समृद्धिका आधार कृषि र पर्यटन : मुख्यमन्त्री पोख्रेल

दुर्गालाल केसी

दाङ — प्रदेश ५ का मुख्यमन्त्री शंकर पोख्रेलले प्रदेशलाई समृद्ध बनाउने आधार कृषि र पर्यटन भएको बताएका छन् । शनिवार बंगलाचुली गाउँपालिकाको चौथो गाउँसभा उद्घाटन गर्दै पोख्रेलले प्रदेश सरकारले कृषि, पर्यटन र औद्योगिक क्षेत्रमा पर्याप्त बजेट विनियोजन गरेको बताए ।

माडी डाइभर्सन कार्यक्रम मार्फत दाङको सुख्खा जमिनलाई सिँचाई गरी पर्याप्त अनाज उत्पादन गर्ने योजना रहेको उनले बताए । तीन महानगर र तीन औद्योगिक क्षेत्र निर्माण गरी प्रदेशको औद्योगीकरण गर्ने योजनामा प्रदेश सरकार रहेको उनले बताए । ‘लुम्बिनी–रारा पर्यटन कोरिडोर निर्माण गरेर पर्यटनको विकास गर्ने योजना छ,’ उनले भने,‘प्रदेश ५ को समृद्धिको मुख्य आधार कृषि र पर्यटन नै हो । कृषिबाट सुरु गरेर पर्यटनको विकास गर्ने योजना छ ।’

Citizen


कृषिको विकासका लागि स्मार्ट कृषि कार्यक्रम लागू भइरहेको उनले बताए । प्रदेश सरकारका योजनालाई जनतासम्म पुर्‍याउन स्थानीय तहले विशेष भूमिका खेल्नुपर्ने पोख्रेलले बताए ।

‘कृषिबाट मुलुकलाई समृद्ध बनाउने योजनामा सरकार लागि परेको छ । केन्द्रीय सरकारले प्रधानमन्त्री कृषि कार्यक्रम र प्रदेश सरकारले स्मार्ट कृषि कार्यक्रम लागू गरेको छ,’ उनले भने,‘यी दुवै कार्यक्रमलाई जनतासम्म पुर्‍याउनुपर्छ । हरेक किसानलाई यसबारे थाहा हुनुपर्छ ।’

प्रकाशित : माघ १९, २०७५ १६:३६
ADVERTISEMENT
प्रतिक्रिया
पठाउनुहोस्
ADVERTISEMENT

अस्पतालको पूर्वाधारका लागि ३० लाख सहयोग संकलन 

कान्तिपुर संवाददाता

काठमाडौँ — गैरआवासीय नेपाली संघ नेदरल्याण्डबाट बागलुङ धवलागिरी अञ्चल अस्पतालमा स्थापित ब्लड बैंकका लागि करिब ३० लाख रुपैयाँ सहयोग संकलन भएको छ । 

ब्लड बैंकको पूर्वाधार निर्माणका लागि नेदरल्याण्डमा गरिएको च्यारिटी डिनरमा उक्त रकम संकलन भएको पत्रकार शालिकराम गौतमले बताए । उनका अनुसार सहयोग रकमबाट एम्बुलेन्स, आधुनिक बेड, रगत लिने, भण्डारण गर्ने, रगतमा संक्रमण भए/नभएको जाँच गर्ने लगायतका सामाग्री खरिद गरिने छ ।

यो कार्यक्रम गैर आवासीय नेपाली संघ नेदरल्याण्डले एक देश एक परियोजना अन्तर्गत एनआरएन नेदरल्याण्ड्स, नेदरल्याण्ड्समा बसोबास गर्ने धौलागिरी क्षेत्रका बासिन्दाको अग्रसरतामा गरिएको हो ।

आगामी वर्ष अर्को अस्पताललाई पनि यस्तै सहयोग गर्ने योजना रहेको गैरआवासीय नेपाली सङ्घ नेदरल्याड्सका अध्यक्ष ठाकुरप्रसाद शर्माले बताए । अस्पताललाई एक महिनाभित्र सम्पूर्ण सामाग्री उपलब्ध गराइने उनले बताए ।

प्रकाशित : माघ १९, २०७५ १६:३०
पूरा पढ्नुहोस्
प्रतिक्रिया
पठाउनुहोस्
ADVERTISEMENT