बर्दियामा ७० प्रतिशत रोपाइँ

कान्तिपुर संवाददाता

बर्दिया — अन्न भण्डार मानिने बर्दियामा ७० प्रतिशतभन्दा बढी रोपाइँ भएको छ  । सिंचाइ सुविधा नभएको जमिनमा अकाशे पानीको भरमा रोपाइँ भइरहेको हो  ।

कृषि ज्ञान केन्द्र नेपालगन्जका प्रमुख सागर ढकालले बर्दियाका धेरै ठाउँमा रोपाइँ सम्पन्न भएको बताए ।


जिल्लाको पश्चिम क्षेत्र राजापुर, बारबर्दिया, ठाकुरबाबा, मधुवन नगरपालिका क्षेत्रमा बढी रोपाइँ भएको छ । बर्दियाको पूर्वी क्षेत्र बाँसगढी नगरपालिका र बढैयाताल गाउँपालिकामा केही कम रोपाइँ भएको छ ।

केही दिनयता पानी परेकाले किसान अहिले रोपाइँको चटारोमा छन् । ‘बर्दियामा सिंचाइ सुविधा भएकाले बढी रोपाइँ भएको हो,’ कृषि ज्ञान केन्द्रका प्रमुख ढकालले भने, ‘सिंचाइ सुविधा नभएको क्षेत्रमा पनि अहिले पानी परिरहेकाले धमाधम रोपाइँ चलिरहेको छ ।’

प्रकाशित : असार २९, २०७६ १५:३७
प्रतिक्रिया
पठाउनुहोस्
ADVERTISEMENT

६ वर्षमा पनि बनेन पुल

कान्तिपुर संवाददाता

रुकुम पूर्व — सिस्ने गाउँपालिकाको केन्द्र रुकुमकोटदेखि भुमे गाउँपालिकाको केन्द्र खाबाङबगर हुँदै बागलुङ जिल्लाको सीमासम्मको मध्यपहाडी लोकमार्गको अधिकांश खण्ड कालोपत्रे भइसकेको छ  । कालोपत्रेको काम बाँकी रहेको खण्डमा पनि धमाधम काम भइरहेको छ  ।

तर, अहिले पनि रुकुमकोटदेखि खाबाङबगरसम्म सरर गाडी गुड्दैनन् । समयमै पुल नबनेका कारण सर्वसाधारणले दुःख पाइरहेका हुन् । सिस्ने र भुमे गाउँपालिकाको सीमाका रूपमा रहेको रुकुमगाडमा बन्ने पुल निर्माणमा ढिलाइ हुँदा हरेक वर्षामा सर्वसाधारणले दुःख पाइरहेका छन् ।

यस वर्षको वर्षा सुरु भएपछि पनि सर्वसाधारणले उही नियति बेहोर्नुपरेको छ । सिस्ने र भुमे गाउँपालिका जोड्ने रुकुमगाडमाथि बन्नुपर्ने रेलीखोलाको मोटरेबल पुल २ वर्षअघि नै निर्माण सम्पन्न हुनुपर्ने सम्झौता छ । तर, हालसम्म पनि उक्त पुल नबन्दा सडक राम्रो बन्दा पनि यात्रुका वर्षे दुःख भने उस्तै छन् ।


६ वर्षअघि उक्त पुल निर्माणका लागि सहिद मार्ग आयोजनासँग सम्झौता भएको थियो । ३ करोड ७९ लाख २१ हजार ७ सय रुपैयाँमा याकथुम्हाङ/बीबी जेभी निर्माण सेवाले ठेक्का सम्झौताअनुसार ०७४ असोज २० गतेभित्रै यो पुल हस्तान्तरण गरिसक्नुपर्ने थियो । निर्माण कम्पनीका प्रतिनिधि टीका तामाङले अबको एक महिनामा पुल पूरा हुने बताए ।


२ वटा स्ल्याप ढलान गरिसकेको र एउटा मात्रै बाँकी रहेको उनले बताए । डिजाइन परिवर्तन गर्न खोज्दा पुल निर्माणमा ढिलाइ भएको निर्माण कम्पनीको दाबी छ । पुल नबनेकै कारण दैनिक सयौं यात्रुको यात्रा प्रभावित भएको छ ।

प्रकाशित : असार २९, २०७६ १५:३६
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT