बर्जिबाङमा शान्तिपार्क

गिरुप्रसाद भण्डारी

प्यूठान — स्वर्गद्वारी नगरपालिका ८ बर्जिबाङ दहचौरमा शान्तिपार्क निर्माण गर्न थालिएको छ । यसका लागि स्वर्गद्वारी नगरपालिकाको सहयोगमा विस्तृत अध्ययन प्रतिवेदन (डीपीआर) पूरा गरी गुरुयोजना बनाइएको छ ।

प्रदेश सरकारले समेत पार्क निर्माणका लागि ५० लाख रुपैयाँ बजेट विनियोजन गरेको छ । स्वर्गद्वारी नगरपालिकाको प्रथम नगरसभाले बर्जिबाङ विकास मार्गचित्र पारित गरेपछि पार्क निर्माण प्रक्रिया अगाडि बढेको हो ।


स्थानीय हरियाली सामुदायिक वन क्षेत्रको चार सय रोपनी बाँझो चौरमा शान्तिपार्क निर्माण गर्न लागिएको बर्जिबाङका सामाजिक अगुवा तथा शैक्षिक प्रगति मन्च बर्जिबाङका अध्यक्ष दलबहादुर केसीले बताए । ‘नमुना बर्जिबाङ बनाउन १८ वटा बुँदा तयार पारी अगाडि बढेका छौं, यसमध्ये पार्क एउटा हो,’ उनले भने, ‘हाम्रो सोच बर्जिबाङलाई प्रदेश ५ कै हेर्न लाएक गाउँ बनाउने हो ।’

Yamaha


पार्क निर्माण गर्ने भनेको क्षेत्रमा स्थानीयले चरिचरन रोकेर १० वर्षदेखि वरपीपल रोप्ने काम गर्दै आएका छन् । वरपीपल लगाएर स्थानीयले चौपारी निर्माण गरेका छन् । चौपारीमा अघिल्लो पुस्ताको सम्झनाका लागि शिलालेख पनि राखिएको छ । पार्क निर्माण स्थलममा यस्ता १४ वटा चौपारी स्थानीयले निर्माण गरिसकेका छन् । स्थानीयले नै तीनवटा मन्दिरसमेत निर्माण गरेका छन् । यी मन्दिरमा तीजको पञ्चमीमा पूजापाठ गरी मेला लाग्ने गर्छ ।


‘कला, संस्कृति र पर्यटन विकास हाम्रो अभियान, नमुना शान्तिपार्क स्वर्गद्वारी नगरको पहिचान’ भन्ने नारा बनाएर पार्क निर्माणमा स्थानीय समुदाय सक्रिय रूपमा लागेको स्थानीय भीमबहादुर खड्काले बताए । ‘नगरपालिकाको पाँच लाख सहयोगमा शान्ति नगरपार्क बालउद्यान उपभोक्ता समितिमार्फत विस्तृत अध्ययन पूरा गरेका छौं,’ उनले भने, ‘नगरपालिका, प्रदेश र केन्द्रको सहयोग पाए १० वर्षभित्र पार्क निर्माणको काम हुन सक्छ ।’ ३४ करोड रुपैयाँको लागतमा पार्क निर्माण सम्पन्न हुनेछ । यसका लागि डिजाइन र इस्टिमेट गरिएको उनले बताए ।


२४ वटा पिकनिक स्थल, स्वर्गद्वारी बाबा र गौतम बुद्धको मूर्ति राखेर शान्ति स्तम्भ, धर्मशाला, योगहल, बालउद्यान, मनोरञ्जन क्षेत्र, स्विमिङ पुल, हरियाली क्षेत्रसहितको पार्क निर्माण गर्ने गरी योजना अगाडि बढेको छ । बर्जिबाङमा चाल्नेटार विमानस्थल, चेरनेटा–दहचौर–सारी सडक स्तरोन्नति गर्ने काम सँगसँगै अगाडि बढे पार्कको महत्त्व बढ्ने स्वर्गद्वारी नगरपालिकाका मेयर नेत्रबहादुर रोकायाले बताए । ‘बर्जिबाङवासीको सक्रियतामा नगरपालिकाले हातेमालो गरेको छ,’ रोकायाले भने, ‘पार्क निर्माण भए नगरपालिकाको नै गौरव बढ्नेछ ।’


उनले नगरपालिकाको पहलमा प्रदशेबाट पार्क निर्माणका लागि ५० लाख रुपैयाँ बजेट विनियोजन भएको बताए । ‘बर्जिबाङ विकास मार्गचित्र ०७४’ ले कल्पना गरे अनुसारको पार्क बनाउन नगरपालिकाले हरेक वर्ष सहयोग गर्ने रोकायाले बताए । ‘बर्जिबाङवासी धेरै मिहिनेती छन्,’ उनले भने, ‘हाम्रो नगरका नयाँ योजना यहींबाट बन्ने गरेका छन् ।’


स्थानीयकै अगुवाइमा नमुना स्वस्थ गाउँ, पूर्ण विद्यार्थी भर्ना वडा, पूर्ण साक्षर, पूर्ण खोपलगायत हरेक अभियानमा स्वर्गद्वारी नगरपालिका ८ बर्जिबाङअगाडि रहेको रोकायाले बताए । ‘स्थानीय समाजिक अगुवाहरू शैक्षिक प्रगति मञ्च गठन गरेर बर्जिबाङलाई अगाडि बढाउन लागिपरेका छन्,’ रोकायाले भने, ‘उनीहरूकै सक्रियतामा यहाँ शैक्षिक, आर्थिक, सामाजिक, सांस्कृतिक र भौतिक पूर्वाधारको विकास अगाडि बढ्दै छ ।’


शान्तिपार्क निर्माणको काम पूरा भए स्वर्गद्वारीको काखमा रहेको बर्जिबाङ गाउँ घुम्न स्वर्गद्वारी आएका पर्यटक पनि आउन सक्ने रोकायाले बताए ।

प्रकाशित : भाद्र २९, २०७५ १०:४९
प्रतिक्रिया
पठाउनुहोस्
ADVERTISEMENT
ADVERTISEMENT

सिँचाइ योजना पुनर्निर्माण सुरु

कास्कीको माछापुच्छ्रे गाउँपालिकाको लुम्रे–सिमलबेंसी सिँचाइ आयोजनाको शिलान्यास
प्रदेश सरकार विकास निर्माणका योजना लिएर गाउँ छिरेको संकेत
लालप्रसाद शर्मा

पोखरा — पूर्वाधार, कर्मचारी दरबन्दी र संरचना व्यवस्थापनलगायत अभावमा गति लिन नसकिरहेका बेला गण्डकी प्रदेशमा पहिलो विकासनिर्माण आयोजनाको विहीबार शिलान्यास भएको छ ।

कास्कीको माछापुच्छ्रे गाउँपालिका ८ स्थित फाँट । तस्बिर : लालप्रसाद

भौतिक पूर्वाधार बिकास मन्त्रालय अन्तर्गत जलस्रोत तथा सिँचाइ बिकास डिभिजन कार्यालय उद्घाटनलगत्तै सिँचाई आयोजनाको निर्माण पनि सुरु गरिएको हो ।


कास्कीको माछापुच्छ्रे गाउँपालिका ८ मा लुम्रे–सिमलबेंसी सिँचाइ आयोजनाको बिहीबार शिलान्याससँगै प्रदेशमा बजेट कार्यान्वयनको सुरुवात भएको छ । यसले एकातिर प्रदेश सरकार विकास निर्माणका योजना लिएर गाउँ छिरेको संकेत गरेको छ । यसबाट स्थानीय पनि खुसी भएका छन् ।


सिँचाइ योजनाको भौतिक पूर्वाधार विकासमन्त्री रामशरण बस्नेतले शिलान्यास गरे । साबिकका सिँचाइ विकास कार्यालय कास्की र जलउत्पन्न प्रकोप नियन्त्रण कार्यालय समायोजन भएर जलस्रोत तथा सिँचाइ विकास डिभिजन कार्यालय कास्की स्थापना गरिएको छ । उक्त कार्यालयको पनि बिहीबारै उद्घाटन गरिएको हो ।


आयोजनाले उक्त वडाको ३४ हेक्टर क्षेत्रफलमा बाह्रैमास सिँचाइ सुविधा पुग्नेछ । ०४७ मा बनेको नहर जीर्ण भएर सिँचाइबाट स्थानीय वञ्चित भएपछि पुनर्निर्माण (पुन:स्थापना) गर्न लागिएको हो । योजनाको विस्तृत इन्जिनियरिङ सर्भे भइसकेको छ । योजनाका लागि १ करोड १० लाख रुपैयाँ बजेट विनियोजन गरेको मन्त्रालयका सचिव ईश्वरचन्द्र मरहट्ठाले बताए । दुई वर्षमा सक्ने भनिए पनि १ दशमलव ७ किलोमिटर लम्बाइको सिँचाइ कुलो आगामी असारभित्र सम्पन्न गर्ने लक्ष्य रहेको भन्दै उनले चालु आवमा ४५ लाख रुपैयाँ छुट्टिएको र कार्यप्रगतिका आधारमा रकम निकासा हुने जनाए ।


मन्त्री बस्नेतले प्रदेश सरकारले विकास निर्माणलगायत काम गर्न नसकेको भन्ने गुनासो आइरहेका बेला कार्यालयको उद्घाटन र सिँचाइको शिलन्यास एकैदिन गरेर सरकारको अनुभूति दिलाउन थालिएको बताए । ‘यस्तै विकास निर्माणको काम, कार्यालयबाट दिइने सेवासुविधाको फरकपनले परिवर्तनको आभास दिलाउने हो,’ उनले भने, ‘कर्मचारी पनि परिवर्तित अवस्था अनुसार आफूलाई परिमार्जन गर्नुपर्छ ।’ उनले योजना समयमै सम्पन्न गराउन स्थानीय तह र उपभोक्तासमक्ष अनुरोध गरे ।


गुणस्तरहीन काम र ढिलासुस्ती भएमा कारबाही गरिने उनले बताए । पूर्वाधार विकासबिना देश समृद्ध नहुने भन्दै उनले सिँचाइको भरपुर उपयोग गर्नुपर्नेमा जोड दिए । प्रदेशसभाका सांसद रामजी बरालले प्रदेश केन्द्रित भएर काम गर्न कर्मचारीसँग अनुरोध गरे । ‘विगतका मानसिकता, कार्यशैली, प्रवृत्ति त्यागेर परिवर्तित सन्दर्भमा रहेर काम गर्नुपर्‍यो’, उनले भने ।


मन्त्री बस्नेतले मन्त्रालयअन्तर्गत पहिलो कार्यालय स्थापना भएकाले इमान्दारिता र विश्वासका साथ काम गर्न कर्मचारीसँग अनुरोध गरे । विकासको काम सुरु भएकाले जिम्मेवारीपूर्वक काममा लाग्नुपर्ने भन्दै उनले संघीयताको मर्मअनुसार चल्नुपर्नेमा जोड दिए । सचिव मरहट्ठाले कार्यालय स्थापना गरेर प्रक्रियामा मात्र जाने र प्रक्रियामै अल्झिने नभई काम गरेर जनतालाई सेवा दिनुपर्ने बताए । र, तर, वा भनेर र कुनै पनि बहानामा जनताको सेवा रोक्न नहुने भन्दै उनले सोहीअनुसार काम गर्न कर्मचारीलाई निर्देशन दिए ।


सिँचाइ आयोजना उपभोक्ता समितिका अध्यक्ष गुप्तबहादुर गुरुङले जीर्ण नहरका कारण खेतसम्म पानी नपुग्ने अवस्थाको अब अन्त्य हुने बताए । ‘पानी बीचैमा चुहिएर खेतमा पुग्दैनथ्यो । यसले हिउँदमा सिँचाइबाट वञ्चित थियाैं,’ उनले भने, ‘अब शाखा पनि विस्तार गरी सबै खेतमा बाह्रैमास पानी पुग्ने वातावरण मिल्छ । हिउँदे बाली तथा अन्य तरकारी पनि उत्पादन गर्न सकिने विश्वासमा छौं ।’ स्थानीय तारेवराह आधारभूत विद्यालयका प्रधानाध्यापक दुर्गाबहादुर गुरुङले समयमै काम सम्पन्न हुने आश गरे । माछापुच्छ्रे गाउँपालिकाका अध्यक्ष कर्णबहादुर गुरुङले योजना सम्पन्न गर्नका लागि आवश्यक समन्वय र सक्दो सहयोगको आश्वासन दिए । डिभिजन कार्यालय प्रमुख श्रीराम जोशीले योजना समयमै सक्ने बताए ।


भौतिक पूर्वाधार विकास मन्त्रालय अन्तर्गत प्रदेशका ११ जिल्लामा २९ कार्यालय स्थापनाका लागि केन्द्रले स्वीकृति दिएको थियो । तर कर्मचारी नहुँदा एक महिनासम्म एउटै कार्यालय खुल्न सकेको थिएन । बिहीबार मात्रै कास्कीमा जलस्रोत तथा सिँचाइ विकास डिभिजन कार्यालय उद्घाटनपछि यस्तै कार्यालय सबै जिल्लामा स्थापना भएका छन् ।

प्रकाशित : भाद्र २९, २०७५ १०:४७
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT
ADVERTISEMENT