सामुदायिक विद्यालयमा विद्यार्थी घट्दै
सल्यान — कृष्ण आधारभुत विद्यालय खहरेखोलामा तीन शिक्षकको दरबन्दी छ । विद्यालयमा २० जना मात्र विद्यार्थी छन । गंगा प्रावि अम्रामा १६ जना विद्यार्थी छन् । यी दुई मात्र नभई जिल्लाका अधिकांश आधारभूत विद्यालयमा विद्यार्थी संख्या प्रत्येक वर्ष घट्दै गएको छ ।
शिक्षकहरू नियमित विद्यालयमा उपस्थित नहुनु, सामुदायिक विद्यालयमा शिक्षाको गुणस्तर कमजोर हुनु, अभिभावकहरूले आफ्ना बालबालिकाको पढाइप्रति रुचि नराख्नुलगायतका कारण बालबालिका घट्दै गएको त्रिभुवन जनता मावि च्युराका अध्यक्ष हरिलाल विष्टले बताए । उनका अनुसार गत वर्ष कक्षा १ देखि ५ सम्ममा ६० जना विद्यार्थी थिए । अहिले २० भन्दा बढी विद्यार्थी नियमित आउँदैनन् । विद्यार्थी संख्या घट्दै गएकाले पठनपाठनसमेत लथालिंग बन्दै गएको उनले स्विकारे । शिक्षकको राजनीतिमा बढी रुचि हुनु, पठनपाठनमा ध्यान नदिनुलगायतका कारण पढाइ खस्कँदै गएको देवस्थलका गुञ्जमान बुढाले बताए ।
सामुदायिक जिद्यालयमा विद्यार्थी बढाउन अंग्रेजी माध्यमबाट पढाइ सञ्चालन गर्न जरुरी रहेको अभिभावक बताउँछन् । एक शिक्षक बराबर पहाडी जिल्लामा ४५ जना विद्यार्थी पढाउने क्षमता भए पनि अहिले अधिकांश विद्यालयमा एक शिक्षकको भागमा ५/१० विद्यार्थी मात्र पर्ने गरेको जिल्ला शिक्षा अधिकारी देवीप्रसाद सुवेदीले बताए । विद्यार्थी संख्या घट्दै गएकाले पाँच विद्यालय समायोजन गरेको र अझै २० बढी विद्यालय समायोजन गर्ने अवस्थामा रहेका उनले जानकारी गराए । जिल्लामा २ सय ८० आधारभूत विद्यालय छन् । तीमध्ये ५० बढी विद्यालयमा विद्यार्थी संख्या धेरै कम भएको उनले बताए । हाल ५८ विद्यालय दरबन्दीविहीन छन् । शिक्षा नियमावलीअनुसार २ सय २० दिन विद्यालय खुल्नुपर्ने र १ सय ९२ दिन पढाइ भएको देखिनुपर्ने उनको भनाइ छ । विद्यालयमा नियमित उपस्थित नहुने र नपढाउने शिक्षकलाई कारबाही गर्न खोज्दा राजनीतिक दबाबले सफल हुन नसकेको उनले बताए । अभिभावकले सानैदेखि बालबालिकालाई अंग्रेजी माध्यमबाट पढाउन खोजेकाले निजीमा भर्ना गर्ने गरेको उनको भनाइ छ ।
शैक्षिक अवस्था कमजोर हुन नदिन स्थानीय तहका प्रमुखसँग बसेर शिक्षाको बारेमा छलफल गरेको उनले जानकारी दिए । सामुदायिक विद्यालयले अंग्रेजी भाषा र प्राविधिक शिक्षा अध्ययनमा जोड दिनुपर्ने उनको भनाइ छ ।
प्रकाशित : माघ २४, २०७४ ११:४४