हुम्लामा होजियारी तालिम
हुम्ला — सामुदायिक विकास कार्यक्रमले युवाका लागि एक महिने सीपमूलक तालिम सञ्चालन गरेको छ । युवालाई गाउँमै स्वरोजगार बनाउन होजियारी र तिब्बतीयन आर्ट तथा काठ पेन्टिङ तालिम सञ्चालन गरिएको हो ।
आर्ट तालिम जिल्लामा पहिलोपल्ट संचालन गरिएको छ । बजार राम्रो रहेकाले युवाले गाउँमै राम्रो आम्दानी गर्ने तालिमका सहभागी भुवन रोकायाले बताए । जिल्ला समन्वय समितिका संयोजक दानबहादुर रावतले तालिमबाट दक्ष जनशक्ति उत्पादन गर्न सकिने बताए ।
होजियारी तालिममा नाम्खा, सिमकोट, खार्पुनाथ, चंखेली र अदानचुली गाउँपालिकाका २० जना महिला सहभागी थिए । त्यस्तै तिब्बतीयन आर्ट तथा काठ पेन्टिङ तालिममा नाम्खा र सिमकोट गाउँपालिकाका ११ युवा सहभागी भए । १५ जना युवालाई एक महिने प्लाम्बिङ तालिमसमेत दिइएको कार्यक्रमका संयोजक राजबहादुर रोकायाले बताए ।
उनका अनुसार एक सय ३२ जनालाई बेमौसमी तरकारी, ग्याबिन बुनाइ, फर्निचर, अल्लो कपडा बुनाइ, कपाल काट्ने, हाउस वाइरिङलगायत सीपमूलक तालिम सम्पन्न भइसकेका छन् । तालिम पाएपछि युवाको आयआर्जनमा टेवा पुगेको उनले जनाए । उनका अनुसार अधिकांश युवा रोजगारीमा लागिसकेका छन् ।
