जिप दुर्घटनामा १ को मृत्यु, १२ घाइते
रोल्पा — सदरमुकाम लिबाङबाट कुरेली–मिरुलतिर सवारी लिएर जाँदै गरेको जिप सोमबार रोल्पामा दुर्घटना हुँदा एक युवतीको मृत्यु भएको छ । दुर्घटना परी राङ्सीकी २१ वर्षीय सञ्जु बुढामगरको घटनास्थलमै मृत्यु भएको हो ।
उनी माघी पर्व मनाउनका लागि कुरेली गाउँमा माइतीघर जाँदै थिइन् ।
दिउँसो ३:५० बजे परिवर्तन गाउँपालिकाको खरिबोट नजिकै लु १ ज ३३३२ नम्बरको जिप दुर्घटना भएको थियो । दुर्घटना परी चालक सहित अन्य ११ जना घाइते भएका छन् । एक नौ महिने शिशु गम्भीर घाइते भएको प्रहरीले जनाएको छ ।
लिबाङबाट बिहान १० बजे १४ जना यात्रु लिएर जिप मिरुलको टुटुसम्मका लागि हिँडेको थियो । गन्तव्य पुग्नुअघि नै जिप सडकबाट मुनिको खोलामा खसेर दुर्घटनाग्रस्त हुन पुगेको थियो ।
प्रहरीका अनुसार जिप टुटु पुग्नुअघि नै परिवर्तन–१ स्थित कुरेलीको तरान गाउँ जाने क्रममा खोलामा खसेको हो ।
तरानका यात्रुले गाउँसम्म पुर्याइदिन चालकसँग पटक पटक अनुरोध गरेपछि उक्त जिप तरान लैजान चालक मुस्किलले तयार भएका थिए ।
दुर्घटनास्थल सदरमुकाम लिबाङदेखि करिब ५० किलोमिटर उत्तरमा पर्छ ।
प्रकाशित : पुस ३०, २०७५ १९:१०