रामग्रामले घटायो कर

नवीन पौडेल

परासी — असार मसान्तपछि करको दायरा बढेको भन्दै स्थानीयले विरोध गरेपछि पश्चिम नवलपरासीको रामग्राम नगरपालिका कर घटाउन बाध्य भएको छ ।

आन्तरिक आय वृद्धि गर्ने भन्दै नगर कार्यपालिकाले एक सयदेखि चार सय प्रतिशतसम्म सेवा शुल्क वृद्धि गरेको थियो । स्थानीयको चर्को विरोधपछि सोमबार बसेको नगर कार्यपालिका बैठकले करको दर घटाउने निर्णय गरेको नगरप्रमुख नरेन्द्रकुमार गुप्ताले बताए ।

नगरपालिकाले एकीकृत सम्पत्ति कर, व्यावसायिक कर र विभिन्न सेवाबापतको सिफारिस शुल्क कम गर्न लागेको बताइएको छ । ‘नगर कार्यपालिकाको निर्णयअनुसार यस आर्थिक वर्षदेखि करको दायरा र सेवाशुल्कमा केही वृद्धि गरेका थियौं,’ नगर प्रमुख गुप्ताले भने, ‘नगरवासीको आग्रहमा केही प्रतिशत कर घटाउने र दायराको विषयमा पुनरावलोकन गर्ने निष्कर्षमा पुगेका छाैं ।’

Yamaha

‘जग्गा भएको भरमा नै नियमित आम्दानी नहुनेहरूका लागि चर्को कर तिर्न असहज भएको थियो,’ स्थानीय गुरुदत्त उपाध्यायले भने, ‘कर घटाउने निर्णयले हामीलाई केही राहतको महसुस भएको छ ।’

व्यावसायिक करबारे कार्यपालिका बैठकबाटै आवश्यक निर्णय गर्न सकिने भएकाले प्रक्रिया पूरा गरी केही दिनमै कम गरिने भएको छ भने सम्पत्ति करसहित सिफारिस दस्तुर असोज मसान्तमा हुने चौथो नगरसभाबाट पारित गरेर नयाँ दर कायम गरिनेछ ।

नगरभित्र सम्पत्ति करअन्तर्गत हाल १० लाखसम्मको सम्पत्तिमा २ सय, १० लाखदेखि ५० लाखसम्म एक हजार, ५० लाखदेखि १ करोडसम्म ३ हजार रुपैयाँ कर लिने गरिएको छ । एकीकृत सम्पत्ति कर रामग्राम नगरपालिकामा ०५६ सालबाट लागू भएकामा चालु आर्थिक वर्षको साउनबाट ती कर केही परिमार्जित र सम्पत्ति मूल्यांकनअनुसार करको दर केही थप भएर लागू भएको थियो ।

रामग्राम नगरपालिकाले विभिन्न सिफारिस नि:शुल्क गरेको छ । व्यक्तिगत घटना दर्ताअन्तर्गत जन्मदर्ता, मृत्युदर्ता, बसाइँसराइ, विवाहदर्ता, सम्बन्धविच्छेदलगायत घटना ३५ दिनभित्र दर्ता नगराए एक सय रुपैयाँ जरिवाना लाग्ने भएको छ । बिरामी सिफारिस, आगलागी तथा भूकम्पपीडित, बाढीपीडित, न्यायिक समितिका सिफारिस, स्वास्थ्य, कृषि तथा भेटेरिनरी, महिला तथा बालबालिकालगायत शाखाबाट दिइने विषयगत सिफारिस नि:शुल्क गरेको छ ।

नगरवासी र क्रियाशील राजनीतिक दलको दबाबपछि नगरपालिका कर पुनरावलोकन गर्ने निर्णयमा पुगेको हो । कर वृद्धिको विरोधमा समानान्तर नगरकार्यपालिका गठन गरेर विभिन्न राजनीतिक दल र सर्वसाधारण विरोधमा उत्रिएका थिए ।

प्रकाशित : भाद्र २१, २०७५ ०९:१८
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

बाबा बर्दगोरिया क्षेत्र नयाँ रूपमा

नवीन पौडेल

परासी — पश्चिम नवलपरासीको सुनवल नगरपालिका जर्गाहास्थित ऐतिहासिक बाबा बर्दगोरिया क्षेत्र संरक्षणमा स्थानीय जुटेका छन् । पुराना संरचना जीर्ण भएपछि यसको विकास र संरक्षणमा स्थानीय जुटेका हुन् ।

पश्चिम नवलपरासीको सुनवलमा रहेको ऐतिहासिक बाबा बर्दगोरिया धाम । तस्बिर : नवीन

पूर्व–पश्चिम राजमार्गदेखि चार किलोमिटर उत्तरमा अवस्थित यस धार्मिक क्षेत्रको विकासमा नगरपालिका र स्थानीयको संयुक्त प्रयासमा जीर्ण रहेका संरचना र मूर्तिको संरक्षण सुरु गरिएको छ । बगैंचा र मनोरम वातावरण रहेको यस क्षेत्रलाई धार्मिक पर्यटकीय क्षेत्रका रूपमा विकास गर्न सकिने सम्भावना भए पनि अतिक्रमणको चपेटामा परेको छ ।

मन्दिर परिसरमा अहिले धमाधम पुरातात्त्विक महत्त्वका वस्तु फेला परेका छन् । भौतिक संरचनाका लागि जमिन खन्दा मूर्ति, पुराना इँटा र विभिन्न पुरातात्त्विक सामान भेटिएको स्थानीय उपेन्द्र प्रधानले बताए । मन्दिर नजिकैबाट बग्ने पानभार खोलाले कटान गरेको क्षेत्रमा विभिन्न प्रकारका पुरातात्त्विक वस्तु फेला परेका छन् ।

पुरातात्त्विक वस्तु फेला परे पनि त्यसको संरक्षण र व्यवस्थित उत्खनन हुन नसक्दा ती वस्तु नष्ट भइरहेको स्थानीय बताउँछन् । बुद्धकालमा यस क्षेत्रमा राजा राजारामको राज्य क्षेत्र रहेकाले यहाँ फेला परेका वस्तु त्यही समयका हुन सक्ने अनुमान गरिएको छ । स्थानीयले मन्दिर क्षेत्रलाई धार्मिक पार्क र मन्दिरको जीर्णोद्धार गर्न माग गरेपछि नगरपालिकाको पहलमा भौतिक संरचना निर्माण भइरहेको छ ।

मन्दिर क्षेत्रमा माटाका भाँडा, विभिन्न प्रकारका मूर्ति, इनार, ताम्रपत्रलगायत फेला परेका छन् । तत्काललाई व्यवस्थित गरेर पुरातात्त्विक स्थानहरूको सूचीमा सूचीकृत गर्न र थप उत्खनन गर्न नगरपालिकाले पुरातत्त्व विभागसँग आग्रह गरेपछि स्थानीय खुसी भएका छन् । ०५४ सालमा मन्दिरको ढिकमा फेला परेको एक ताम्रपत्रमा विभिन्न प्रकारका प्राचीन लिपि पाइएको थियो । मन्दिरलाई खोलाको कटानले बर्सेनि बगरमा परिणत गर्न थालेपछि तटबन्धको व्यवस्था गरिएको छ ।

मन्दिर परिसरको पीपलको ठूलो रूखको फेदमा रहेको मूर्तिमा भक्तजनले पूजा गर्ने गर्छन् । साउन महिना, दसैं र माघी पर्वका अवसरमा यहाँ मेला लाग्ने गर्छ । मन्दिरमा भाकलका लागि नेपालका विभिन्न ठाउँ र भारतबाट भक्तजन आउने गर्छन् । सुनवल नगरपालिकाका मेयर भीमबहादुर थापाले ऐतिहासिक मन्दिर भएकाले यसको तत्काल उत्खनन गरेर सोही अनुरूपको मन्दिर निर्माण गरिने बताए ।

सुनवल क्षेत्रमा बिदाको दिन घुम्ने र ज्येष्ठ नागरिकका लागि विश्राम क्षेत्रको सख्त अभाव छ । ‘यस मन्दिरलाई व्यवस्थित गरेर धार्मिक पार्कका रूपमा विकास गर्ने लक्ष्य राखिएको छ,’ मेयर थापाले भने, ‘पुरातत्त्व विभागलाई पनि मन्दिरलाई प्राथमिकतामा राखेर काम गर्न पत्राचार गरिसकेका छौं ।’ धामको प्रचारका लागि बाबा बर्दगोरिया धाम परिसरमा धार्मिक महोत्सव आयोजना गरिएको छ । धामको प्रचारप्रसारका लागि भदौ २१ देखि २७ गतेसम्म धार्मिक महोत्सव गर्न लागिएको मेला आयोजक समितिका प्रवक्ता उपेन्द्र प्रधानले बताए ।

बाबा वर्दगोरिया धाम विकास संस्थाको आयोजना र सुनवल नगरपालिकाको सहआयोजनामा महोत्सव आयोजना गरिएको हो । महोत्सवमा बुद्ध सर्किटलाई जोडदै लुम्बिनी, देवदह, रामग्राम, त्रिवेणीधाम हुँदै बाबा बर्दगोरियालाई पनि बुद्ध सर्किटमै जोडी धार्मिक तथा पर्यटकीय क्षेत्र विस्तार गर्ने, वैदिक सनातन धर्म, संस्कृति, परम्परा र सभ्यताको संरक्षण गर्न महोत्सव आयोजना गरिएको बाबा बर्दगोरिया धाम विकास संस्थाका अध्यक्ष नारायणप्रसाद तिवारीले बताए ।

१ सय ५० भन्दा बढी स्टल रहने मेलामा श्रीमद्भागवत् सप्ताह महायज्ञ एवं तीज महात्म्य, महिला र पुरुष दुवैको कुस्ती प्रदर्शन, तीज गीत प्रतियोगिता, राष्ट्रिय कलाकारबाट सांस्कृतिक कार्यक्रम, भजन कीर्तन र साहित्यिक कार्यक्रम आयोजना गरिने भएको छ ।

प्रकाशित : भाद्र २०, २०७५ ०७:२२
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT