लुम्बिनी पर्यटन महोत्सव सुरु

कान्तिपुर संवाददाता

भैरहवा — लुम्बिनी क्षेत्रको पर्यटन र स्वदेशी उत्पादन प्रवर्द्धन गर्ने उद्देश्यले भैरहवामा बिहीबारदेखि लुम्बिनी पर्यटन, कृषि तथा व्यापार मेला सुरु भएको छ ।

‘पर्यटन कृषि र उद्योगको विकास, राष्ट्रिय समृद्धिको आधार’ मूल नारासहित सिद्धार्थ उद्योग वाणिज्य संघ भैरहवाले आयोजना गरेको यो महोत्सव यो सातौं महोत्सव हो ।

Yamaha


महोत्सवको उद्घाटन गर्दै नेपाल कम्युनिष्ट पार्टीका अध्यक्ष तथा पूर्वप्रधानमन्त्री पुष्पकमल दाहाल प्रचण्डले लुम्बिनी र बुद्धसँग सम्बन्धित महत्त्वपूर्ण अन्य स्थलहरूका कारणले भैरहवा/लुम्बिनी क्षेत्र विश्व शान्ति र समृद्धिका लागि महत्त्वपूर्ण ऐतिहासिक स्थल भएको बताए । लुम्बिनीसँग जोडिँदै रूपन्देही, कपिलवस्तु र पश्चिम नवलपरासीमा रहेका बुद्धसँग सम्बन्धित स्थलहरूलाई एकीकृत रूपमा गुरुयोजनाले जोडेर अघि बढाइनुपर्ने उनले बताए ।

‘यी तीन जिल्लालाई बुद्धसँग जोडेर हेर्ने हो भने र भौगोलिक बनावटले हेर्ने हो भने पनि हरेक दृष्टिले समान छन्’ उनले भने, ‘विस्तृत परियोजनाले समेट्न सकिने खालका भएकाले यी तीन जिल्लालाई एउटै जिल्ला बनाएर बृहत्तर लुम्बिनी गुरुयोजनाले समेट्दा फरक पर्दैन ।’ लुम्बिनी क्षेत्र पर्यटनको प्रचुर सम्भावना भएकाले यस क्षेत्रले मुलुकलाई रोजगारीमा आत्मनिर्भरता र सुदृढ अर्थतन्त्र बनाउन महत्त्वपूर्ण योगदान पुर्‍याउने उनले बताए ।

लुम्बिनी सबै भाषाभाषी र वर्ग, समुदायलाई गर्व गर्न मिल्ने स्थल भएकाले प्रदेशको नामकरण लुम्बिनी राखिनु न्ययपूर्ण हुने उनले बताए । प्रदेश राजधानी भने तत्काल विवाद सिर्जना गर्नुभन्दा आठ/दस वर्षका लागि पहिलाकै सरकारले तोकेको स्थानलाई मान्ने पार्टी र सरकारको मान्यता भए पनि यसको अन्तिम टुंगो लगाउने फैसलाको अधिकार प्रदेश सरकारलाई रहेको उनले बताए ।

निजी क्षेत्रलाई नेपालमा लगानी गर्ने ढुक्क किसिमको वातवरण सिर्जना राज्यले गर्न थालेको दाबी गर्दै उनले नेपालमा लगानी गरेपछि नाफा पनि राम्रो आउँछ, उत्पादन र रोजगारी सिर्जना गर्न सक्छु भन्ने व्यवसायीलाई आत्मविश्वास गराउने जिम्मा राज्यको भएको बताए ।

सांसद घनश्याम भुसालले कम्युनिस्ट सरकारले दुई तिहाईको अवसरलाई सदुपयोग गर्नुपर्ने बताए । उनले राजा, कांग्रेस र पञ्चायतले अवसर पाउँदा पनि कुनै पनि रोजगारी सिर्जना नगर्दा सिद्धिएको जनाउँदै
आफ्नो पार्टी नेतृत्वको सरकारलाई पनि सचेतताका साथ काम गर्न आग्रह गरे ।

नेपाली कांग्रेसका संसदीय दलका प्रमुख सचेतक तथा पूर्वमन्त्री बालकृष्ण खाणले सरकारको काम कारबाहीप्रति तीव्र असन्तुष्टि व्यक्त गरे । उनले प्रदेश राजधानी कहाँ राख्ने भन्ने विषयमा ठूला नेताहरू जे पायो त्यो नबोल्न पनि अनुरोध गरे ।

करिब २ सय ५० वटा स्टल रहेको यस महोत्सवले संघ सरकारले घोषणा गरेको नेपाल भ्रमण वर्ष २०२० र प्रदेश सरकारले घोषणा गरेको लुम्बिनी भ्रमण वर्ष २०७६ लाई थप टेवा पुग्ने आयोजकको विश्वास छ । महोत्सवमा राष्ट्रिय कलाकारको प्रस्तुति, भैरहवा आइडल, बालउद्यान, कुस्ती तथा भलिबल खेल एवं लुम्बिनी, तिलौराकोट, देवदह, रामग्रामलगायतका पुरातात्त्विक क्षेत्रको टुर प्याकेजलगायतका कार्यक्रम समावेश छन् ।

करिब ३ लाख दर्शकले अवलोकन गर्ने अपेक्षा लिइएको महोत्सवमा ८ करोड बराबरको कारोबार हुने जनाइएको छ ।

प्रकाशित : मंसिर २१, २०७५ १०:५३
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

आवधिक योजनाका लागि सुझाव संकलन

कान्तिपुर संवाददाता

पाल्पा — पाँचवर्षे आवधिक योजना निर्माणको चरणमा रहेको प्रदेश सरकारले जिल्लामा समेत सुझाव संकलन सुरु गरेको छ । सामाजिक न्यायमा आधारित आर्थिक समृद्धि हासिल गर्ने उद्देश्यलाई पूरा गर्न बनाउन लागेको आवधिक योजनाका लागि सुझाव संकलन गरेको हो । 

प्रदेश पाँचको प्रथम आवधिक योजनाको सुझाव संकलन कार्यक्रमका सहभागी । तस्बिर : माधव अर्याल/कान्तिपुर  

जिल्लाका गाउँ/नगरपालिकाका प्रमुख, उपप्रमुख, प्रमुख प्रशासकीय अधिकृत, विषयगत कार्यालय, कृषि, वन, उद्योग, संचार, सुरक्षाका प्रतिनिधिसँग सुझाव लिइएको छ । आवधिक योजनाको क्षेत्रगत उद्देश्य, रणनीति तथा कार्यनीतिका विषयमा सामूहिक छलफल गराएको छ ।

पूर्वाधार क्षेत्र अन्तर्गतका सिंचाइ, जलविद्युत्, सौर्य ऊर्जा, यातायात, सहरी विकास, खानेपानी तथा सरसफाइ, भवन, आवास तथा बस्ती विकास, विज्ञान तथा प्रविधिका क्षेत्रमा छलफल गरेको छ । सुशासन र भ्रष्टाचार नियन्त्रण, शान्ति सुरक्षा, कार्यान्वयनको अनुगमन तथा मूल्यांकनका विषयमा सामूहिक छलफल गरेका हुन् ।

तथ्यांक सुदृढीकरण तथा व्यवस्थापन, सूचना प्रविधि, वन तथा वातावरण, प्राकृतिक प्रकोप नियन्त्रण, विपद् व्यवस्थापन, गरिबी निवारण, श्रम तथा रोजगारी, मानव संसाधन विकासका विषयमा समेत छलफल गरेको छ । शिक्षा, स्वास्थ्य, महिला विकास तथा सशक्तीकरण, बालबालिका, खेलकुद, ज्येष्ठ नागरिक, अपांगता, भाषा, कला, साहित्य तथा संस्कृति, सम्पदा संरक्षण र गुठी व्यवस्थापनका विषयमा सुझाव लिइएको छ ।

सुझाव संकलनका लागि आएका उद्योग, वन, पर्यटन तथा वातावरणमन्त्री लीला गिरीले १२ जिल्लाबाट आउने सल्लाह, सुझावबाट नै प्रदेश ५ ले परिकल्पना गरेको विषयवस्तुले सार्थकता पाउने बताए ।
सबैको सुझाव ड्राफ्ट गरिएको विषयवस्तुमा पुग्न सक्यो भने मात्रै ‘समृद्ध प्रदेश : खुसी जनता’ हुने मन्त्री गिरीले बताए ।

कुन जिल्लाको के महत्त्व छ र कस्ता विषयवस्तुलाई जोड दिनुपर्छ भन्ने विषयमा सबैको सुझाव आउन सक्यो भने मात्र सबैले सोचेको प्रदेश बन्ने उनले बताए । ‘त्यसैले यस्ता सुझाव संकलन सबै जिल्लामा राखिएको हो,’ उनले भने, ‘यसमा खुलेर सुझाव दिनुहोस् र अनि मात्र आवधिक योजनालाई राम्रो बनाउन सकिन्छ ।’ मुख्यमन्त्री तथा मन्त्रिपरिषद्को कार्यालयका सचिव भरतमणि रिजालले सबै जिल्लाका सुझावलाई एकीकृत गर्दै आवधिक योजना पूरा गरिने बताए ।

उनले आर्थिक, सामाजिक, पूर्वाधार, सुशासनलगायतका क्षेत्रमा आएका सुझाव प्राय: उस्तै भएको समेत बताए । ‘समूहगत छलफलमा आएका सुझाव निकै राम्रा छन्,’ उनले भने, ‘यसलाई अझ राम्रो बनाउन सबैको सहयोग जरुरी छ ।’

प्रदेश ५ ले एक महिनाभित्रै सन्तुलित विकासका लागि अल्पकालीन, मध्यकालीन र दीर्घकालीन योजना तयार गर्ने जनाएको छ । योजनाले समाजवाद उन्मुख, सामाजिक न्यायमा आधारित सन्तुलित र दिगो विकासको माध्यमबाट आर्थिक वृद्धिदरलाई उच्च पार्दै प्रदेशवासी जनताको जीवनमा गुणात्मक परिवर्तन ल्याउने उद्देश्य लिएको छ ।

सबै क्षेत्रबाट सुझाव संकलन गरी बृहत् अन्तक्र्रिया र छलफलपछि आधारपत्रलाई थप सुझावका लागि राष्ट्रिय योजना आयोगमा पठाइनेछ । आयोगको सुझावसहित परिमार्जन गरेर प्रदेशको प्रथम आवधिक योजनालाई अन्तिम रूप दिइने सचिव रिजालले बताए । आवधिक योजनाले असन्तुलित जिल्लागत विकासलाई सन्तुलित गराउन सहयोग पुग्ने उनले बताए ।

प्रकाशित : मंसिर २१, २०७५ १०:४६
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT