रुपन्देहीमा युवतीको अर्धनग्न अवस्थामा शव फेला
बुटवल — रुपन्देहीको सूर्यपुरा पुलमा एक युवतीको अर्धनग्न अवस्थामा शव फेला परेको छ । शुद्धोधन गाउँपालिका–७ दानव नदी छेउमा सोमबार बिहान करिब २२ वर्षीया युवतीको शव फेला परेको हो ।
गाई चराउन गएका स्थानीयले शव देखेर प्रहरीलाई खबर गरेका थिए । स्थानीयको खबरपछि इलाका प्रहरी कार्यालय छपिया र जिल्ला प्रहरी कार्यालयको टोली घटनास्थल गएको थियो ।
युवतीको घाटीमा निलडाम छ । प्रहरीले शव नजिकै महिला र पुरुषका चप्पल फेला पारेको छ ।
युवतीको बलात्कार पछि हत्या गरेको स्थानीयको दाबी छ । हत्या कारण बारे अनुसन्धान भइरहेको प्रहरीले जनाएको छ ।
रुपन्देहीका प्रहरी प्रवक्ता प्रहरी नायब उपरीक्षक कुमोद ढुंगानाले घटनास्थलको अध्ययन र शवको परीक्षणपछि कारण पत्ता लाग्ने बताए । शव अहिले पोष्टमार्टमका लागि भैरहवाको भीम अस्पताल ल्याइएको छ । युवतीको पहिचान समेत नखुलेको प्रहरीले जनाएको छ ।
प्रकाशित : भाद्र २५, २०७५ १३:३२