भ्रमण वर्षमा थपिए एसी बस

घनश्याम गौतम

रूपन्देही — बुटवल–भैरहवा सडक ६ लेनमा विस्तार भएपछि यस क्षेत्रमा नयाँ र सुविधासहितका बस थप्ने प्रतिस्पर्धा चल्न थालेको छ । त्यसले सार्वजनिक यातायात भरपर्दो र यात्रुलाई सुविधा पुगेको छ ।

लुम्बिनी भ्रमण वर्षको अवसर पारेर शनिबारदेखि बुटवलबाट भैरहवा, लुम्बिनीसहितका विभिन्न रुटमा चल्ने गरी १५ बस थपिएका छन् ।

लुम्बिनी भिजन लिमिटेडले सञ्चालन गरेका एसी, सीसीक्यामेरा, रिचार्ज कार्ड र वाइफाई सुविधासहितका बसको प्रदेश ५ का मुख्यमन्त्री शंकर पोखरेलले शुभारम्भ गरे । बस ५२ सिट क्षमताका छन् । आफैंले उद्घाटन गरेका एसी बस चढेर मुख्यमन्त्री पोखरेल शनिबारदेखि नै सुरु भएको प्रदेश सरकारको लुम्बिनी भ्रमण वर्ष उद्घाटन कार्यक्रममा सहभागी हुन लुम्बिनी पुगेका थिए । बुटवल–भैरहवाको प्रचण्ड गर्मीमा एसीसहितका बसले सुनौली, भैरहवा र लुम्बिनी जाने/आउने यात्रुलाई राहत दिएको छ ।

मुख्यमन्त्री पोखरेलले लुम्बिनी क्षेत्रमा चल्ने यातायात क्षेत्रलाई पर्यटनमैत्री बनाउन आग्रह गरे । ‘पर्यटन विकासमा यातायात क्षेत्रको भूमिका सबैभन्दा बढी हुन्छ,’ उनले भने, ‘लुम्बिनी क्षेत्रमा दिइने सेवा सुविधाले पर्यटक आगमन विस्तारमा टेवा पुग्नेछ ।’ हरेक यातायात क्षेक्रलाई विश्वसनीय र सुविधायुत्त बनाउन उनले आग्रह गरे ।

भिजन लुम्बिनीका अध्यक्ष जगतबहादुर पोखरेलले आठ करोड लगानीमा बस सञ्चालन सुरु गरिएको बताए । बस बुटवल, भैरहवा, सुनौली, लुम्बिनी, सेमलार, बर्दघाट रूटमा चल्नेछन् । ‘बुद्ध सर्किटमा पनि चलाउने गरी हामीले अनुमति लिएका छौं,’ उनले भने, ‘सडकको अवस्था अध्ययन गरेर त्यस क्षेत्रमा पनि नियमित सेवा दिनेछौं ।’ लुम्बिनी भ्रमण वर्षभर बुद्ध सर्किटलाई विशेष प्राथमिकता दिएर बस चलाउने उनले बताए ।

यसअघि स्थानीय रुट बुटवल–सुनौली सञ्चालन गर्ने गरी लुम्बिनी मेट्रो सिटी र सिद्धार्थ यातायात प्रालिले पनि एसीसहितका बस सञ्चालनमा ल्याएको छ । सरकारले सिन्डिकेट अन्त्य गर्ने घोषणा गरेसँगै व्यवसायीले प्रतिस्पर्धामा सुविधासहितका बस थप्दै गएका छन् । अहिले बुटवल–भैरहवा सडकमा चल्ने सुविधायुक्त एसी बसको संख्या ५० पुग्न थालेको छ । सडक ६ लेन बनेसँगै डेढ घण्टाको यात्रा छोटिएर आधा घण्टामै झरेको छ ।

यस क्षेत्रमै पहिलोपटक एसी सुविधासहितको सिटी बस सेवा सुरु गर्ने सिद्धार्थ यातायात प्रालिका अध्यक्ष सूर्य सारू मगरले यात्रुको चाप बढेपछि बस, सुविधा र क्षेत्र पनि थपिंदै लगेको बताए । प्रालिले साउनदेखि नै एसी सेवा सुरु गरेको थियो । सुरुमा बुटवल–सुनौली सञ्चालन गरेको प्रालिले अहिले रूपन्देही जिल्लाभर र काठमाडौंसम्म पनि सेवा थपेको छ । प्रालिसँग अहिले २५ बस छन् ।

‘हामीले लुम्बिनी र सुनौली नाकालाई केन्द्रित गरेर एसी बस सेवा सुरु गरेका हौं,’ उनले भने, ‘सिटी बसमा एसीसहितको सुविधा र प्रालि खोल्ने हामी नै पहिलो हौं ।’ प्रदेश र काठमाडौंसम्मको सेवा विस्तारको तयारी भइरहेकाले थप पाँच बस बुकिङ भएको पनि उनले बताए । यो प्रालिले पाँच करोड लगानीमा सेवा सुरु गरेको थियो ।
४० सिट क्षमताका १० गाडी सञ्चालन गर्दै आएको मेट्रो सिटीका अध्यक्ष धनबहादुर अधिकारीले बुटवलको गोलपार्कदेखि सुनौलीसम्म, बुटवलदेखि देवदह र बर्दघाटसम्म सुविधायुक्त बस चल्दै आएको बताए । प्रालिले प्रदेश ५ भर सेवा दिने तयारी गरेको छ ।

‘बुद्ध जन्मस्थल लुम्बिनीलाई केन्द्र बनाएर बुटवल–भैरहवा, बर्दघाट–भैरहवा अहिले बस चलिरहेका छन्,’ उनले भने, ‘छिट्टै नै यो सेवा प्रदेश ५ भर विस्तार गर्दैछौं ।’ प्रतिस्पर्धाका रूपमा सुविधासहित थपिएका बसले यात्रुलाई सुरक्षित यात्रामा सजिलो बनाएको सुरक्षित यात्रा अभियान नेपालका महासचिव दिनेश पाण्डेले बताए ।

प्रकाशित : जेष्ठ ५, २०७६ १०:४२
प्रतिक्रिया
पठाउनुहोस्
ADVERTISEMENT
ADVERTISEMENT

सुरु भएन योजना छनोट

कान्तिपुर संवाददाता

बर्दिया — स्थानीय सरकारले योजना छनोटका लागि चौथो चरण पूरा गरिसक्नुपर्थ्यो । यहाँका सरकार भने त्यसबारे बेखबर छन् । यो समय आउँदो आर्थिक वर्षका लागि योजना छनोटको हो ।

बस्तीस्तरको योजना छान्ने कामको सुरुआत भएको छैन । पुस मसान्तसम्म बजेटको पूर्वतयारी तथा आयव्ययको प्रक्षेपणको तथ्यांक संघीय सरकारलाई पेस गरिसक्नुपर्ने नीति छ । ढिलाइका कारण बस्तीस्तरका योजना छनोटमा समस्या हुन पुगेको हो ।

पहिलो चरणअन्तर्गत गएको चैत मसान्तभित्रै बजेट सिलिङ प्रदेश सरकारलाई पठाइसक्नुपर्छ । तर, संघीय सरकारले समयमै आयव्यय प्रक्षेपण पठाउन सकेनन् । दोस्रो चरणमा स्थानीय सरकारले आफूसँग भएको स्रोत तथा अनुमान बजेटको वैशाख १० गतेभित्रै तयारी गर्नुपर्छ । त्यसलगक्तै बस्ती तथा योजना छनोट कार्यत्रम सुरु गर्नुपर्छ । वैशाख मसान्तभित्रै बस्तीमै पुगेर विकासका योजना छनोट गरिसक्नुपर्ने प्रावधान छ । तर, पहिलो चरणको काममा पालिकाहरू उदासीन देखिएका कारण बस्तीस्तरको काम प्रभावित हुने देखिएको छ ।

बजेटको पूर्वतयारी नगरिए बस्तीका योजना कार्यान्वयनमा समस्या हुनेछ । स्थानीय सरकारले भने बजेट प्रक्षेण तथ्यांक संघीय सरकारलाई पठाउने तयारीमा रहेको दाबी गरेको छ । गुलरिया नगरपालिकाका सूचना अधिकारी अजय ठाकुरले कर्मचारी संयोजनलगायतका कारणले बस्तीस्तरको योजना छनोट प्रक्रियामा ढिलाइ भएको बताए । ‘जनशक्ति अभाव छ । संयोजनका कामहरू बाँकी छन्,’ उनले भने, ‘त्यसैले तोकिएको समयमा काम गर्न नसकिएको हो । छिट्टै योजना छनोटको काम सुरु हुन्छ ।’

त्यस्तै, चौथो चरणमा बडा तहमा छनोट भएका योजनाको प्राथमिकीकरण गर्नुपर्नेछ । जुन जेठ १५ गतेभित्रै गरिसक्नुपर्नेछ । पाँचौं चरणमा असार ५ गतेभिक्रै बजेट तथा कार्यत्रम तर्जुमा गर्नुपर्ने नीति छ । छैटौं चरणमा गाउँ तथा नगरपालिकाको बजेट तथा कार्यक्रम स्वीकृत गरी असार १० गतेभित्रै सक्नुपर्नेछ ।

सातौं चरणमा गाउँ तथा नगरसभाबाट स्वीकृत नीति तथा कार्यक्रम कार्यान्वयन गर्नुपर्नेछ । विकासको मुटु मानिने बस्तीस्तरको योजना छनोट गर्न स्थानीय सरकारले अनुदार देखिएका कारण योजना कार्यान्वयनमा समस्या हुने देखिएको छ ।

स्थानीय सरकार बस्ती नपुग्दा त्यहाँका योजना गाउँमै सीमित छन् । स्थानीय सरकार गठन हुनुअगावै योजना छनोटको काम मंसिर महिनाबाटै सुरु हुने गरेको थियो । योजना तर्जुमा फ्रक्रियाका चरण अवलम्बनबिना स्थानीय तह सशत्त रूपमा सबल हुन सक्दैनन् ।

बाँसगढी नगरपालिकाका सूचना अधिकारी शेरबहादुर केसीले पनि विभिन्न कारणले योजना छनोटमा ढिलाइ भएको बताए । उनका अनुसार वडास्तरीय योजना छनोटको काम केही दिनमै सुरु हुनेछ । ‘अब केही दिनमै योजना छनोटको काम हुन्छ,’ उनले भने, ‘ढिलाइ भएको छ । तर, समयमै काम सक्ने कोसिस गर्छौं ।’

बर्दियामा गुलरिया, बाँसगढी, बारबर्दिया, राजापुर, ठाकुरबाबा र मधुवन नगरपालिका छन् । त्यस्तै, गेरुवा र बढैयाताल गाउँपालिका रहेका छन् । तर, यहाँका स्थानीय सरकार भने योजना छनोटमा ढिलाइ गरिरहेका छन् । पहिलो चरण नै पूरा नगर्दा अन्य चरणमा गर्नुपर्ने काम समयमै सम्पन्न गर्न समस्या देखिएको छ ।

योजना छनोट प्रक्रियाका चरण एकअर्काका परिपूरक मानिन्छन् । ‘बजेटको पूर्वतयारी तथा आयव्यय प्रक्षेपण समयमा नगरिने हो भने संघीय सरकारबाट आउने बजेट प्रभावित हुन सक्छ ।

प्रकाशित : जेष्ठ ५, २०७६ १०:४१
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT