सडक अतिक्रमणले साँघुरियो गुलरिया

नगरपालिकाले ६ वर्षअघि अतिक्रमण गरेर बनाइएका टहरा र ठेला हटाएको थियो । दुई वर्षयता पहिलेको जस्तै बनेको छ । सडकका नालीभन्दा बाहिर टहरा बनाइएका छन् । गाडी सञ्चालनमा बाधा नपुग्ने गरी व्यवसाय चलाउन दिएको निर्देशन अटेर गरिएको नगरपालिकाका कर्मचारीले बताए ।

अतिक्रमण गरेर निर्माण गरिएका टहरा हटाउन चासो नदिएको गुलरिया–७ का शंकर यादवले बताए । मापदण्डविपरीत सवारीसाधन पार्किङले थप समस्या बन्दै गएको छ । सडक साँघुरो बन्दै गएपछि टेम्पो, जिपलगायतका सवारीका साधनबीच सडकमा पार्किङ गर्न थालिएको छ ।

अतिक्रमणसँगै मतंगादेवी चोकदेखि बसपार्कतर्फको सडकमा खाडल बनेपछि आउजाउमा समस्या भइरहेको छ । धेरै पुरानो समस्या भए पनि हल गर्न प्रयास भएको छैन । राधाकृष्ण चोकदेखि भन्सार रोडसम्मको सडक अतिक्रमणले जताततै खाडल बनेका छन् । विद्यालय र कार्यालय आउजाउ गर्ने समयमा विद्यार्थी, कर्मचारी र सर्वसाधरणलाई समस्या हुने गरेको छ ।

चाडपर्वका समयमा व्यवसायीले सडक ओगटेर पसल थाप्ने गरेका छन् । पूजा, समारोहदेखि विवाह कार्यक्रम सकडमा गरिन्छ । त्यस्तो बेला आउ–जाउ नै बन्द हुने गरेको छ । नगरपालिकाका प्रमुख मुक्तिनाथ यादवले हुलाकी सडक निर्माणको थालनी भएपछि अतिक्रमण स्वत: हट्ने बताए ।

स्थानीय प्रशासन र राजनीतिक दलको सहयोगमा सडक अतिक्रमण हटाइएको थियो । नगरपालिकाले दुई वर्षयता यसमा चासो दिएको छैन । अतिक्रमण हटाएपछि ढल निकास व्यवस्थित गर्ने, दुबै किनारामा रूख रोपेर हराभरा बनाउने र सहर सफा राख्ने योजना कागजमा सिमित भएको छ ।

गत निर्वाचनका बेला उम्मेदवारले सहरको अतिक्रमण खाली गराउने र सफा राख्ने आश्वासन दिएका थिए । कुनै निकायले चासो नदिएको यो अवस्था आएको स्थानीय जाकिर हुसैनले गुनासो पोखे । करिब ५० हजार जनसंख्या रहेको गुलरिया नगरपालिकामा ७५ प्रतिशत गाउँ रहेको छ ।