दक्ष कामदारलाई गाउँमै अवसर

कान्तिपुर संवाददाता

परासी — कामको खोजीमा धमाधम विदेशिने युवा जनशक्तिको संख्या दिनप्रतिदिन बढ्दो छ । श्रमकै लागि भनेर जाने र विद्यार्थी भिसामा विदेश गएर श्रम गर्ने नेपाली युवाको संख्या पनि यहाँ कम छैन ।

पछिल्लो समय नेपालमै स्वदेशी तथा बहुराष्ट्रिय कम्पनी खुल्न थालेपछि भने दक्ष कामदारले यहीं कामको अवसर पाउन थालेका छन् ।

पश्चिम नवलपरासीको भुमहीदेखि रूपन्देहीको भैरहवासम्मको बाइपास सडक वरपर अहिले धमाधम कलकारखाना र उद्योग खुल्न थालेका छन् । बहुराष्ट्रिय पेप्सी, वास्र्टेनर, एसियन कंक्रिटो, हुलासजस्ता दर्जनभन्दा बढी कम्पनी सञ्चालनमा आएपछि दक्ष कामदारले काम पाउन थालेका हुन् ।

रामग्राम नगरपालिकाको हकुहीमा सञ्चालनमा आएको एसियन कंक्रिटो प्रालि जर्मन प्रविधिमार्फत ब्लक उत्पादन गर्ने कम्पनी हो । तर, यहाँ आवश्यक कच्चापदार्थ संकलन गर्ने मजदुरबाहेक कम्पनीभित्र मेसिन सञ्चालन गर्ने र कम्प्युटर प्रविधिमार्फत नियन्त्रण र गुणस्तर नाप्न सक्ने नेपाली जनशक्तिको अभाव छ । उद्योगले अहिले कतार, साउदीजस्ता खाडी मुलुकमा काम गरिरहेका नेपाली र भारतीय नागरिकलाई उनीहरूले भनेअनुसारकोसुविधा दिएर काममा लगाएको छ ।

तनहुँका पूर्णबहादुर गुरुङले करिब १० वर्ष कतारमा काम गरे । नेपालमा कुनै पनि सीप नसिकेका उनी विदेश गएपछि मासा कम्पनीको प्लान्टलाई कम्प्युटर प्रविधिमार्फत नियन्त्रण गर्न सक्ने कलामा पोख्त भए । १० वर्षसम्म विदेशमा श्रम गरेपछि स्वदेशमा नै केही गराैं भन्ने सोच उनमा आयो । तर, आफूले जानेको सीपअनुसारको कम्पनी नेपालमा नै नभएकाले उनी खिन्न थिए ।

‘उद्योग नै खोलाैं भने लगानी गर्न नसक्ने, काम गरौं भने आफूले जानेको कम्पनीको उत्पादन नेपालमा थिएन,’ उनले भने, ‘नेपालमा पहिलोपटक विदेशी प्रविधिको कंक्रिटो उद्योग सञ्चालनमा आएपछि मलाई कम्पनीले नै कामका लागि नेपाल बोलायो ।’ अहिले उनी नेपालमा नै आफूले जानेको सीपअनुसारको काम गर्न पाउँदा दंग छन् । ‘विदेशमा सिकेको सीपले स्वदेशमा काम गर्न पाउँदा साह्रै खुसी लागेको छ,’ उनले भने, ‘नेपालमा पनि औद्योगिक वातावरण बनेमा सीप सिकेकामजस्तै धेरै युवाले यहीं रोजगारी पाउनेछन् ।’

जिल्लाकै सुक्रौलीमा रहेको बहुराष्ट्रिय कम्पनी वास्र्टेनर र पेप्सीजस्ता कम्पनीमा पनि दक्ष नेपाली कामदारको अभाव देखिएको छ । यहाँ भारतीय र विदेशी कामदार आएर काम गरिरहेका छन् । स्वदेशी दक्ष र सीपयुक्त जनशक्तिको अभावमा अहिले यी उद्योगमा खासगरी भारतको विहार र उत्तर प्रदेशबाट कामदार ल्याएरकाम गर्नुपरेको उद्योगहरूको भनाइ छ ।

सामान्य मजदुरीबाहेक प्राविधिक काममा विदेशी कामदार लगाउँदा खर्च बढ्नुका साथै लामो समयसम्म कर्मचारी टिकाउन पनि समस्या परिरहेको कम्पनीको दाबी छ । समय–समयमा कर्मचारी आवश्यकताको सूचना प्रकाशित गर्दासमेत दक्ष जनशक्ति पाउन नसकिएको उद्योग सञ्चालकले गुनासो गरे । ‘हामीले मुस्किलले ४/५ जना दक्ष कामदार विदेशबाट ल्याएका छौं,’ एसियन कंक्रिटोका निर्देशक राजेश अग्रवालले भने, ‘हाम्रोमा मात्रै होइन, धेरै नयाँ उद्योगलाई दक्षनेपाली कामदारको खाँचो छ ।’

प्रकाशित : पुस २७, २०७५ ०९:५३
ADVERTISEMENT
ADVERTISEMENT
प्रतिक्रिया
पठाउनुहोस्

सडक मापदण्ड तोकियो

कान्तिपुर संवाददाता

म्याग्दी — यहाँको एक गाउँपालिकाले ग्रामीण सडकको पनि क्षेत्राधिकार तोकेको छ । भौगोलिक रूपमा जिल्लाकै सानो र मिलेको मानिएको मंगलाले गाउँपालिकाका भित्री सडकलाई ‘क’ देखि ‘घ’ सम्म चार श्रेणीमा विभाजन गरी सडकको मापदण्ड कायम गरेको हो । 

गाउँपालिकाको मंगलबार सम्पन्न चौथो गाउँसभाले सिम–टोडे, पुल्चोक–पोक–देउराली, पखेर–झाँक्रेपानी र पुल्चोक–छिस्वाङ सडकलाई ‘क’ वर्गमा राखेर सडक क्षेत्राधिकार १३ मिटर तोकेको छ । भाइबाङ–हिदी, सातबीसे–बरंजा–बुकेनी, सिमलचौर–टोडे, मुहाने–पाँखु–धारा–सिर्कुम–टिकाबाङ ‘ख’ श्रेणी र सडक क्षेत्राधिकार ११ मिटर तोकेको छ ।

बाँकी सबै ग्रामीण सडक ‘ग’ श्रेणी तथा सडक क्षेत्राधिकार ९ मिटर तथा गाउँपालिका मुकाम रहेको बाबियाचौर बजार
क्षेत्रभित्रका सबै गल्ली कम्तीमा ६ मिटर कायम गरिएको र सबै सडकमा २ मिटर सेटब्याक छाड्नुपर्ने भएको छ ।

यसैगरी ‘ख’ वर्गमा सूचीकृत भाइबाङ–हिदी, सातबीसे–बरंजा–बुकेनी, सिमलचौर–टोडे, मुहानेखोला–पाखु–धारा–सिर्कुम–टीकाबाङ सडकको क्षेत्राधिकार ११ मिटर कायम भएको छ । ‘ग’ वर्गका सडकको ९ र ‘घ’ वर्गका बजारका भित्री गल्लीको सडकको क्षेत्राधिकार ६ मिटर कायम गरिएको छ । सबै सडकको डेढ मिटर सेटब्याक छाड्नुपर्ने भएको छ ।

गाउँपालिका उपाध्यक्ष सिजना केसीका अनुसार गाउँपालिकाको हिउँदे अधिवेशनले गत असारमा पारित वार्षिक बजेटलाई पनि संशोधन गरेको छ । जनप्रतिनिधि र कर्मचारीको कार्यअनुभवको कमीले वार्षिक बजेट बनाउँदा पुँजीगतमा राख्नुपर्ने वित्तीय सबलीकरणतर्फको करिब ३ करोडभन्दा बढी बजेट चालु शीर्षकमा परेको थियो ।

प्रकाशित : पुस २७, २०७५ ०९:५०
पूरा पढ्नुहोस्
ADVERTISEMENT
प्रतिक्रिया
पठाउनुहोस्