बुटवल–भैरहवा सडकमा अब बुद्धका मूर्ति

घनश्याम गौतम

रूपन्देही — बुटवल–भैरहवा ६ लेन सडकको डिभाइडरबीच बुद्धका मूर्ति राख्न सुरु गरिएको छ । भ्रमण वर्ष सुरु भएसँगै त्यसलाई सफल पार्न तिलोत्तमा नगरपालिकाले सडकको बीच भागमा मूर्ति राख्न सुरु गरेको हो । त्यसलाई प्रदेशको उद्योग, पर्यटन, वन तथा वातावरण मन्त्रालयले सहयोग गर्नेछ ।

बुटवलको योगीकुटीमा आइतबार ६ लेन सडकबीच बुद्ध मूर्ति अनावरण गर्दै उद्योग, पर्यटन, वन तथा वातावरणमन्त्री लीला गिरी, तिलोत्तमा नगर प्रमुख वासुदेव घिमिरेलगायत ।तस्बिर : घनश्याम/कान्तिपुर

प्रदेशका उद्योग, पर्यटन, वन तथा वातावरण मन्त्री लीला गिरीले आइतबार तिलोत्तमाको योगीकुटीमा तीन फिट उचाइको बुद्धको मूर्ति अनावरण गरेका छन् । मूर्ति अनावरणसँगै भ्रमण वर्षको आरम्भ भएको उनले बताए । चालु आवमा योगीकुटीदेखि मंगलापुरसम्मको खण्डमा मूर्ति राखिनेछ । त्यसले तिलोत्तमा नगर क्षेत्रको सडकलाई लिटिल बुद्ध र पञ्चम बुद्ध क्षेत्रको पहिचान गराउने तिलोत्तमा नगरपालिका प्रमुख वासु घिमिरेले बताए ।

यसअघि नगरपालिकाले तिलोत्तमाको नगरपालिका खण्डको ६ लेन सडकको दायाँ र बायाँ किनारमा फूल र तरकारी रोपेर हरियाली सडक बनाएको छ । बीचमा बेगमबेली फूलका बिरुवा पनि हुर्कंदै छन् ।

‘हामीले योगीकुटीमा उत्तर फर्काएर बुद्धको मूर्ति राख्यौं,’ प्रमुख घिमिरेले भने, ‘नगरपालिकाको सिमाना कोटिहवामा दक्षिण फर्काएर राख्नेछौं ।’ त्यसले बुटवलबाट प्रवेश गर्ने पर्यटकलाई बुद्ध क्षेत्र सुरु भएको संकेत गर्ने र कटैयाबाट प्रवेश गर्दा सकिएको जानकारी दिनेछ ।

सडकको बीचमा तीन सय मिटरको दूरीमा चालु आवमा २२ मूर्ति राखिनेछ । त्यसका लागि चालु वर्ष नगरपालिकाले ५० लाख रुपैयाँ बजेट विनियोजन गरेको थियो । त्यसमध्ये २३ लाख रुपैयाँ खर्च गर्नेछ । थप २७लाख रुपैयाँ अर्को वर्ष खर्च गरी बुद्धका मूर्ति अन्य नगरपालिका र गाउँपालिकाको समेत सहकार्यमा लुम्बिनीसम्म नै पुर्‍याउने गरी छलफल भइरहेको उनले बताए । नगरपालिकाका प्रवक्ता सुरेन्द्र श्रीले सुन्दर र शान्त नगरपालिकाका रूपमा तिलोत्तमा अघि बढेकाले त्यसैको पहिचान दिने गरी मूर्ति राख्न थालिएको बताए । उनका अनुसारसिमेन्टबाट बनेका मूर्तिको बाहिरी आवरण गोल्डेन रंगलेपहेंलो बनाइनेछ ।

सडकको बीचको डिभाइडरमाथि तीन फिटको बेसमेन्ट बनाएर त्यसमाथि तीन र साढे तीन फिटका मूर्ति राखिने उनले बताए । नगरकार्यपालिका सदस्य तथा बुद्ध मूर्ति व्यवस्थापन समितिका संयोजक एचबी रम्तेलका अनुसार बुद्ध मूर्तिका बीचमा बुद्धका पिता शुद्धोधन र आमा मायादेवी एवं बुद्धसँग सम्बन्धित अन्य सामग्रीसमेत राखिनेछ ।

सडकको डिभाइडरको बीच–बीचमा बुद्धकी आमा मायादेवीका मूर्ति, आमाको काखमा खेल्दै गरेको अवस्थाका बुद्ध र बुबा शुद्धोधनको मूर्ति र बुद्धसँग सम्बन्धित सामग्रीसमेत रहनेछन् । बुद्ध मूर्तिको अनावरण गर्दै प्रदेशका उद्योग, पर्यटन, वन तथा वातावरण मन्त्री लीला गिरीले सडकबीचमा राखिएका बुद्धका मूर्तिले बुटवलदेखि लुम्बिनी क्षेत्रसँगको सम्बन्धलाई जोड्ने मात्र नभई समग्र पर्यटन विकासमा सहयोग पुर्‍याउने बताए ।

प्रकाशित : वैशाख २, २०७६ ०९:४५
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

पुलले जनजीवन सहज

हरि गौतम

रुकुमपूर्व — भूमे गाउँपालिका–८ कुचिबाङका तुलबहादुर रोका पर्यटकीय क्षेत्र तातोपानीमा नुहाउन पुगे । नुहाएर उनी निश्चिन्त भई घर फर्के । अघिल्ला वर्षमा ज्यान हत्केलामा राखेर पुगिने तातोपानीमा यस वर्षदेखि भने सजिलो भएको छ ।

पुल निर्माणसँगै सिस्ने गाउँपालिका–४ स्थित तातोपानी पुग्न सानीभेरी नदीमाथिको काठको साँघु तर्दा डराउनुपर्ने अवस्थाको अब अन्त्य भएको छ ।

सिस्ने गाउँपालिका–६ धाउने र वडा ४ जोड्न सानीभेरीमाथि झोलुंगे पुल बनेपछि तातोपानीमा नुहाउन आउजाउ गर्ने मात्रै होइन अन्य दैनिक कामकाजका लागि नदी तर्नुपर्ने ३, ४, ६ र ७ वडाका बासिन्दालाई पनि सहज भएको छ । पर्यटकीय क्षेत्र तातोपानी पुग्ने, घाँस–दाउराका लागि नदी तर्नुपर्ने तथा विद्यालय जाने/आउनेका लागि पुलले ठूलो राहत दिएको छ ।

सानीभेरी नदीका कारण वर्षौंदेखि नजोडिएका पोखरा र रुकुमकोट अब जोडिएका छन् । सस्पेन्सन ब्रिज डिभिजनले टावरवाला (एन टाइप) झोलुंगे पुल निर्माण गरेपछि सहजभएको हो । हरेक वर्ष लामो बाटो हिँडनुपर्ने तथा हरेक हिउँदमा नदीमाथिको साँघुको भर पर्नुपर्ने बाध्यता पुल बनेसँगै हटेको छ । सो ठाउँमा पुल नहुँदा बर्सेनिजस्तो सर्वसाधारण सानीभेरीमा बग्नुपर्ने अवस्था थियो ।

३ सय ५५ मिटर लामो पुल हिमशिखर/बीएलटी जेभीले बनाएको हो । ०७४ माघमा डिभिजन र ठेकेदार कम्पनीबीच पुल निर्माणका लागि २ करोड ९१ लाख रुपैयाँमा सम्झौता भएको थियो । ०७६ असोजमा निर्माण सकिने गरी सम्झौता भए पनि धाउने–तातोपानी झोलुंगे पुल तोकिएको समयअगावै निर्माण पूरा भएको कम्पनी सञ्चालक नरहरि खड्काले बताए ।

यसअघि पुलको विकल्पमा सानीभेरी नदीमाथि राखिएको काठको सानो साँघुबाट हरेक दिन ३ सय ५० भन्दा बढी सर्वसाधारण आउजाउ गर्छन् । झन्डै ५ हजार रुपैयाँमा काठको साँघु तयार हुन्थ्यो र त्यसको आयु पनि मंसिरदेखि जेठसम्म मात्रै हुन्थ्यो । पुल नहुँदा नाथीगाड र घरेलीका विद्यार्थी नजिकको जनता मावि छाडेर टाढाका विद्यालय पढ्न बाध्य थिए ।

पोखराको तातोपानी नुहाउन तथा हेर्न जानेलाई पनि पुलले सहज बनाएको छ । सिस्ने गाउँपालिका–३ का जनकबहादुर खड्काले पुल बनेपछि नदी वारपार गर्न सजिलो भएको बताए ।

प्रकाशित : वैशाख २, २०७६ ०९:४३
पूरा पढ्नुहोस्
प्रतिक्रिया
पठाउनुहोस्
ADVERTISEMENT