फर्जी बिल बनाएर चौकी इन्चार्जले रकम भुक्तानी लिएको खुलासा

गाउँपालिकाको विनियोजित बजेटमा प्रहरी चौकीका इन्चार्ज प्रहरी सहायक निरीक्षक धन बहादुर धामीले सामग्री खरिद नै नगरी रकम भुक्तानी लिएको पाइएको छ । गाउँपालिकाले प्रहरी चौकीका इन्चार्ज प्रहरी सहायक निरीक्षक धन बहादुर धामीको नाममा चेक भुक्तानी गरेको छ । गाउँपालिकाले विनियोजित गरेको रकममा प्रहरी चौकीमा सामग्री नै खरिद नगरी व्यक्तिको नाममा रकम भुक्तानी गर्नु सरासर गलत भएको स्थानीयहरुले बताए ।

चैकीका इन्चार्ज धामीले सामग्री खरिद नगरी कामदारहरुको डोर हाजिर फारम र विल भरपाई बुझाएका छन् । उनले स्थानीय चुप्रा बजारमा पाइने सामानहरु पनि नेपालगञ्जबाट खरिद गरेको बिल देखाएका छन् ।

गाउँपालिकाले २ लाख रुपैयाँमा भ्याट रकम कट्टा गरेर १ लाख ९७ हजार रुपैयाँ प्रहरी सहायक निरिक्षक धन बहादुर धामीको नाममा चेक भुक्तानी दिएको छ ।

यसबारे प्रहरी सहायक निरीक्षक धन बहादुर धामीले चेक पाएपछि सामग्री अर्डर गरेको बताए । अर्डर गरेको सामान एक हप्ताभित्र कार्यालयमा आईपुग्ने दाबी उनले दाबी गरे । भने, ‘वडा अध्यक्ष लोकबहादुर डाँगीले प्रहरी चौकीमा सामान खरिद गर्न थोरै रकम विनियोजन गरेको र रकम ल्याएर सामान किन्नु भनेकाले आफूले चेक ल्याएको हो ।’

गाउँपालिकाकाले भने प्रहरी चौकीमा सामग्री खरिद गरे नगरेको बारे तत्काल अनुगमन गर्ने बताएको छ ।