भूतखोलामा भासियो सडक

राजमार्गको कम्तीमा ८० मिटर भासिएकाले यातायातका साधन सञ्चालनमा समस्या
माधव अर्याल

दोभान (पाल्पा) — जिल्लाको तिनाउ गाउँपालिका ३ भूतखोलानजिक सिद्धार्थ राजमार्ग भासिएपछि एकतर्फी गाडी सञ्चालन भइरहेका छन् । गत वर्ष केही भाग भासिएको थियो ।

सिद्धार्थ राजमार्गअन्तर्गत पाल्पाको तिनाउ ३ भूतखोलानजिकै भासिएको सडकमा सवारीसाधन । तस्बिर : माधव

यस वर्षको बर्खामा झन्डै दुई मिटर गहिरो भत्किएको छ । कम्तीमा ८० मिटर लम्बाइमा राजमार्ग भासिएकाले यातायातका साधन सञ्चालनमा समस्या भएको स्थानीय सडक डिभिजन कार्यालयका लेन्थवर्कर सुपरभाइजर जंगबहादुर सुनारले बताए ।

सडकबाट ठाडो भाग सडक दुई मिटर तल बगेको छ । ‘यस वर्षको बर्खामा सडक बढी भासिँदै गएको थियो,’ उनले भने, ‘सडकको ५० मिटरमाथिबाट तिनाउ खोलासम्म बगेको छ ।’

Yamaha

उनका अनुसार दुई घरलाई पूर्ण रूपमा क्षति पुगेको छ । नजिकै सञ्चालन भएको भूतखोला होटललाई पनि क्षति पुगेको छ । माथिल्लो भागमा समेत घर छन् । तल्लो भागमा भने तिनाउ खोला पर्छ ।

दुई साताअघि यही स्थानमा सडक भासिएपछि केही समय सवारी साधन अवरुद्ध भएका थिए । ‘एक मिटरजति उचाइमा ग्राभेल राखेपछि मात्र एकतर्फी यातायात सञ्चालन गर्न सकिएको हो,’ सडक डिभिजनका प्राविधिक सन्तोष कार्कीले भने, ‘नभए सवारी साधन सञ्चालनमै समस्या हुने गरी सडक भासिएको थियो ।’

अहिले पनि विस्तारै सडक भासिँदै गएको छ । एक महिनाअघि एक मिटर मात्र भासिएको थियो । अहिले झन् बढी भासिँदै झन्डै दुई मिटर भासिइसकेको उनले बताए । सडकको भित्रभित्र पानी बगेको छ । माथिल्लो भागमा पानी रसाएकाले झन् समस्या भएको छ । पानीको मूलका कारण पनि यसको दीर्घकालीन समस्या समाधानमा असर गर्ने प्राविधिकहरू बताउँछन् ।

‘पहिले पनि पानी निकासका लागि भित्रै पाइप राखेको भेटिएको छ,’ उनले भने, ‘अहिले पनि पानीकै कारण जमिन भासिँदै गएको छ । बुटवल, भैरहवा, सुनौलीबाट गुल्मी, पाल्पा, स्याङ्जा, कास्की, अर्घाखाँची, बागलुङ, पर्वत, म्याग्दी, मुस्ताङसम्मका सवारी साधन यही बाटो भएर गुड्छन् ।

सडकमा दैनिक पाँच हजारभन्दा बढी सवारी साधन गुड्छन् । पहाडी भेगमा जाने मालवाहक ट्रक र असोज लागेपछि चुनढुंगा बोक्ने ट्रिपर गुड्ने भएकाले झन् समस्या आउने उनले बताए ।

सडक भासिँदा यस भेगका यात्रु र सवारी साधन त्रासमा यात्रा गर्न बाध्य छन् । ‘साना सवारी साधनलाई भासिएको सडकमा झनै अप्ठ्यारो हुन्छ,’ मोटरसाइकल चालक विष्णु पाण्डेयले भने, ‘हामी जहिले पनि त्रासको यात्रा गर्न बाध्य छौं ।’ राजमार्ग विस्तारै भासिँदै गएको छ ।

तर, माथिल्लो भागमा एक मिटरजति जमिन छाडिसकेकाले अझै खतरा बढेको उनले बताए । तल्लो भागबाट आएका सवारी साधनले माथिल्लो भागबाट आउनेलाई देख्न मुस्किल छ । कतिपय अवस्थामा यहाँ घण्टौं सवारी साधन जाम हुने समस्यासमेत बढेको उनले बताए ।

अहिले सवारी साधन अगाडि जान नसक्ने भएपछि आलोपालो गर्दै आउजाउ गरेका छन् । यहाँ अघिल्लो वर्ष समस्या देखिएपछि डिभिजन सडक कार्यालयले मर्मतका लागि ठेक्का लगाएको थियो । अघिल्लो आर्थिक वर्षमा लगाएको ठेक्का गत वैशाखमा सम्झौता भएर ग्याभिन वाल लगाउन सुरु गरेको छ ।

सडक डिभिजनका इन्जिनियर पवित्रमणि आचार्यका अनुसार ठेक्का लगाएपछि तिनाउखोलाको किनारमा ग्याभिन वाल लगाएको बताए । ‘अघिल्लो वर्ष कटान गरेको भए सडक चौडा भइसक्थ्यो,’ उनले भने, ‘स्थानीय जग्गावालाले तल्लो भागमा पर्खाल नलगाइकन कटान गर्न नदिँदा ढिलाइ भएको हो ।’

प्रकाशित : भाद्र २२, २०७५ १०:१७
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

बलात्कारविरुद्ध कडा कानुन माग्दै हस्ताक्षर

कान्तिपुर संवाददाता

बुटवल — बलात्कारविरुद्ध कडा कानुन बनाउन माग गर्दै बिहीबार यहाँ हस्ताक्षर संकलन गरिएको छ ।

सञ्चारिका समूह लुम्बिनीले फितलो कानुनी प्रक्रियाका कारण यस्ता घटना बढ्दै गएकाले रोक्न कडा कानुन र सहज कानुनी प्रक्रियाको माग गरेको हो । बलात्कार तथा यौन हिंसाका घटनामा राखिएको हदम्याद हटाउनुपर्ने र आरोपीलाई आजीवन कारावास व्यवस्था गर्नुपर्ने उनीहरूको माग छ ।

यस्ता घटनामा द्रुत अदालती प्रक्रिया र शून्य सहनशीलता अपनाउने भनिए पनि त्यसो हुन नसकेको भन्दै यसलाई व्यवहारमा पालना गर्न माग गरे । ‘घरमा आफन्तबाट छोरीचेली र विद्यालयमा शिक्षकबाट छात्रा बलात्कृत भएका छन्,’ सञ्चारिका समूह लुम्बिनीकी उपाध्यक्ष निरू गौतमले भनिन्, ‘यो असुरक्षा हटाउन कडा कानुन आवश्य छ ।’ पुष्पलाल पार्कमा हस्ताक्षर संकलन गरिएको थियो । एक हजारभन्दा बढीले हस्ताक्षरमार्फत समर्थन जनाएका थिए ।

रेडियो मुक्तिकी स्टेसन म्यानेजर कल्पना तिवारीले धेरै घटना मादकपदार्थको सेवन गरेका र अश्लील भिडियोले उत्तेजित भएपछि हुने गरेको बताउने भएकाले यसमा प्रतिबन्ध लगाउन आग्रह गरिन् । यौन विचलन र यौन कुण्ठाले बलात्कार बढेको बताउँदै सहभागीले यस्तो कुण्ठा र विचलन हटाउन सरकारी तबरबाटै काम गर्न आग्रह गरे ।

बलात्कारविरुद्धको अभियानमा पुरुषहरू सहभागी भए अझ प्रभावकारी हुने उनीहरूको जिकिर थियो । पत्रकार महासंघका अध्यक्ष यानेन्द्र जीसीले आफन्त, नातेदार र शिक्षकबाट हुने बलात्कारका घटनाले पुरुषलाई कलंकित बनाएको बताए ।

संकलन गरिएका हस्ताक्षर मुख्यमन्त्री शंकर पोखरेलमार्फत प्रधानमन्त्रीसमक्ष पुर्‍याइने उपाध्यक्ष गौतमले बताइन् ।

प्रकाशित : भाद्र २२, २०७५ १०:१५
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT