६१ वर्षमा नागरिकता

पतिसँगै जिल्ला प्रशासन पुगेकी उनले नागरिकता पाएपछि खुशी व्यक्त गरिन् । घरमा पति नबसेकै कारण आफूले यो उमेरसम्म नागरिकता पाउन नसकेको उनको भनाई थियो । रोजिरोटीका लागि पति मन्दिर सार्की भारततिर गैरहने कारणले नागरिकता लिने नपाएको उनले बताइन् । ‘बाबुआमाको मृत्युपछि श्रीमान् नभए नागरिकता बन्दो रहेनछ,’ उनले भनिन्, ‘श्रीमान् कमाउनलाई भारततिरै बस्दा बेलैमा नागरिकता बनेन ।’

पटकपटक नागरिकता बनाउने उनको प्रयास पति नभएका कारण सफल हुन सकेको थिएन । यस पटक श्रीमान् भारतबाट आएका बेला नागरिकता बनाएकी हुन् । बेलाबेला आउने चुनावमा मतदान गर्नबाट वञ्चित भएकामा दु:ख लागेको उनले बताइन् । ‘घर वरपरका छरछिमेकीहरू भोट हाल्न जान्थे म त नागरिकताविहीन कसरी भोट हाल्नु’ उनले भनिन् । नागरिकता नभएका कारणले एक वर्षसम्म सामाजिक सुरक्षा भत्ता पाउनबाट पनि वञ्चित भइन् । ६० वर्षको उमेरदेखि दलित ज्येष्ठ नागरिकले सामाजिक सुरक्षा भत्ता पाउने व्यवस्था छ । नागरिकता पाएपछि अब सामाजिक सुरक्षा भत्ता पाउनुको साथै मतदाता पनि भएकोमा उनले खुसी व्यक्त गरिन् ।