छ । दुई वर्षअघि चिकित्सक परिचालन निर्देशिकाबाट केही विशेषज्ञ ल्याइएको थियो ।

प्रदेश सरकारलाई समेत दरबन्दी मिलानलाई प्राथमिकतामा राख्न आग्रह गरिएको छ । अस्पतालमा भएको जनशक्ति र भौतिक दुवै समस्याबारेको विवरण प्रदेश सरकारलाई बुझाइएको छ ।

त्यसमा विकास समिति मार्फत राखिने चिकित्सकका लागि अख्तियारी पठाउन समेत आग्रह गरेको छ । प्रदेशका सामाजिक विकास मन्त्री सुदर्शन बरालले भने तत्काल प्रदेश सरकाले अस्पतालमा चिकित्सकको दरबन्दी पूरा गर्न नसक्ने बताए ।

प्रकाशित : भाद्र २०, २०७५ ०९:१७
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT