मुद्दा फर्स्योट बढ्यो

कान्तिपुर संवाददाता

प्यूठान — जिल्ला अदालतमा मुद्दा फर्स्योटको संख्या बढेको छ । वार्षिक योजना बनाएर न्याय सम्पादन गर्न थालेपछि मुद्दा फर्स्योटको दर बढेको हो ।

आर्थिक वर्ष ०७३/७४ मा ५९ दशमलव ८६ प्रतिशत मुद्दा फर्स्योट भएको थियो । आव ०७४/७५ मा जिम्मेवारी सरी आएका १ सय २०, नयाँ दर्ता ३ सय ६ मध्ये ३ सय २० फर्स्योट भएर ७५ दशमलव ११ प्रतिशत मुद्दा फर्स्योट भए । आव ०७५/७६ मा जिम्मेवारी सरी आएका १ सय ६, नयाँ दर्ता ३ सय ८० मध्ये ३ सय ८० मुद्दा फर्स्योट भए । मुद्दा प्रतिशत संख्या बढेर अहिले ७८ दशमलव १८ रहेको जिल्ला न्यायाधीश विष्णुप्रसाद गौतमले बताए ।
यसपालि न्यायपालिकाको चौथो पन्चवर्षीय रणनीतिक योजनाअनुसार न्याय सम्पादनलाई अझ प्रभावकारी बनाइने गौतमले बताए । छिटोछरितो न्याय सम्पादन, न्यायमा सबैको पहुँचमा अभिवृद्धि, अदालत व्यवस्थापनमा सुदृढीकरण, न्यायिक जनशक्तिको कार्य संस्कृतिमा सुधार, कानुनी सहायतालाई प्रभावकारी आदिमा जोड दिइएको छ । आव ०७६/७७ मा नयाँ मुद्दा ३ सय ४३ दर्ता हुने अनुमान गरेको गौतमले बताए । यसमध्ये कम्तीमा २ सय ५९ फर्स्योट गर्ने लक्ष्य लिएर कार्यक्रम बनाएको उनले जनाए । यस वर्ष जिल्लाका ९ वटै स्थानीय तहका न्याय समितिलाई तालिम, अर्धन्यायिक निकाय जिल्ला प्रशासन, जिल्ला वन डिभिजन र मालपोत कार्यालयमा अनुगमन गर्ने, जिल्लाका सञ्चारकर्मीसँग भेटघाट गरी प्रगतिको समीक्षा गर्ने, जिल्लाका ४ स्थानमा न्यायमा बाह्य पहुँच बढाउन स्थानीय समुदायसँग छलफललगायतका कार्यक्रम बनाएको छ । अदालतमा यस वर्ष सरी आएका मुद्दा एक वर्षभन्दा पुराना नरहेको जनाएको छ । मुद्दा फैसला कार्यान्वयन ७५ प्रतिशत पुगेको अदालतले जनाएको छ ।

प्रकाशित : श्रावण १९, २०७६ १२:०६
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

दूध उत्पादनमा दुई र ढुवानीमा तीन रुपैयाँ अनुदान

अमृता अनमोल

(बुटवल) — प्रदेश सरकारले दूध उत्पादनमा लागेका किसानलाई झन्डै ५ रुपैयाँसम्म उत्पादनमा आधारित अनुदान दिन थालेको छ । त्यसले उत्पादन लागतअनुसार मूल्य नपाएका किसान उत्साहित छन् । 

भूमि व्यवस्था, कृषि तथा सहकारी मन्त्रालयले किसान समूह, कृषि सहकारी संस्था तथा निजी कम्पनीमार्फत दूध उत्पादनमा १ रुपैयाँ ९९ पैसा र ढुवानीमा ३ रुपैयाँ अनुदान दिन थालेको हो । यसबाट गत वर्ष प्रदेशका एक लाख बढी किसान लाभान्वित भएका छन् । प्रदेशका २६ दुग्ध उत्पादक सहकारी संस्थाले उत्पादनमा आधारित अनुदान पाएका छन् ।

मन्त्रालयले १२ जिल्लाका धेरै दूध उत्पादन गर्ने सहकारी छनोट गरी २ करोड ४९ लाख ४४ हजार रुपैयाँ अनुदान वितरण गरेको हो । पशुपक्षी महाशाखा प्रमुख प्रदीप शर्माले यसले दूध उत्पादक किसानलाई प्रोत्साहन पुगेको बताए ।

प्रदेशका १२ कृषि सहकारी संस्था तथा किसान समूहलाई मिल्क ट्यांकर पनि प्रदान गरेको छ । हरेक जिल्लाबाट एक संस्था छनोट गरी ५० प्रतिशत अनुदानमा ट्यांकर वितरण गरेको हो । सहज ढुवानीले किसानको लागत मूल्य ३ रुपैयाँ घटनेछ । मन्त्री आरती पौडेलले दूधको बजारीकरण गरी लागत कम गर्न ५० प्रतिशत अनुदानमा ३५ लाखदेखि ५१ लाख रुपैयाँ पर्ने ट्यांकर वितरण गरेको बताइन् । ‘किसानको आयस्रोत बढाउन उत्पादन भएको दूधको सहज बिक्री वितरण आवश्यक रहेछ,’ उनले भनिन्, ‘त्यसैले उनीहरूकै मागअनुसार मिल्क ट्यांकर अनुदान दिएका हौं ।’ यसले मिल्क होली डे रोक्नसमेत सहयोग पुग्ने उनले बताइन् । सरकारी लगानीका लुम्बिनी दुग्ध वितरण आयोजना बुटवल, कोलहपुर दुग्ध वितरण आयोजना बाँके र निजी स्तरको टुविन्स माइक्रो डेरी उद्योग कपिलवस्तुले ९/९ हजार लिटर दूध बोक्ने ट्यांकर अनुदान पाएका छन् ।

रोल्पा नगरपालिकासहित रूपन्देहीको सालझन्डी दुग्ध उत्पादक सहकारी, बर्दियाको भगवती दुग्ध उत्पादक सहकारी, दाङको नीलकमल सामाजिक महिला उद्यमी समूहलगायत ७ वटाले ६ हजार लिटर र २ वटाले ३ हजार लिटर क्षमताका ट्यांकर पाएका हुन् ।

सरकारले दुई वर्षभित्रमा दूध तथा दूग्धजन्य पदार्थमा आत्मनिर्भर बन्ने घोषणा गरेको छ । त्यसका लागि प्रतिदिन ४ लाख ९ हजार ४ सय ३४ मेट्रिक टन दूध आवश्यक छ । तर अहिले ३ लाख १७ हजार ३ सय ३३ मेट्रिक टन दूध उत्पादन भइरहेको छ । सचिव बैकुण्ठ अधिकारीले दूध उत्पादन बढाउनकै लागि उत्पादनमा आधारित अनुदान र सहकारीमार्फत उत्पादित बस्तुको बिक्री र बजारीकरण थालेको बताए । धेरै दूध उत्पादन गर्ने १२ सहकारीलाई ५० प्रतिशत अनुदानमा पिकअप गाडी वितरण गरेको छ । यी गाडीले दैनिक २० हजार लिटर दूध बजार पुर्‍याउने आकलन छ । प्रतिदिन ५० हजार लिटर दूध संरक्षण गर्न प्रदेशमा २८ दूग्ध चिस्यान केन्द्र स्थापना भएका छन् ।
दूधको उत्पादन बढाउन बजारीकरण र विविधीकरण आवश्यक छ । रूपन्देही डेरी व्यवसायी संघका अध्यक्ष नेत्र पाठकले सरकारले दूधको उत्पादन र बजारीकरणका लागि प्रशोधनमासमेत ध्यान दिनुपर्ने बताए ।

प्रकाशित : श्रावण १९, २०७६ १२:०६
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT