बुटवलमा राजधानी माग गर्दै कांग्रेसले गर्यो खबरदारी सभा
बुटवल — प्रदेश ५ को स्थायी राजधानी बुटवलमा राख्नुपर्ने र छिटो नामांकरण गर्नुपर्ने माग सहित नेपाली कांग्रेसले बिहीबार खबरदारी सभा आयोजना गरेको छ ।
पूर्व प्रधानमन्त्री शेरबहादुर देउवा नेतृत्वको सरकारले बुटवललाई अस्थायी राजधानी घोषणा गरेको एक वर्ष पुगेको अवसरसहित बुटवलमै स्थायी राजधानी माग गर्दै खबरदारी सभा आयोजना गरेको हो ।
दुई तिहाई बहुमतको सरकार भएर पनि एक वर्षसम्म राजधानी तोक्ने र नामांकरण गर्ने काम नभएको भन्दै जनस्तरबाट सरकारलाई दबाब दिन कार्यक्रम आयोजना गरेको कांग्रेस रुपन्देहीका सभापति अब्दुल रज्जाकले बताए ।
कार्यक्रममा नेपाली कांग्रेसका प्रमुख सचेतक बालकृष्ण खाँड, नेता विश्वप्रकाश शर्मा, चन्द्र भण्डारी, पुष्पा भुसाल, देवेनद्रराज कँडेल लगायतको सहभागिता छ । भरखरै बुटवलको राजमार्ग चौराहबाट बृहत र्याली निस्किएको छ । र्याली बुटवल बजार परिक्रमा गरी मिडियाचोकमा पुगेर सभामा परिणत हुनेछ ।
प्रकाशित : माघ ३, २०७५ १३:१५