नेपालगन्जमा विद्युतीय बस

ठाकुरसिंह थारू

नेपालगन्ज — नेपालगन्ज– कोहलपुर सडक खण्डमा विद्युतीय बस सञ्चालनका लागि गृहकार्य सुरु भएको छ । प्रदेश सरकारले चालु वर्षमा यस्ता बस सञ्चालन गर्ने अवधारणा ल्याएको हो ।

प्रदूषण कम गर्न छोटो दूरीका लागि परियोजना ल्याइएको हो । त्यसका लागि कार्यविधि तयार हुँदैछ । साथै, साझा यातायातसँग सहकार्यका लागि छलफल पनि भइरहेको छ ।

नेपालगन्ज–कोहलपुरको दूरी १६ किलोमिटर छ । हालसम्म डिजेल र पेट्रोलबाट चल्ने सवारी साधन मात्र सञ्चालनमा छन् । उक्त परियोजना कार्यान्वयनमा आए प्रदूषणमा कमी आउने विश्वास गरिएको छ । ‘विद्युतीय बस सञ्चालनका लागि विभिन्न पक्षसँग छलफल भइरहेको छ । त्यस्तै कार्ययोजना तयार हुँदैछ,’ प्रदेशका उद्योग, वन, वातावरण तथा पर्यटन मन्त्रालयका उपसचिव शरदबाबु पंगेनीले भने, ‘उक्त परियोजना कार्यान्वयनका लागि प्रक्रिया अगाडि बढिसकेको छ ।’

Yamaha

विद्युतीय बस सञ्चालनका लागि प्रदेश सरकारले ५ करोड रुपैयाँ विनियोजन गरेको छ । उक्त परियोजनाअन्तर्गत नेपालगन्ज–कोहलपुर, तुल्सीपुर–घोराही र बुटवल–भैरहवासम्मका लागि विद्युतीय बस संचालन गरिनेछ । कार्ययोजना तयारीसँगै विशेषज्ञसँग परामर्श सुरु गरिएको छ । छोटो दूरीमा परियोजना सफल भए थप स्थानमा पनि विद्युतीय बस सञ्चालन गर्ने मन्त्रालयले जनाएको छ ।

बढदो सवारी साधनका कारण वातावरणमा प्रतिकूल असर परिरहेको भन्दै वैकल्पिक ऊर्जाको प्रयोग हुन थालेको छ । त्यसो त बाँकेमा पाँच हजारभन्दा बढी विद्युतीय अटो रिक्सा सञ्चालनमा छन् । ती रिक्सा नेपालगन्ज, कोहलपुरलगायतका क्षेत्रमा सञ्चालित छन् । गाउँगाउँमा पनि अटो रिक्सा सञ्चालनमा छन् ।

‘वातावरणमैत्री विद्युतीय बस सञ्चालन गर्ने महत्त्वाकांक्षी योजना हो । यसको सफल कार्यान्वयनका लागि प्रदेश सरकार लागेको छ,’ उपसचिव पंगेनीले भने, ‘कार्ययोजनालगायतका प्रारम्भिक काम सकिएपछि बस सञ्चालनका लागि थप काम अगाडि बढाइनेछ ।’ उनका अनुसार चालु आर्थिक वर्षभित्रै उक्त परियोजना कार्यान्वयन हुनेछ ।

प्रकाशित : भाद्र २७, २०७५ १०:०७
ADVERTISEMENT
प्रतिक्रिया
पठाउनुहोस्
ADVERTISEMENT

ग्यास बालौं, वन जोगाऔं

कान्तिपुर संवाददाता

दमौली — वन संरक्षणमा लाग्न अनुरोध गर्दै बन्दीपुरको वन उपभोक्ता समूहले आफू सम्बद्ध १ सय ४३ घरधुरीलाई ग्यास सिलिन्डर र चुल्हो वितरण गरेको छ ।

तनहुँको सिद्धथान वन उपभोक्ता समितिका सदस्यलाई सिलिन्डर ग्यास र चुल्हो वितरण गर्दै बन्दीपुर गाउँपालिका अध्यक्ष पूर्णसिं थापा । तस्बिर : प्रताप रानामगर

वर्षभरि प्रत्येक घरधुरीले बाल्ने दाउराको हिसाब निकालेपछि उपभोक्ताको भेलाले ग्यास सिलिन्डर नै उत्तम विकल्प ठहर गरेको थियो । त्यसपछि खरिद गरेर सिलिन्डर र चुल्हो वितरण गरिएको हो ।


समूहको कार्यक्रममा बन्दीपुर गाउँपालिकाका अध्यक्ष पूर्णसिं थापाले चुल्हो र सिलिन्डर हस्तान्तरण गरे । उपभोक्ता समूहले राम्रो निर्णय गरेको उनले बताए । सिद्धथान सामुदायिक वन उपभोक्ता समिति अध्यक्ष दमयन्ती थापाका अनुसार वर्षमा एउटा घरधुरीले १५ देखि ३० भारी दाउरा खपत गर्ने गरेका छन् ।


‘खाना पकाउन बर्सेनि वनमा दाउरा काट्नुपर्ने बाध्यता नै हो,’ उनले भनिन्, ‘बर्सेनि दाउरा काटदै जाँदा वन नै सिद्धिने अवस्था आउन लाग्यो ।’ समितिले १ सय ४३ वटा सिलिन्डर र चुल्होका लागि ८ लाख ७२ हजार रुपैयाँ खर्च गरेको उनले बताइन् ।


धूवाँ नआउने चुल्हो पाउँदा उपभोक्ता पनि हर्षित छन् । नियमित खर्च चाहिने भए पनि जंगल गएर दाउरा खोजेर ल्याउनुको दु:खको तुलनामा ग्यास चुल्होले गाउँलेलाई फाइदा नै हुने स्थानीय श्रीप्रसाद पौडेलले बताए । ‘धूवाँबाट स्वास्थ्य जोगियो, उता वन पनि जोगियो,’ उनले भने ।


०५२ सालमा गठित वन उपभोत्ता समितिले वन संरक्षणको अभियान सञ्चालन गर्दै आए पनि सदस्यहरूका लागि दाउराको व्यवस्थापन गाह्रो भएको थियो । हेरालु राखेर चोरीसिकार नियन्त्रण गरे पनि दाउराको व्यवस्थापन असहज बन्दै गएपछि ग्यास चुल्होलाई विकल्प रूपमा खोजिएको हो । समूहमा कुवादी, गुवादी, आरथुम्का, कुकुरदी, बरालथोक र मोहरिया टोलका गाउँले आबद्ध छन् ।

प्रकाशित : भाद्र २७, २०७५ १०:०१
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT