मुख्यमन्त्रीमा शाही नियुक्त

कान्तिपुर संवाददाता

सुर्खेत — प्रदेश ६ को मुख्यमन्त्रीमा माओवादी संसदीय दलका नेता महेन्द्रबहादुर शाही नियुक्त भएका छन् । एमाले र माओवादीका सांसदहरूको हस्ताक्षरसहितको पत्र प्रदेश प्रमुखको कार्यालयमा बुझाएपछि प्रदेशसभा सदस्य शाही मुख्यमन्त्रीमा नियुक्त भएका हुन् ।

प्रदेश प्रमुख दुर्गाकेशर खनालले नेपालको संविधानको धारा १६८ (२) बमोजिम बिहीबार अपराह्न शाहीलाई मुख्यमन्त्रीमा नियुक्ति गरे । मुख्यमन्त्रीको शपथग्रहण शुक्रबार दिउँसो हुनेछ । एमालेले आलोपालो नेतृत्व माग राखेपछि प्रदेश ६ को मुख्यमन्त्रीमा ढिलाइ भएको हो । बिहीबार दिनभरको वार्तापछि अपराह्न सांसदहरूको हस्ताक्षरसहितको पत्र लिएर दुवै दलका सांसदहरू प्रदेश प्रमुखको कार्यालय पुगेका थिए ।

को हुन् शाही ?
कालीकोट प्रदेश सभा (ख) बाट निर्वाचित सांसद शाही पूर्व ऊर्जामन्त्रीसमेत हुन् । अख्तियार दुरुपयोग अनुसन्धान आयोगका तत्कालीन प्रमुख आयुक्त लोकमानसिंह कार्कीविरुद्ध महाअभियोगको प्रस्ताव दर्ता गरेर चर्चामा आएका शाही माओवादी सेनाको छैटौं डिभिजन कमान्डर थिए । पार्टीमा ‘प्रज्वल’ उपनामले चिनिने शाही ६ नम्बर र ७ नम्बर डिभिजनको कमान्डर बनेका थिए । सेना समायोजनमा सम्मानजनक पद नपाएपछि उनले पार्टी राजनीति रोजेका थिए ।
कालीकोटको पाँचलझरना गाउँपालिकासाबिकको नानीकोट ८ मा जन्मिएका ४१ वर्षीय शाही जनयुद्धको सुरुवातदेखि नै भूमिगत भएकाथिए । उनका बुवा लालबहादुर शाही पञ्चायतकालमा प्रधानपञ्च थिए । आफूलाई पढाउने शिक्षककैसल्लाहअनुसार ०४८ सालमा कम्युनिस्ट पार्टीको सदस्यता लिएका उनलाई प्रहरीले लगत्तै वारेन्ट जारी गरेको थियो । उनले जनयुद्धको प्रारम्भमा छापामार र संगठनमा समानान्तर भूमिका निर्वाह गरे । जनसेनाको कमान्डर भएर दर्जनौं आक्रमणमा युद्ध मोर्चाको नेतृत्व गरेका थिए ।

केही मन्त्रीले शपथ लिने
मुख्यमन्त्रीसँगै शुक्रबार केही मन्त्री नियुक्त गर्ने सत्तासाझेदार दुई दलको तयारी छ । यसका लागि बिहीबार साँझदेखि नै गठबन्धनका नेताहरू छलफलमा जुटेका छन् । मन्त्रीका लागि एमालेमा दैलेखका अम्मरबहादुर थापा, मीनासिंह रखाल, सल्यानका गुलाबजंग शाह, मुगुका चन्द्रबहादुर शाही, हुम्लाका दल रावल, सुर्खेतका पद्मा खडका, खडक खत्रीले दाबी गर्दै आएका छन् । तीमध्ये शाही र थापा पूर्वसांसद हुन् । माओवादीमा सुर्खेतकी सीता नेपाली, रुकुमका गोपाल शर्मा, विमला केसी, सुर्खेतका विन्दमान विष्ट, ठम्मर विष्ट, दैलेखका धर्मराज रेग्मीलगायत दाबेदार छन् । आकांक्षीहरूले प्रदेशका दुई प्रभावशाली नेताहरू शक्ति बस्नेत र जनार्दन शर्मासमक्ष मन्त्रीका लागि चर्को लबिइङ गरिरहेको स्रोतले जनायो । मुख्यमन्त्री तथा प्रदेश मन्त्रिपरिषद् कार्यालयले तत्काललाई ६ मन्त्रालय स्थापना गर्ने तयारी छ । भौतिक पूर्वाधार मन्त्रालय, वन, वातावरण तथा विज्ञान मन्त्रालय, सहकारी, पशु सेवा, भूमि व्यवस्थापन मन्त्रालय, आर्थिक मामिला तथा योजना मन्त्रालय, आन्तरिक मामिला तथा कानुन मन्त्रालय र सामाजिक विकास मन्त्रालय रहनेछन् ।

प्रकाशित : फाल्गुन ४, २०७४ ११:२६
ADVERTISEMENT
प्रतिक्रिया
पठाउनुहोस्

चौंरीपालनमा किसानको आकर्षण

कान्तिपुर संवाददाता

हुम्ला — सिमकोट गाउँपालिका– १ दोजाम गाउँका विजय लामाले व्यवस्थित खोर बनाएर ५५ वटा चौंरी पालेका छन् । चौंरीजन्य बस्तुको बिक्रीबाट वार्षिक आठ लाख रुपैयाँ आम्दानी गर्दै आएका उनले तीन जनालाई रोजगारीसमेत दिएका छन् । नाम्खा गाउँपालिकाका–६ लिमीका पाल्ज्योर तामाङसँग ६५ चौंरी छन् ।

चौंरी पालनबाट वार्षिक सात लाख ५० हजार रुपैयाँ आम्दानी गर्दै आएको उनको भनाइ छ । उनीहरू मात्र होइन चौंरीपालनमार्फत राम्रो आम्दानी हुन थालेपछि यहाँको उच्च हिमाली भेगका किसानहरूमा चौंरीपालनप्रति आकर्षण बढ्दै गएको छ ।

किसानको आकर्षण बढेपछि सरकारले हिमाली आयोजना सुरु गरी जिल्ला पशु सेवा कार्यालयमार्फत आर्थिक अनुदान उपलब्ध गराउन थालेको छ । हिमाली आयोजनाका कृषि व्यवसायविज्ञ कमल छन्त्यालले जिल्लामा ७० वटा चौंरी पालन व्यवसायीलाई अनुदान सहयोग उपलब्ध गराउँदै आएको छ । छत्यालका अनुसार यहाँका अगुवा चौंरीपालक किसानहरूले वार्षिक दुई लाखदेखि आठ लाख रुपैयाँसम्म आम्दानी गर्दै आइरहेका छन् ।

चौंरीबाट उत्पादन हुने छुर्पी, घिउ र बाछाबाछी बिक्री गरेर वार्षिक आठ लाख रुपैयाँ आम्दानी गरेको र तीन जनालाई नियमित रोजगारी दिएको व्यवसायी विजय लामाले बताए । अर्का व्यवसायी तामाङले चौंरी आम्दानीको राम्रो स्रोत भएकाले व्यावसायिक रूपमा पाल्दै आएको बताए । हुम्लाको उच्च हिमाली भेगका बस्तीमा मात्र चौंरी पालन हुने गरेको छ । चौंरीका लागि उच्च हिमाली क्षेत्रमा पाइने बुकी घाँस उत्तम मानिन्छ । नाम्खा गाउँपालिकाको पूरै बस्ती र सिमकोट गाउँपालिकाको दोजाम, लिमाटाङ, चेखेली गाउँपालिकाको नेप्कमा चौंरी पाइन्छ ।
चौंरीबाट नौनी, घिउ र छुर्पी उत्पादन हुन्छ । चौंरीको पुच्छर पूजाका लागि उत्तम मानिने भएकाले उच्च मूल्यमा बिक्री हुने गर्छ ।

प्रकाशित : फाल्गुन ४, २०७४ ११:२५
पूरा पढ्नुहोस्
प्रतिक्रिया
पठाउनुहोस्