बढ्दै महिला हिंसा

असार ९, २०७५कान्तिपुर संवाददाता

सल्यान — जिल्लामा ६ महिनाको अवधिमा भएका मानवअधिकार हननका घटनामध्ये ८० प्रतिशत बढी महिला हिंसाका छन् । इन्सेकले सार्वजनिक गरेको अर्धवार्षिक प्रतिवेदनमा २० वटा घटनामध्ये १६ वटा घटना महिला हिंसासँग सम्बन्धित छन् ।

इन्सेकका अनुसार सातवटा घटना बलात्कार र चार बहुविवाहका छन् । प्रमुख जिल्ला अधिकारी परमानन्द घिमिरेले जिल्लामा मानवअधिकार हननका घटना न्यूनीकरणका लागि सबैको सहयोग जरुरी रहेको बताए । पीडितलाई न्याय र पीडकलाई कानुनी दायरामा ल्याउन सके मानवअधिकार उल्लंघनका घटना नियन्त्रण हुने उनको भनाइ छ ।

शारदा नगरपालिकाकी उपप्रमुख सावित्रा बस्नेतले स्थानीय तहको न्यायसम्पादन निष्पक्ष ढंगबाट गर्दै आएको बताइन् । ‘मानवअधिकारको सम्मान गर्दै न्यायसम्पादन गर्न सदैव सजग छौं,’ उनले भनिन् । जिल्ला अदालतका स्रेस्तेदार गणेशकुमार गौतमले समाजमा न्यायसम्पादन सहज ढंगले हुन नसक्दा वास्तविक पीडितले न्याय पाउन नसक्ने सम्भावना हुने बताए ।