अस्पतालमा औषधि छैन

अस्पतालमा सिटामोलसमेत नहुँदा २ महिनादेखि बिरामीहरू सकसमा छन् । स्वास्थ्यकर्मीले जाँचेका बिरामीलाई नि:शुल्क औषधि वितरण गर्नुपर्नेमा ‘औषधि सकिएको छ, बाहिर खोजेर किन्नुस्’ भनेर फर्काउने गरिएको बिरामीको गुनासो छ ।

अस्पतालमा ज्वरो, आउँ, रुघाखोकी, ग्यास्ट्रिक, पखाला, लुतो, पेट दुख्नेलगायत रोगको औषधि अभाव भएको निमित्त मेडिकल सुपरिटेन्डेन्ट डा. धर्मराज रेग्मीले बताए । ‘बिरामीको संख्या बढदो छ । त्यसमाथि अस्पतालमा औषधि छैन,’ डा. रेग्मीले भने । अस्पतालमा प्रसूति सेवाका लागि गज, कटन, ग्लोब र आरएलसमेतको अभाव भएको उनले बताए । औषधि खरिदका लागि बजेट नहुँदा अभाव भएको अस्पतालका स्वास्थ्यकर्मीको भनाइ छ । भेरी नगरपालिकाले चालु आर्थिक वर्षको प्रथम चौमासिकमा औषधि खरिदका लागि बजेट नछुट्याउँदा समस्या भएको अस्पतालले जनाएको छ । नगरपालिकाले औषधि खरिदका लागि बजेट छुट्याउनुपर्नेमा प्रगति नभएको लेखापाल जयप्रसाद पाण्डेले बताए ।

नगर प्रमुख सीपी घर्तीले जाजरकोट अस्पताललगायत स्वास्थ्य संस्थालाई औषधि खरिदसम्बन्धी बजेट आउँदो विशेष नगरसभाबाट विनियोजन गर्न लागेको बताए । अस्पतालमा बिरामीको आँखा, कान, नाक, घाँटीलगायत अंग परीक्षण गर्न आवश्यक पर्ने टर्चसमेत नभएको डा. अमिन शाहले बताए । टर्च नहँुदा मोबाइलको फ्लास बालेर भित्री अंगको चेकजाँच गरिएको छ । एक्स–रे मेसिन बिग्रँदा अस्पतालमा यो सेवा पनि बन्द भएको डा. शाहले बताए ।