स्वास्थ्य केन्द्र चिकित्सकविहीन

कमल पन्थी

बर्दिया — राजापुर २ दौलतपुरकी अमृता थारू ज्वरो आएपछि स्थानीय स्वास्थ्य केन्द्रमा पुगिन् । चिकित्सक नभेटिएपछि कैलालीको टीकापुरतर्फ लागिन् ।

स्वास्थ्य केन्द्रमा तीनजना चिकित्सकको दरबन्दी छ । अहिले एक जना पनि उपलब्ध नभएपछि उनी छिमेकी जिल्ला जानु परेको हो ।

उनी एक उदाहरण मात्र हुन् । कर्णाली नदीले घेरिएको राजापुर नगरपालिका र गेरुवा गाउँपालिकाका अधिकांश बिरामी चिकित्सक नहुँदा कैलालीको टीकापुर र बाँकेको नेपालगन्जका अस्पताल जान बाध्य छन् । स्वास्थ्य केन्द्र प्रमुख रूपेश बड गत वैशाखमा एमडी अध्ययनका लागि काठमाडौं गएका छन् ।

Yamaha

करार सेवाका चिकित्सकद्वय प्रदीप रेग्मी र सन्दीप भण्डारीको एक महिनाअघि सरुवा भयो । त्यसपछि यहाँको स्वास्थ्य केन्द्रमा चिकित्सकको अभाव सुरु भएको स्वास्थ्य सहायक शेष जिआउल हकले बताए ।

बहिरंग (ओपीडी) सेवामा दैनिक झन्डै १ सय ८० बिरामी आउने गरेको यहाँको स्वास्थ्य केन्द्रमा तीन जनाले सामान्य उपचार सेवा दिइरहेका छन् । जिल्लाको दुर्गम केन्द्रमा स्टाफ नर्स एक र अनमी दुईजना कार्यरत छन् ।

चिकित्सकविहीन अस्पतालमा शव परीक्षणसमेत हुँदैन । शव परीक्षणका लागि करिब ४० किलोमिटर टाढा सदरमुकाम गुलरियास्थित जिल्ला अस्पताल पुग्नुपर्ने बाध्यता छ । चिकित्सकको अभावमा थारू समुदायमा देखिएको सिकलसेलको उपचारसमेत प्रभावित भएको छ ।

जिल्लामै अभाव
जिल्ला अस्पताल ५० शय्याको छ । यहाँ पनि विशेषज्ञ चिकित्सक छैनन् । १० जना विशेषज्ञ चिकित्सकको दरबन्दी भए पनि अहिले एक जनाले मात्र सेवा दिइरहेका छन् ।

जिल्ला अस्पतालका मेडिकल सुपरिन्टेन्डेन्ट (मेसु) सुभास पाण्डेयका अनुसार बाल, स्त्री, हड्डी, हातखुट्टा, नसा, मानसिक, नाक, कान, घाँटीलगायत विशेषज्ञ चिकित्सकको अभाव छ । पटक–पटक माग गरे पनि केन्द्रले विशेषज्ञ चिकित्सकको व्यवस्था गर्न नसकेको उनले बताए । एघारौं तहका मेसुको दरबन्दी भए पनि नवौं तहकाले अस्पताल सम्हालेका छन् ।

निम साइमन इन्स्टिच्युटबाट एक महिलासहित सरकारी स्तरमा करारका एक विशेषज्ञ चिकित्सक जिल्ला अस्पतालमा कार्यरत छन् । १५ जनाको दरबन्दी रहेको मेडिकल अधिकृतमा आठ जना कार्यरत छन् । विगत दुई वर्षयता जनशक्ति बढे पनि दक्ष चिकित्सकको अभाव भने खट्किएको मेसु पाण्डेयले बताए ।

अस्पतालमा भौतिक संरचना थपिँदै सुधार हुँदै गए पनि आईसीयू कक्ष नहुँदा बिरामी प्रभावित हुने गरेका छन् । पर्चा, ल्याब, एक्सरे, शल्यक्रियालगायत शुल्कबाट अस्पतालले दैनिक ५० हजार रुपैयाँभन्दा बढी आम्दानी गरिरहेको छ । अस्पतालमा २४ सै घण्टा फार्मेसी र ल्याब सेवा सञ्चालनमा रहे पनि वार्डहरूको पूर्वाधारको कमी रहेको चिकित्सकले बताए।

Esewa Pasal

प्रकाशित : भाद्र २१, २०७५ ०९:२०
प्रतिक्रिया
पठाउनुहोस्
ADVERTISEMENT
ADVERTISEMENT

इन्दिरा हत्या प्रकरण: ७ वर्षसम्म घटना रहस्यमै

कमल पन्थी

बर्दिया — ०६८ भदौ ११ गते बर्दिया बढैयाताल गाउँपालिका ५ मा तत्कालीन एमाले जिल्ला कमिटी सदस्य एवं महिला नेतृ इन्दिरा भुसालको हत्या भयो । भुसालको हत्या भएको एक साता नबित्दै सोही ठाउँकी रामकली सुनार पनि मारिइन् ।

अहिलेसम्म प्रहरी अनुसन्धानले दुई महिलाका हत्यारा पत्ता लगाउन सकेको छैन । प्रदेश र जिल्लामा सरुवा भई आउने प्रहरी अधिकारीले अभियुक्त पक्राउ गरिछाड्ने आश्वासन बाँड्ने गरे पनि अहिलेसम्म हत्यारा पत्ता नलागेको पीडित परिवारको गुनासो छ ।

प्रहरीले अपराधी पक्रन नसकेको भन्दै आलोचना बढेपछि तत्कालीन प्रहरी नायब महानिरीक्षक (डीआईजी) केशवप्रसाद अधिकारीले प्रहरी कार्यालयबाट सबै मिसिल झिकाएर अनुसन्धान सुरु गरेका थिए । यसअघिका डीआईजीले समेत घटनाबारे छानबिन गर्न प्रहरी प्रशासनलाई निर्देशन दिए पनि अनुसन्धान अहिलेसम्म अधुरै छ ।

चार/पाँच जनाको अज्ञात समूहले भुसालको घरमै राति करिब नौ बजे हत्या गरेका थिए । एक सातापछि सुनारको बाँसगढी–मैनापोखरस्थित जंगलमा घाँटी रेटेर हत्या गरिएको थियो । दुवै हत्याका अभियोगी हालसम्म फेला परेका छैनन् । सुनारको हत्या भुसालसँगै जोडिएको आशंका प्रहरीले गर्दै आएको छ ।

भुसालको हत्यालगत्तै केन्द्रीय अनुसन्धान ब्युरोका प्रहरी नायब उपरीक्षक विमल श्रेष्ठको संयोजकत्वमा छानबिन टोलीले अनुन्धान सुरु गरेको थियो । अनुसन्धान भइरहेकै बेला सुनारको हत्या भयो ।

घटना रहस्यमय भन्दा पनि तत्कालीन प्रहरी प्रमुखको अनुसन्धान प्रक्रिया नै अधुरो भएकाले यसलाई पुन: छानबिन गर्नुपर्ने बढैयाताल ७ का वडाध्यक्ष एवं तत्कालीन एमाले जिल्ला सदस्य इन्द्र लुइँटेलले बताए । ‘सुरुको अनुसन्धान नै फितलो भयो,’ उनले भने, ‘अहिलेसम्म हत्यारा पत्ता नलाग्नु दुर्भाग्यपूर्ण हो ।’

प्रदेश ५ का डीआईजी शेरबहादुर बस्नेतले भुसाल र सुनार हत्याकाण्ड पुन: नयाँ शिराबाट अनुसन्धान गर्न थालिएको बताए । ‘बाँके, दाङलगायत जिल्लामा विगतमा भएका हत्या घटनाका पुराना फायल खोल्दै छौं,’ उनले भने, ‘अपराधी उम्कन नसक्ने गरी अनुसन्धान हुन्छ ।’ भुसालका भाइ पुष्पले दिदीका हत्यारा पक्रनेलाई २० लाख रुपैयाँ नगद दिने घोषणा पनि गरिसकेका छन् ।

करिब ६ वर्षअघि ठाकुरबाबा नगरपालिकास्थित बलाती सामुदायिक वनमा एक महिलाको हत्या गरी खाडलमा पुरेर फरार अभियुक्तलाई प्रहरीले एक वर्षअघि दैलेखबाट पक्राउ गरेको थियो ।

सोलुखुम्बु घर भई काठमाडौंस्थित सीतापाइलामा डेरा गरी बस्ने ३७ वर्षीया भारती राईलाई बर्दियाको जंगलमा ल्याएर हत्या गरिएको थियो । प्रहरीले त्यही हत्या अभियोगमा दैलेख नाउले कटुवाल ४ का सशस्त्र प्रहरीका पूर्वहबल्दार रवीन्द्रबहादुर थापालाई घरैबाट पक्राउ गरेको हो ।

प्रकाशित : भाद्र १९, २०७५ १०:२७
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT