पुलले जनजीवन सहज

हरि गौतम

रुकुमपूर्व — भूमे गाउँपालिका–८ कुचिबाङका तुलबहादुर रोका पर्यटकीय क्षेत्र तातोपानीमा नुहाउन पुगे । नुहाएर उनी निश्चिन्त भई घर फर्के । अघिल्ला वर्षमा ज्यान हत्केलामा राखेर पुगिने तातोपानीमा यस वर्षदेखि भने सजिलो भएको छ ।

पुल निर्माणसँगै सिस्ने गाउँपालिका–४ स्थित तातोपानी पुग्न सानीभेरी नदीमाथिको काठको साँघु तर्दा डराउनुपर्ने अवस्थाको अब अन्त्य भएको छ ।

Citizen


सिस्ने गाउँपालिका–६ धाउने र वडा ४ जोड्न सानीभेरीमाथि झोलुंगे पुल बनेपछि तातोपानीमा नुहाउन आउजाउ गर्ने मात्रै होइन अन्य दैनिक कामकाजका लागि नदी तर्नुपर्ने ३, ४, ६ र ७ वडाका बासिन्दालाई पनि सहज भएको छ । पर्यटकीय क्षेत्र तातोपानी पुग्ने, घाँस–दाउराका लागि नदी तर्नुपर्ने तथा विद्यालय जाने/आउनेका लागि पुलले ठूलो राहत दिएको छ ।

सानीभेरी नदीका कारण वर्षौंदेखि नजोडिएका पोखरा र रुकुमकोट अब जोडिएका छन् । सस्पेन्सन ब्रिज डिभिजनले टावरवाला (एन टाइप) झोलुंगे पुल निर्माण गरेपछि सहजभएको हो । हरेक वर्ष लामो बाटो हिँडनुपर्ने तथा हरेक हिउँदमा नदीमाथिको साँघुको भर पर्नुपर्ने बाध्यता पुल बनेसँगै हटेको छ । सो ठाउँमा पुल नहुँदा बर्सेनिजस्तो सर्वसाधारण सानीभेरीमा बग्नुपर्ने अवस्था थियो ।

३ सय ५५ मिटर लामो पुल हिमशिखर/बीएलटी जेभीले बनाएको हो । ०७४ माघमा डिभिजन र ठेकेदार कम्पनीबीच पुल निर्माणका लागि २ करोड ९१ लाख रुपैयाँमा सम्झौता भएको थियो । ०७६ असोजमा निर्माण सकिने गरी सम्झौता भए पनि धाउने–तातोपानी झोलुंगे पुल तोकिएको समयअगावै निर्माण पूरा भएको कम्पनी सञ्चालक नरहरि खड्काले बताए ।

यसअघि पुलको विकल्पमा सानीभेरी नदीमाथि राखिएको काठको सानो साँघुबाट हरेक दिन ३ सय ५० भन्दा बढी सर्वसाधारण आउजाउ गर्छन् । झन्डै ५ हजार रुपैयाँमा काठको साँघु तयार हुन्थ्यो र त्यसको आयु पनि मंसिरदेखि जेठसम्म मात्रै हुन्थ्यो । पुल नहुँदा नाथीगाड र घरेलीका विद्यार्थी नजिकको जनता मावि छाडेर टाढाका विद्यालय पढ्न बाध्य थिए ।

पोखराको तातोपानी नुहाउन तथा हेर्न जानेलाई पनि पुलले सहज बनाएको छ । सिस्ने गाउँपालिका–३ का जनकबहादुर खड्काले पुल बनेपछि नदी वारपार गर्न सजिलो भएको बताए ।

प्रकाशित : वैशाख २, २०७६ ०९:४३
ADVERTISEMENT
प्रतिक्रिया
पठाउनुहोस्
ADVERTISEMENT

भासिएको वर्ष दिनमा पनि बनेन

कान्तिपुर संवाददाता

बर्दिया — गुलरिया–बारबर्दिया नगरपालिका जोड्ने जब्दीघाटस्थित बबई नदीमा भासिएको पुल तत्काल पुनर्निर्माण नहुने भएको छ । पुल पुनर्निर्माणका लागि गुलरिया र बारबर्दिया नगरपालिकाका जनप्रतिनिधिले धेरै पटक भौतिक पूर्वाधार तथा यातायातमन्त्री रघुवीर महासेठलाई दबाब दिए पनि निर्माणको काम अझै सुरु भएको छैन ।

बारबर्दियाका प्रमुख दुर्गाबहादुर थारूले पाँचपटकसम्म काठमाडौं पुगेर मन्त्रीसँग कुरा गर्दा तत्कालै सुरु हुन्छ भन्दै फर्काउने गरेको बताए ।

हस्तान्तरण नहुँदै पुल भासिएपछि अख्तियार दुरुपयोग अनुसन्धान आयोगले पप्पु कन्स्ट्रक्सनका तत्कालीन अध्यक्ष हरिनारायण रौनियार, हालका अध्यक्ष उनका छोरा सुमितलगायत विरुद्ध विशेष अदालतमा बिगोसहित मुद्दा चलाएको छ । पप्पु कन्स्ट्रक्सनले ६ वर्षअघि सुरु गरेको उक्त पुल १६ करोड ६८ लाखमा निर्माण गरेको थियो ।

पुलका १७ स्परमध्ये पूर्वतर्फको एउटा पिल्लर भासिएको छ । पुल भासिएपछि अन्य २ पिल्लर पनि चर्किएका छन् । पुल भासिएको एकसहित ३ पिल्लर पुनर्निर्माण भए यातायात सञ्चालन गर्न सकिने प्राविधिकहरूले सुझाएका छन् । गुलरिया नगरपालिका प्रमुख मुक्तिनाथ यादवले मन्त्रीले आश्वासन दिए पनि काम नभएको बताए । ‘पुल नबन्दा सर्वसाधारण प्रभावित भएका छन्,’ उनले भने, ‘मन्त्रीकै निर्देशनसमेत कसैले नसुनेकाले अब निर्माणको सम्भावना झिनो बन्दै गएको छ ।’

पुल ०७४ साउन २८ गते भासिएको थियो । जब्दीघाटस्थित पुल भासिएपछि उत्तर–दक्षिण जोड्ने दुई नगरपालिकाबीच यातायात पनि विच्छेद भएको छ । पुल पुनर्निर्माण असारभित्र सम्पन्न हुन नसक्ने प्राविधिकले बताए । भासिएको पुलमाथिबाट जबरजस्ती सवारीसाधन गुडाएपछि पुल थप जोखिममा परेको छ ।

प्रकाशित : वैशाख २, २०७६ ०९:४२
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT