नगरका २० केन्द्रबाट स्वास्थ्य सेवा

स्वास्थ्य चौकी भएका ५ वडामा पनि सहरी स्वास्थ्य केन्द्र स्थापना गरेर स्वास्थ्य सेवा प्रवाह भएको छ । वैशाख ३१ गते भएको स्थानीय तहको निर्वाचनलगत्तै नगरपालिकाले असोजदेखि स्वास्थ्य चौकीका साथै नगरका सबै वडामा सहरी स्वास्थ्य केन्द्र सञ्चालनमा ल्याएको थियो । हाल २, ४, ९, ११ र १३ नम्बर वडामा स्वास्थ्य चौकी र एक/एक वटा सहरी स्वास्थ्य केन्द्र पनि सञ्चालनमा ल्याइएको छ । १, ३, ५, ६, ७, ८, १२ र १४ वडामा एक/एक सहरी स्वास्थ्य केन्द्र स्थापना गरिएको छ । १० नम्बर वडामा भने २ वटा सहरी स्वास्थ्य केन्द्र सञ्चालनमा ल्याइएको छ ।

भौगोलिक र जनसंख्याका आधारमा ठूलो रहेको १० नम्बर वडामा २ वटा सहरी स्वास्थ्य केन्द्र सञ्चालन भइरहेको नगर प्रमुख गोर्खबहादुर केसीले बताए । सबै सहरी स्वास्थ्य केन्द्रमा स्वास्थ्यकर्मी खटाइएको नगर प्रमुख केसीले जानकारी दिए । ‘अनमी र अहेव नियुक्त गरेर आवश्यक आधारभूत औषधिसहित सहरी स्वास्थ्य केन्द्र सञ्चालनमा छन्,’ नगर प्रमुख केसीले भने, ‘स(साना औषधि र प्राथमिक उपचारका लागि टाढा जान नपरोस् भनेर वडामै स्वास्थ्य सेवा सुरु गरिएको हो ।’

उनले हरेक सहरी स्वास्थ्य केन्द्रमा २७ भन्दा बढी थरीका औषधि नि:शुल्क वितरण भइरहेको पनि जानकारी दिएका छन् । ‘अब स्वास्थ्य केन्द्र खोज्दै बिरामीभन्दा बिरामी खोज्दै स्वास्थ्यकर्मी हिँड्ने अवधारणाबाट काम भइरहेको छ,’ नगर प्रमुख केसीले भने, ‘सहरी स्वास्थ्य केन्द्रमा खटेका स्वास्थ्यकर्मीहरू बिरामी आएनन् भनेर मात्रै बस्दैनन्, सन्चो/बिसन्चो सोध्दै हिँड्ने पनि गरेका छन् ।’ साधारण रोग, घटना/दुर्घटनाको उपचारका लागि टाढा हिँड्नु नपरोस् भनेर हरेक वडामा सहरी स्वास्थ्य केन्द्र सञ्चालनमा ल्याइएको भनाइ उनको छ ।

नगरपालिकाले चालु आर्थिक वर्षमा स्वास्थ्यतर्फ एक करोड १५ लाख २० हजार बजेट विनियोजन गरेको छ, जसमध्ये २८ लाख ३० हजार बजेट औषधि खरिदका लागि मात्रै विनियोजन गरिएको छ । चालु आर्थिक वर्षको ६ महिनामा १२ लाख मूल्य बराबरको औषधि खरिद भइसकेको आठबीसकोट नगरपालिकाका प्रमुख प्रशासकीय अधिकृत रामबहादुर केसीले बताए ।

नगरका लागि एम्बुलेन्स खरिद, सहरी स्वास्थ्य केन्द्रको व्यवस्थापनका लागि फर्निचर निर्माण, ९ नम्बर वडाको राडीमा प्रसूति गृह निर्माण लगायतमा बजेट विनियोजन गरिएको र कतिपय काम भइसकेको अधिकृत केसीले बताए । एम्बुलेन्स केही समयमा आइपुग्ने र प्रसूति गृह निर्माणको काम पनि लगत्तै सुरु हुने उनको भनाइ छ । नगरपालिकाले चालु आर्थिक वर्षमा तीनवटा छुट्टाछुट्टै स्वास्थ्य शिविर पनि सम्पन्न गरिसकेको छ ।

क्षय र कुष्ठ रोगी तथा पाठेघरको समस्या भएकाहरूका लागि नि:शुल्क स्वास्थ्य शिविर तथा महामारी फैलिएको अवस्थामा विशेषज्ञसहितको उपचारात्मक शिविर सम्पन्न गरिएको नगर स्वास्थ्य संयोजक नन्दलाल महतोले बताए । उनले तीनवटै शिविरमा नगरपालिकाले आर्थिक सहयोग गरेको बताए । ‘आठबीसकोट नगरपालिकामा स्वास्थ्य क्षेत्रमा उल्लेख्य काम भएको छ,’ नगर स्वास्थ्य संयोजक महतोले भने, ‘जनप्रतिनिधिहरू जनताको स्वास्थ्यप्रति सचेत हुनुहुन्छ ।’

उनले ५ वटै स्वास्थ्य चौकी र १५ वटा सहरी स्वास्थ्य केन्द्रमा पर्याप्त औषधि रहेको र फेरि अर्को लटको औषधि खरिदको प्रक्रिया जारी रहेको बताए । नगरपालिकाले १५ शय्याको अस्पताल निर्माणको काम पनि सुरु गरिसकेको छ । ११ नम्बर वडामा अस्पताल निर्माणका लागि जग्गा लिएर काम थालिएको नगर स्वास्थ्य संयोजक महतोले बताए । चालु आर्थिक वर्षमा भवन निर्माणका डिजाइन स्टिमेटका साथै आवश्यक वाल, घेराबार लगायतका सम्पूर्ण कुरा सक्ने गरी काम भइरहेको नगर प्रमुख गोर्खबहादुर केसीले बताए ।