मुसीकोटले बनायो २४ कानुन

हरि गौतम

रुकुम (पश्चिम) — मुसीकोट नगरपालिकाले एक वर्षको अवधिमा २४ वटा कानुन निर्माण गरेको छ । जनप्रतिनिधि निर्वाचित भएको एक वर्षको अवधिमा भएका दुई वटा नगरसभाबाट २४ वटा कानुन पारित भएको नगर कार्यपालिकाले जनाएको छ ।

असार ३२ मा भएको पहिलो नगरसभाबाट ७ र गत चैत ३० गते भएको दोस्रो नगरसभाबाट १६ वटा कानुन पारित भएका छन् । काम गर्दै जाँदा आवश्यक परेका खण्डमा कानुन बनाएर अघि बढ्ने गरेको नगर प्रमुख देवीलाल गौतमले बताए । उनले पहिलो सभाबाट पारित ऐन, नियम, नियमावली र कार्यविधिका आधारमा हालसम्म कामकाज चलाइए पनि थप कानुनको जरुरी परेपछि दोस्रो नगर सभाबाट थप कानुन सर्वसम्मत पारित गरिएको जानकारी दिए । कामकाज अघि बढाउन समस्या परेपछि नगर सभा आह्वान गरेर कानुन पारित गरेको उनले बताए । ‘हामी अघि बढ्न समेत समस्या भइसकेको थियो, कानुन नभएपछि हामी ठप्प थियौं, त्यसैले तत्काल आवश्यक थप कानुन बनाइएको हो,’ प्रमुख गौतमले भने ।


पहिलो नगर सभाले कार्यपालिकाका पदाधिकारीको आचारसंहित, नगरसभा सञ्चालन कार्यविधि, नगरपालिकाको आर्थिक ऐन, नगर कार्यपालिकाको बैठक सञ्चालन कार्यविधि, नगर कार्यपालिकाको कार्य विभाजन, कार्य सम्पादन नियमावली र विनियोजन ऐन पारित गरेको थियो । दोस्रो नगर सभाले ६ वटा विधेयक, ९ वटा कार्यविधि, नियम र दिग्दर्शन तथा एउटा नियमावली पारित गरेको छ । दोस्रो नगर सभाबाट न्यायिक समतिले उजुरीको कारबाही किनारा गर्दा अपनाउनुपर्ने कार्यविधिका सम्बन्धमा व्यवस्था गर्न बनेको विधेयक, आर्थिक कार्यविधि नियमित तथा व्यवस्थित गर्न बनेको विधेयक, स्थानीय कृषि व्यवसाय प्रवद्र्धन विधेयक, प्रशासकीय कार्यविधि नियमित गर्ने विधेयक, शिक्षा विधेयक र सहकारी विधेयक पारित भएको छ । यसैगरी उपभोक्ता समिति गठन, परिचालन तथा व्यवस्थापनसम्बन्धी कार्यविधि, घ वर्गको निर्माण व्यवसायीको इजाजत पत्रसम्बन्धी कार्यविधि, नगरपालिकाको राजपत्र, बजार अनुगमन निर्देशिका, एफ.एम. रेडियो व्यवस्थापन तथा सञ्चालन कार्यविधि, करारमा जनशक्ति व्यवस्थापन गर्नेसम्बन्धी नमुना कार्यविधि, एकीकृत सम्पत्ति कर व्यवस्थापन कार्यविधि, वार्षिक योजना तथा बजेट तर्जुमा दिग्दर्शन, टोल विकास समिति गठन तथा परिचालन कार्यविधि र शिक्षा नियमावली पनि दोस्रो नगर सभाले पारित गरेको छ ।


पहिलो र दोस्रो नगरसभाबाट पारित कानुनलाई अब राजपत्रमा प्रकाशनको तयारी गरिएको छ । नगरपालिकाको दोस्रो नगर सभामार्फत नगरपालिकाको राजपत्रसम्बन्धी नियम बनाएकाले अबको हप्ता दिनभित्र नगर सभाबाट पारित सबै ऐन, नियम, कानुन, नियमावली, कार्यविधिलाई राजपत्रमा प्रकाशनको तयारी भैरहेको प्रमुख प्रशासकीय अधिकृत माधवप्रसाद शर्माले बताए । नगर सभाबाट पारित कानुन राजपत्रमा प्रकाशन गर्नुपर्ने हुन्छ । नगर कार्यपालिका बैठकका निर्णय तथा नगर सभाबाट पारित कानुन राजपत्रमा नछापेर कामकाज चलाउन सकिने भए पनि राजपत्रमा छाप्दा त्यो थप परिपक्व हुने शर्माले बताए ।

प्रकाशित : वैशाख ३, २०७५ ११:३७
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

सामुदायिकमा नपढाए सेवाबाट वञ्चित

ज्योति कटुवाल

दैलेख — नारायण नगरपालिका २ को जाहारकोटमा बाजागाजासहित घरदैलो गरी भर्ना अभियान सुरु गरिएको छ । नयाँ विद्यार्थी खोज्दै विद्यालयले भर्ना अभियान सुरु गरेको हो ।

वडा नं २ मा तीन सामुदायिक विद्यालय छन् । त्यहाँका अभिभावकले छोराछोरी सरकारी विद्यालयमा नपढाए नगर र वडाबाट दिइने सेवा सुविधामा रोक लगाउने निर्णय गरेको वडा कार्यालयले जनाएको छ ।


वडा नं २ का ३ वटा विद्यालयमा नयाँ विद्यार्थी भर्ना हुन आए एक हजार रकम दिने व्यवस्था गरिएको छ । त्यस्तै विद्यालयको गुणस्तर सुधार्न अभिभावकलाई तालिम दिन लागिएको छ ।

‘हामीलाई बालबच्चा दिनुस्, हामी विकास दिन्छौं’ भन्ने नारासहित भर्ना अभियान सुरु गरिएको वडा नं. २ का अध्यक्ष रेशम थापाले बताए । उनले आफ्नै नेतृत्वमा सामुदायिक विद्यालयमा भर्ना अभियान सुरु गरिएको जनाए । उनले निजी विद्यालयमा बालबालिका पढाउने कार्यलाई निरुत्साहित गर्न विभिन्न योजनाहरू अगाडि सारिएको बताए । उनका अनुसार सरकारी विद्यालयमा बालबालिका भर्ना गरे वर्षभरिको तिरो (शुल्क) नि:शुल्क गर्ने तयारी भएको छ ।


अभियान सञ्चालन भएपछि एकै दिनमा ५१ नयाँ विद्यार्थी भर्ना गरिएको जनता मावि कोटथाप्लाले जनाएको छ । विद्यालयले अन्य विद्यालयबाट पास भएका विद्यार्थीको भर्ना गर्ने क्रम जारी राखेको जनाएको छ । पढाइलाई प्रभावकारी र शिक्षकको नियमित उपस्थितिका लागि योजना बनाएर विद्यालयलाई नमुना बनाइने विद्यालय व्यवस्थापन समितिका अध्यक्ष गणेश थापाले बताए ।


५५ वर्षीयाको पढाइ मोह
नारायण नगरपालिका २ जारकोटका ५५ वर्षीया जयबहादर सुनार नयाँ शैक्षिक सत्र सुरु भएसँगै कक्षा १ मा भर्ना भएका छन् । उनले आफूसँगै नातिनी सरस्वतीको पनि भर्ना गराए । ६ छोराछोरी र १३ नातिनातिका हजुरबुबा सुनारले नियमित विद्यालय आउने जनाएका छन् । उनी खड आधारभूत विद्यालयमा कोलटाकुरामा कक्षा १ मा भर्ना भएका हुन् । उमेर हुँदा पढ्नुपर्छ भन्ने हेक्का नभएको र अहिले पढ्न पाए केही गर्न सक्छु भन्ने जाँगरले आफू विद्यालयमा भर्ना भएको उनको भनाइ छ । उनी एक हप्ता अगाडि बिरामी भएर नेपालगन्ज पुगेका थिए तर उनी हराए । त्यहाँ हराएपछि नपढेकै कारण यस्तो भएको भन्ने लागेर कक्षा १ मा भर्ना भएको उनको भनाइ छ । ‘त्यसपछि मलाई मन भित्रैबाट पढ्नुपर्छ भन्ने जाँगर आयो,’ उनले भने, ‘त्यसैले यहाँ आएर कक्षा १ मा भर्ना भएको हुँ ।’ उनले शरीरले धानुन्जेल आफूले अध्ययनलाई निरन्तरता दिने जनाए ।


उनी भर्ना भएको देखेर अन्य स्थानीयसमेत उत्साहित भएको नारायण नगरपालिका २ का वडाअध्यक्ष रेशम थापाले बताए । उनलाई एक हजार पोसाक खर्च प्रदान गरिएको वडा अध्यक्ष थापाले बताए ।

प्रकाशित : वैशाख ३, २०७५ ११:३७
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT
ADVERTISEMENT
ADVERTISEMENT