भालुको आक्रमणबाट दुईजना घाइते
अर्घाखाँची — खेतमा काम गरेर घर फर्कँदै गर्दा भालुको आक्रमणबाट शीतगंगा नगरपालिका–१० सिद्धाराको तल्लो हर्रेमा दुईजना घाइते भएका छन् ।
बाटोमा हिडदै गर्दा आइतबार राति ९ बजेतिर हर्रे गाउँका ३८ वर्षीय शंकर सोती र ५० वर्षीय पदम बहादुर बलाल घाइते भएका हुन् । सोतीको ढाड र तिघ्रामा चिथरेकाले अवस्था गम्भीर रहेको इलाका प्रहरी कार्यालय ठाँडाका प्रमुख गणेश नरालले बताए ।
उनको लुम्बिनी अञ्चल अस्पताल बुटवलमा उपचार भइरहेको छ । बलालको हातको औलामा चोट लागेकाले घरमै छन् ।
साँझमा लाइट बालेर जंगलको बाटो हिडिरहेका बेला भालुले आक्रमण गरेको बलालले बताए । पछिल्लो समय शीतगंगाको सिद्धारामा भालुको बिगबिगी छ । एक्लै हिड्न स्थानीयलाई त्रास छ । स्कुल जाँदा र फर्कदा विद्यार्थी एक्लै हिडदैनन् ।
प्रकाशित : फाल्गुन ६, २०७५ १०:५८