भित्र नगरसभा बाहिर जुलुस

कान्तिपुर संवाददाता

परासी — पश्चिम नवलपरासीको सुनवल नगरपालिकामा नगरसभा संचालन भइरहँदा बाहिर स्थानीयले नारा–जुलुस गरेका छन् । आफ्नो वडामा परेको अस्पताल निर्माणको रकम रकमान्तर गरेको विरोधमा वडा ७ र ८ का स्थानीयले खबरदारी गरेका हुन् ।

वैशाख १९ गते खबरदारी गर्दै निर्णय सच्याउन समय दिएका स्थानीय आइतबारसम्म माग पूरानभएपछि नारा–जुलुसमा उत्रिएका हुन् ।

Citizen


नारा–जुलुसका बाबजुद नगरसभाले रकमान्तरको निर्णय गरेपछि असन्तुष्ट स्थानीयले ढुंगा बर्साएका थिए । त्यसले वडा १२ का अध्यक्ष यमनाथपाण्डेको सवारीमा क्षति पुगेको छ ।

वडा ८ मा रहेको स्वास्थ्य चौकीको स्तरोन्नति गर्न आएको बजेट वडा ५ मा खर्च गर्ने निर्णय नगरसभाले गरेको थियो । त्यसको विरोधमा ७ र ८ का स्थानीयले नाराबाजीसहित नगरपालिका घेराउ गरेका हुन् ।

सहरी विकास तथा भवन निर्माण आयोजनाबाट स्वास्थ्य चौकी स्तरोन्नति गरेर १५ शय्याको गराउन सम्बन्धित विभागबाट पत्र आए पनि कार्यपालिकाले स्वास्थ्य चौकी नै नभएको स्थानमा नयाँ भवन र स्वास्थ्य संस्था बनाउन खर्च गर्न लागेको स्थानीयको आरोप छ । ‘बजारदेखि भित्र ग्रामीण क्षेत्र भनेर हामीलाई उपेक्षा गरियो,’ वडा ७ का रमाकान्त शर्माले भने, ‘स्तरोन्नति गर्न भनिएको रकम रकमान्तर गर्न पाइँदैन । अहिलेकै स्थानमा रहेको स्वास्थ्य चौकीलाई सुविधासम्पन्न गराउने निर्णय नभएसम्म हाम्रो संर्घष जारी रहन्छ ।’

नगर कार्यसमितिले भने अहिले रहेको स्वास्थ्य चौकीलाई स्तरोन्नति गर्ने, एम्बुलेन्स र सुविधासम्पन्न बर्थिङ सेन्टरका रूपमा विकास गरेर अस्पताल सबैको पायक पर्ने स्थानमा निर्माणका लागि पहल गरिरहेको दाबी गरेको छ ।

सुनवल नगरपालिकाका प्रवक्ता कृष्णप्रसाद देवकोटाद्वारा जारी विज्ञप्तिमा ०७५ असोज १ गते नगरपालिकाको पूर्ण बैठकले वडा ३ र ५ को सिमानामा रहेको मिनी बनकट्टीमा १५ शय्याको अस्पताल निर्माण गर्ने र साबिकको सुनवल गाविसको स्वास्थ्य चौकीलाई स्तरोन्नति गरेर बजेट विनियोजन गर्ने निर्णय भएको उल्लेख छ ।

‘जनप्रतिनिधिमाथिको आक्रमण निन्दनीय छ,’ उनले भने, ‘दोषीमाथि तुरुन्त कारबाही गरिनुपर्छ ।’ रामनगर, सुनवल र स्वाठी गाउँपालिका मिलेर सुनवल नगरपालिका बनेको हो । सबैलाई पायक पर्ने स्थानमा अस्पताल निर्माण गर्नुपर्ने भन्दै नगरपालिकाले एकमतले निर्णय गरेको थियो ।

प्रकाशित : वैशाख ३१, २०७६ १०:५८
ADVERTISEMENT
प्रतिक्रिया
पठाउनुहोस्
ADVERTISEMENT

वडा कार्यालय र शिक्षालय एउटै भवनमा

कान्तिपुर संवाददाता

बर्दिया — भौतिक संरचना निर्माण नहुँदै गुलरिया–१० स्थित नेपाल राष्ट्रिय माध्यमिक विद्यालय प्रयागपुरलाई प्राविधिक शिक्षा तथा व्यावसायिक परिषद्ले नियमविपरीत आईएस्सी एजी पढाइको स्वीकृत दिएपछि विद्यार्थी सास्ती भोगेका छन् ।

वडा कार्यालयको होहल्लाबीच विद्यार्थी यहाँ पढ्न बाध्य भएका हुन् । सदरमुकामस्थित ज्योति पुस्तकालयमा रहेको वडा ७ र ८ को कार्यालयमुनि रहेको भवनमा आईएस्सी एजी प्रथम वर्षको पढाइ हुने गरेको छ ।

प्रयागपुर माविमा प्राविधिक शिक्षाका लागि भौतिक संरचना नभएका कारण करिब तीन किमि दूरीमा रहेको वडा कार्यालयको पहिलो तलामा विद्यार्थी जान बाध्य छन् । चार कोठे भवन निर्माण नभएका कारण विद्यार्थी यहाँ आउन बाध्य भएका हुन् । १७ जनाले अध्ययन गरिरहेका छन् ।

शिक्षा शाखा, गुलरियाका अधिकृत सतिश यादवले संरचना नहेरी स्वीकृत दिंदा विद्यार्थीको पढाइमा असर परेको बताए । विषयगत शिक्षक पाँच जनामध्ये एक जना नेरामावि प्रयागपुरका छन् । प्राविधिक शिक्षालयमा तीन जना कर्मचारी रहेका छन् । शिक्षकलाई पढाएबापत प्रतिघन्टी ३ सय ५० रुपैयाँ दिने गरिएको छ । शिक्षा अधिकृत यादवले हरेक विद्यार्थीले तीन वर्षका लागि १ लाख ८० हजार रुपैयाँ शुल्क बुझाउँदैआएको बताए ।

ज्योति पुस्तकालय गुलरियाको भवनमा दुई वडा कार्यालय र प्राविधिक क्याम्पस संचालन हुँदै आएका छन् । प्राविधिक शिक्षा तथा व्यावसायिक परिषद्बाट संचालित आईएस्सी प्रथम वर्षको पढाइ वडा कार्यालयको पहिलो तलामा भइरहेको छ ।

नगरपालिकाका मेयरमुक्तिनाथ यादवले साउनदेखि नयाँ भवनमा प्राविधिक शिक्षालय स्थान्तरण गरिने बताए । नेपाल राष्ट्रिय मावि, प्रयागपुरबाट संचालित प्राविधिक शिक्षाको पढाइ भौतिक संरचना नभएका कारण ज्योति पुस्तकालयको भवनमा भइरहेको हो ।

प्रकाशित : वैशाख ३१, २०७६ १०:५७
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT