नहर पुरेर सडक, सिंचाइ ठप्प

कमल पन्थी

बर्दिया — विकासका नाममा नहर पुरेर सडक निर्माण गर्दा यहाँका सयौं घरधुरी किसान सिंचाइ सुविधाबाट वञ्चित भएका छन् । राष्ट्रिय गौरवको बबई सिंचाइ आयोजनाको प्रशाखा नहर सडक स्तरोन्नतिका नाममा पुरिएको छ । बारबर्दिया नगरपालिका–१० को झन्डै दुई सय बिघा खेत नहर पुरिएसँगै सिंचाइ सुविधाबाट वञ्चित भएको हो । 

करिब ७ किमि सडक खण्डमा पर्ने प्रशाखा नहर पुरिएपछि दक्षिणतर्फका खेतमा सिंचाइ सुविधा ठप्प भएको स्थानीयले बताए । नहर पुरिएपछि किसानले धानको बीउ राख्न पाएका छैनन् । बारबर्दिया नगरपालिका–१० स्थित बैदी सगुन मार्ग सडक स्तरोन्नतिका नाममा आयोजनाले प्रशाखा नहर पुरेपछि सिंचाइ सुविधा ठप्प भएको हो ।

उक्त नगरपालिकाको करिब २ करोड रुपैयाँ लागतमा निर्माण भइरहेको सडक फराकिलो गर्ने क्रममा परम्परागत नहर पुरेर दुवैतर्फ खाडल खनिँदा दुई दर्जनभन्दा बढी घर जोखिममा परेका छन् । नगरपालिका र ठेकेदार कम्पनीले जबर्जस्ती नहर पुरेको आरोप स्थानीयको छ । १५ मिटर फराकिलो सडक निर्माण गर्दा नहर पुर्दै स्तरोन्नति गरिएको छ ।

सडकका दुवैतर्फ खाडल खनेर माटोले सडक पुरिएको स्थानीय डमरु खत्रीले बताइन् । ‘खाडल खनेका कारण घर नै जोखिममा परेको छ,’ उनले भनिन्, ‘विकासका नाममा नहर पुर्ने र घरै जोखिममा पार्ने काम गरिएको छ ।’ स्थानीय डम्बरबहादुर खडकाका अनुसार पुरानो सडक संरचनामा १० मिटरभित्र नहर बनेको थियो । ‘अहिले त प्रशाखा नहरको नामोनिसान नै छैन,’ उनले भने, ‘ठेकेदार कम्पनीले जथाभाबी खन्दा घर ढल्ने अवस्थामा पुगेको हो ।’

प्रशाखा नहर पुरिएपछि यहाँका बासिन्दाको सिंचाइ सुविधा र घर जोखिममा परेका हुन् । बारबर्दिया–१० का कृष्ण खडकाले सडक फराकिलो गर्ने क्रममा माटो सडकमा पुरिएको बताए । पानी पर्दा खाडल बनाइएका ठाउँको माटो खसेर धेरै घर ढल्ने जोखिममा रहेको उनले बताए । सडकको दायाँबायाँ पक्की नाला बनाउने कुनै योजना छैन ।

राष्ट्रिय गौरवको बबई सिंचाइ आयोजनाले भित्री नहर निर्माणका नाममा डोजर लगाई सडक पुर्ने काम गर्न थालेको स्थानीयको आरोप छ । बारबर्दिया नगरपालिकाअन्तर्गत रम्मापुर, औरी, जब्बरपुरलगायत ठाउँमा सडक निर्माण गर्दा नहर पुरिएको बबई सिंचाइ आयोजनाले जनाएको छ । आयोजनाका प्रमुख कुन्जनभक्त श्रेष्ठले सडक निर्माणका नाममा परम्परागत कुलो मासिँदा सिंचाइ सुविधा पुर्‍याउन समस्या भएको बताए ।

प्रकाशित : जेष्ठ २८, २०७६ ०९:४८
ADVERTISEMENT
प्रतिक्रिया
पठाउनुहोस्
ADVERTISEMENT

मध्यपहाडी लोकमार्ग : दैलेख खण्डमा बल्ल कालोपत्रे

केही स्थानमा मुआब्जाका कारण सडक निर्माण रोकिएको थियो 
३१ घर हटाउन मुआब्जा दिने तयारीमा आयोजना
ज्योति कटुवाल

दैलेख — लामो समयसम्म विवादमा रहेको मध्यपहाडी लोकमार्गअन्तर्गत विभिन्न स्थानमा कालोपत्रेको काम सुरु भएको छ । केही स्थानमा मुआब्जाका कारण सडक निर्माणको काम प्रभावित बनेको थियो ।

मध्यपहाडी लोकमार्गको दैलेख खण्डस्थित नारायण नगरपालिका १, लोहोरेमा कालोपत्रे गर्दै मजदुर । तस्बिर : ज्योति/कान्तिपुर

आयोजना कार्यालयका अनुसार विवाद समाधानसँगै कालोपत्रेको काम सुरु भइसकेको छ । उक्त खण्डमा काम अघि बढाउँदा ३१ घर भत्काउनुपर्ने देखिएकाले स्थानीयलाई मुआब्जा दिने तयारी भइरहेको छ । दैलेख खण्डमा अहिले ५१ किमि कालोपत्रेका लागि टेन्डर प्रक्रिया भइसकेको छ । मध्यपहाडी लोकमार्ग दैलेख खण्डका प्रमुख तुलाराम शर्माले असारसम्म १० किमि कालोपत्रे सक्ने योजना रहेको जनाए । ५१ किमि कालोपत्रेको काम ४ भागमा विभाजन गरिएको उनको भनाइ छ ।

लोहोरेदेखि झुप्रेसालसम्म करिव १० किमि खण्डको जिम्मा केएस/रमण जेभीले २४ करोड ८४ लाख रुपैयाँमा लिएको छ । उक्त कम्पनीले कालोपत्रेको काम २०७७ भदौ ३ गतेसम्म सक्ने गरी सम्झौता गरेको छ । कम्पनीले कालोपत्रेबाहेक ४५ प्रतिशत काम सकेको जनाएको छ । झुप्रेसालदेखि मनघरसम्म ११ दशमलव ४ किमिको कालोपत्रे शर्मा/गजुरमुखी जेभीले २०७७ जेठमा सक्ने गरी जिम्मा लिएको छ ।

३१ करोड ७२ लाखमा ठेक्का पाएको कम्पनीले कालोपत्रेका लागि ४० प्रतिशत काम सकिसकको जनाएको छ । त्यस्तै बडलम्जीदेखि पादुकासम्म केएस/रमण जेभीले १३ दशमलव ३ किमिको ठेक्का लिएको छ । २०७७ जेठ १४ सम्म कालोपत्रे गर्ने गरी उसले २६ करोड ९१ लाख रुपैयाँमा सम्झौता गरेको छ । अहिलेसम्म करिब २० प्रतिशत काम सकिएको कम्पनीले जनाएको छ ।

दैलेख पश्चिमस्थित रामघाट पुलदेखि पादुकासम्म १५ दशमलब ८किमि सडक कालोपत्रेका लागि पम्पु/हाई हिमालयन जेभीलाई ४२ करोड १० लाखमा ठेक्का दिइएको छ । २०७७ जेठ १४ मा सक्ने गरी कम्पनीले ४० प्रतिशत काम सकेको जनाएको छ ।
दैलेख खण्ड प्रमुख शर्माले कालोपत्रे गर्न लागिएको ४ खण्डमा सडक चौडाको काम सकिएको जानकारी दिए ।

ग्याबिन र मेसनरी वाल, ह्युम पाइपलगायत काम जारी रहेको उनको भनाइ छ । दैलेख सदरमुकाममा १० मिटरमा कालोपत्रे गर्ने सहमति भएको आयोजना कार्यालयले जनाएको छ । सदरमुकामनजिक जाहरकोटमा सडक निर्माणको काम अवरुद्ध भएकाले समन्वय गरी काम थालिने शर्माले जानकारी दिए । जाहरकोट खण्ड फराकिलो भए जिल्लामा मध्यपहाडी लोकमार्ग आयोजना सफल हुने आयोजना कार्यालयले जनाएको छ ।

प्रकाशित : जेष्ठ २८, २०७६ ०९:४८
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT