दृष्टिविहीनको बिचल्ली

आँखा पाक्ने रोगबाट दुवै आँखाको दृष्टि गुमाएपछि काम गर्न नसक्ने भएका दमाई मागेर खान बाध्य छन् । उपचारका क्रममा सबै सम्पत्ति सकिएकाले उनलाई आर्थिक समस्या परेको छ । सहारा दिंदै आएकी पत्नीले छाडेपछि उनको बिचल्ली भएको हो । उनलाई अहिले भाइ–बुहारीले सहारा दिंदै आएका छन् । भाइसमेत सानैदेखि कान नसुन्ने र बोल्न नसक्ने भएकाले थप समस्या भएको उनले बताए ।

पत्नीको सहारामा हिंड्डुल र दैनिक कार्य गर्ने उनले अहिले धेरै समस्या भएको बताए । पत्नीले पाँच वर्षअघि छाडेपछि घर न घाटको भएको उनको भनाइ छ । पेट पाल्नका लागि व्यापारिक केन्द्रका घर–घरमा माग्दै चहार्नुपरेको उनले बताए । ‘भाइ पनि अशक्त भएकाले उसको घरमा सधैं बस्न सकिँदैन,’ उनले भने ।