छाडा चौपाया व्यवस्थापन गरिँदै

दुर्गालाल केसी

दाङ — जिल्लाका स्थानीय तहले बजार क्षेत्रका छाडा चौपायाको व्यवस्थापन गर्न थालेका छन् । यस्ता चौपयाहरुलाई घोराही उपमहानगरपालिकाले २ को चाक्लीघाटमा लगेर राखिएको छ । चौपायाले सास्ती दिन थालेपछि व्यवस्थापन गर्न थालिएको हो ।

तत्काललाई अस्थायी संरचना बनाएर व्यवस्थापन गर्न थालिएको र छिट्टै दिगोरुपमा गौशाला बनाएर व्यवस्थापन गरिने घोराही उपमाहानगरका अध्यक्ष नरुलाल चौधरीले बताए। ‘बजारमा छाडा चौपायाले साह्रै सताए। तत्काल बजारमा व्यवस्थापन गर्ने कुनै उपाय भएन,’ उनले भने,‘चाक्लीघाट बजारभन्दा टाढा भएको र जंगल प्रशस्त भएकाले त्यही राख्न थालिएको छ। अब गौशाला बनाएर व्यवस्थित गर्छौं।’

पहिलो चरणमा मंगलबार तीन वटा ट्रकमा एक सय बढी गाईगोरु चाक्लीघाट लगिएको नगरप्रमुख चौधरीले जानकारी दिए। छाडा चौपायाले सडकमा दुर्घटनाको जोखिम बढाएको, विरुवाहरु खाएको, आवतजावतमा बाधा पुर्‍याएको र तरकारी तथा फलफूल खाइदिने गरेको स्थानीवासीको गुनासो छ।

यसैगरी तुलसीपुर उपमहानगरपालिकाले पनि छाडा चौपाया व्यवस्थापन गर्न थालेको नगर प्रमुख घनश्याम पाण्डेले बताए। छाडा पशुले समस्या बढाउन थालेपछि पहिलो चरणमा १ सय २५ गाई संकलन गरी तुलसी गौ संरक्षण सहकारी संस्थालाई हस्तान्तरण गरिएको उनले जानकारी दिए।

सहकारी र उद्यमलाई जोडेर चौपाया नियन्त्रणको काम थालिएको मेयर पाण्डेको भनाइ छ। ‘छाडा गाईगोरुले बजारमा समस्या सिर्जना गरेका छन्। शहरको सुन्दरता बिग्रिएको छ। दुर्घटनाको जोखिम बढेको छ,’ उनले भने, ‘अब सबै नागरिक जिम्मेवार हुनुपर्छ। जथाभावी गाईगोरु छोड्नुहुँदैन। गाई पालेर आयआर्जनका काम गर्नुपर्छ।’

प्रकाशित : श्रावण २१, २०७६ १६:४३
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

पार्टी एकता कसैले हल्लाएर हल्लिन्न : महासचिव पौडेल

अमृता अनमोल

बुटवल — सत्तारुढ नेकपाका महासचिव विष्णु पौडेलले पार्टी एकता प्रक्रियामा समय लागे पनि परिपक्क र सहमतिका साथ निर्णय भएकाले अब पछाडि फर्कनु नपर्ने बताएका छन् ।

मंगलबार बुटवलका पाटीका अगुवा कार्यकर्ता भेलामा बोल्दै उनले हतारोमा टुंगाएर फुर्सदमा पछुताउने अवस्था नल्याउन एकता प्रक्रियामा ढिलाई गरेको प्रस्ट्याए । ‘एउटै स्कुलिङमा हुर्केका बीच त विवाद हुन्छ । हामी त दुईथरी स्कुलिङबाट हुर्किएका हौं', उनले भने, ‘यस्तोमा स-साना अन्तरविरोध र विवाद हुनु सामान्य हो । यसले फरक पार्दैन । वास्ता नगरौं ।’ उनले अब बाँकी काम पूर्ण सहमति र परिपक्क ढंगले गर्ने बताउँदै कसैले हल्लाएर हल्लीने वा भत्काउन खोज्दैमा नभत्किने दाबी गरे ।
महासचिव पौडेलले पार्टी अध्यक्ष दुइटा भए पनि एउटै सोच र मान्यता लिएर हिँडेकाले शंका नगर्न आग्रह गरे । ‘उहाँहरुको दुइटा टाउको भए पनि एउटै शरीर छ,’ उनले भने, ‘हाम्रो एकता प्रक्रिया ठीक ढंगले सुरु भएको हो । ठीक ठीक ढंगले पूरा हुन्छ ।’ पार्टीमा कुनै पनि नेता कार्यकर्ता जिम्मेवारी र दायित्वबाट बाहिर बस्नु नपर्ने नेता पौडेलले दाबी गरे ।

यसअघि कालिका क्याम्पसको अत्याधुनिक भवन शिलान्यास समारोहमा बोल्दै पूर्वअर्थमन्त्री पौडेलले अर्थपूर्ण र प्रभावकारी विकास निर्माणका लागि नागरिक निगरानी आवश्यक रहेको बताए ।


प्रकाशित : श्रावण २१, २०७६ १६:४१
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT