जमरा जुस उत्पादन

नियमित सेवन गर्नेको संख्या बढ्यो
एलपी देवकोटा

जुम्ला — जमराको जुस उत्पादन हुन थालेपछि नियमित सेवन गर्नेको संख्या बढ्दै गएको छ । चन्दननाथ नगरपालिका–८, जातिभिडकी कमला बुढथापाले जमराको जुस उत्पादन थालेकी छन् । एक वर्षदेखि आफ्नो पतिलाई मधुमेह भएपछि यसको उत्पादन सुरु गरेको उनले बताइन् ।

जुम्ला खलंगामा जमराको ताजा जुस पिउँदै स्थानीय । तस्बिर : एलपी । कान्तिपुर

केही समयदेखि व्यावसायिक रूपमा जमराको जुस उत्पादन गर्न थालेको उनको भनाइ छ । उनका पति खड थापा सुगर रोगले सिकिस्त भएपछि चिकित्सकको सल्लाह बमोजिम नियमित रूपमा जमराको जुस खुवाउन थालेकी थिइन् ।

दैनिक ५ एमएल जुस खुवाउँदा उनलाई निको भएपछि व्यावसायिक उत्पादन थालेको उनको भनाइ छ । ‘जुम्लामा सुगर र प्रेसरका बिरामी धेरै भएकाले व्यावसायिक रूपमै उत्पादन गरिरहेकी छु,’ उनले भनिन्, ‘जुस पिउनकै लागि दैनिक २० जनासम्म ग्राहक आउने गरेका छन् ।’ उनले चन्दननाथ मन्दिर अगाडि बिहान ६ बजेदेखि ८ बजेसम्म जुस बेच्दै आएको बताइन् ।

Yamaha

रोगसँग लड्ने क्षमता बढी हुने भएकाले धेरै बिरामीका लागि जमराको जुस उपयोगी हुने चिकित्सकको भनाइ छ । आयुर्वेद चिकित्सक रमेश केसीले सु्गर, प्रेसर, मोटोपनाका लागि जमराको जुस राम्रो मानिने बताए । ‘जमराको जुस आयुर्वेदिक पद्धतिमा भरपर्दो मानिएको छ,’ डा. केसीले भने, ‘यसमा आल्मुनियम, म्याग्निसियम, माइक्रोन्युटेन लगायतको मात्र बढी हुने भएकाले बहुउपयोगी छ ।’ उनले केही स्वास्थ्य समस्या नियमित जमराको जुसको सेवनका कारण निको हुने बताए ।

उनले महिलाका लागि समेत यो उपयोगी भएको बताए । महिलाको सेतोपानी बग्ने, पाठेघरको क्यान्सर हुने जस्ता समस्या जमराको जुसबाट निदान हुने केसीको भनाइ छ । ‘एक जना व्यक्तिले दैनिक ५ एमएल जुस पिउन उपयोगी मानिन्छ,’ उनले भने।

नियमित रूपमा जमराको जुस पिउँदा फाइदा पुगेको स्थानीय मानबहादुर खत्रीले बताए । जमराको जुसको उपयोगिता थाहा पाएपछि आफूले पनि नियमित सेवन गर्ने गरेको स्थानीय जय श्रेष्ठले बताए । ‘जुसको बारेमा प्रचारप्रसार भए धेरै बजार पाउनेछ,’ उनले भने, ‘बजारमा बिक्रीका लागि ल्याएको एक हप्तामै २० जनाले नियमित जुस पिउने गरेका छौंं ।’ जमराको जुस ताजा हुने भएकाले बिहान चियाको विकल्पमा प्रयोग गर्न सकिने उनको भनाइ छ ।

Esewa Pasal

प्रकाशित : श्रावण २४, २०७५ ०९:३५
ADVERTISEMENT
प्रतिक्रिया
पठाउनुहोस्
ADVERTISEMENT

बाढीले बाटो बगायो

कान्तिपुर संवाददाता

डोल्पा — अविरल वर्षाका कारण भेरी नदीमा आएको बाढीले ठाउँठाउँमा बाटो बगाएको छ । यसले बटुवालाई आवत जावतमा कठिनाइ परेको छ ।

पर्यटकीय स्थलहरू धो भ्याली, फोक्सुण्डो ताल, शे गुम्बा, छार्का भोट लगायत माथिल्लो डोल्पातर्फ जाने बाटोमा पर्ने विभिन्न ठाउँहरूमा भेरी नदीमा आएको बाढीले भत्काएको छ । यसबाट आवतजावत गर्ने देशी विदेशी पर्यटकहरू सहितका बटुवालाई निकै कठिनाइ भएको पर्यटक व्यवसायीहरूले बताएका छन् ।

डोल्पाको सदरमुकाम दुनैबाट माथिल्लो डोल्पाको धो भ्याली, छार्का भोट तथा माथिल्लो डोल्पाका विभिन्न गाउँहरूतर्फ जाने मूलबाटोमा पर्ने काइके गाउँपालिकाको पाल्चाखोला नजिकको बाटो परिएको छ । बाढी तथा पानी आउँदा बटुवाहरू र घोडा खच्चरसमेत आवतजावत गर्न बन्द भएको पर्यटन व्यवसायी हिमबहादुर थापाले बताए ।

उनका अनुसार पाल्चाखोला नजिकको भिरमा पानी लागे पछि बटुवाहरूले माथि भीरबाट अलि पर झर्नुपर्ने भएको छ । घोडा खच्चरहरूलाई भीरबाट पनि आउन जान कठिनाइ भएकाले ठूलीभेरी नगरपालिकाको थाला हुँदै ठांगे लेक भएर काइके गाउँपालिकाको सहरतारा बगर झर्न बाध्य बनाएको छ । दुनैबाट रह हुँदै फोक्सुण्डो तालतर्फ जाने बाटो पनि फोक्सुण्डो खोलामा आएको बाढीले ठाउँठाउँमा भत्काउनुका साथै भीरसम्म पानी लागेकाले आवतजावतमा समस्या भएको गोविन्द आधारभूत विद्यालयका प्रधानाध्यापक गणेशमान पुनले बताए ।

भेरी नदीमा आएको बाढीले दुनैबाट त्रिपुराकोट–त्रिवेणी हुँदै जाजरकोट रुकुमतर्फ जाने मूलबाटोमा पर्ने खुइते गौरा, भित्ती, हरियापानी, भेरुझार लगायतका विभिन्न ठाउँमा कतै पानी लागेर, कतै बाटो भत्केर, कतै बाटो बगाएकाले आवतजावतमा निकै कठिनाइ बढेको जिल्ला प्रहरी कार्यालय डोल्पाले जनाएको छ ।

भेरी नदीमा आएको बाढीले डोल्पाको सदरमुकाम दुनै बजारको माथिल्ला कुना भेरी नदीको किनारमा बनेका हरिबहादुर रोकाया र कोइला बुढाका घर डुबानमा परेका छन् ।

प्रकाशित : श्रावण २४, २०७५ ०९:३४
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT