मृतकका परिवारलाई १ लाख

कर्णाली प्रदेश सरकारले प्रतिमृतक २५ हजारका दरले पीडित परिवारलाई राहत उपलब्ध गराएको छ
भीमबहादुर सिंह

जाजरकोट — पहिरोमा परी ज्यान गुमाएकाका पीडित परिवारलाई एक लाख रुपैयाँका दरले राहत सहयोग उपलब्ध गराइएको छ । प्रमुख जिल्ला अधिकारी ललितकुमार बस्नेतले पहिरोमा ज्यान गुमाएका ९ जनाको परिवारलाई राहत उपलब्ध गराएका हुन् ।

भेरी नगरपालिका–३, ठाटीबजार पहिरोमा दुई घर पुरिदा मृत्यु भएका ८ बालबालिकासहित ९ जनाका पीडित परिवारलाई राहत दिइएको हो । प्रजिअ बस्नेतले पीडितले आश्रय लिएर बसिरहेको वृद्धाश्रममै पुगेर एक/एक लाखको चेक हस्तान्तरण गरे ।


पहिरोले घर पुरेर विस्थापित भएका पत्रकार तीर्थ बोहरा र गोपाल सुनारलाई तत्काल व्यवस्थापनका लागि १०/१० हजार नगद समेत हस्तान्तरण गरेको बस्नेतले बताए ।

Yamaha


त्यस्तै, कर्णाली प्रदेश सरकारले प्रतिमृतक २५ हजारका दरले पीडित परिवारलाई राहत उपलब्ध गराएको छ । प्रदेश सरकारले दाल, चामल, नुन, तेल, चिउरा लगायतको झन्डै २० हजार बराबरका सामग्री पनि पीडित परिवारलाई वितरण गरिएको छ ।


भेरी नगर कार्यपालिकाले सबै मृतकका आफन्तलाई ३० हजार र कुशे गाउँपालिकाले पनि चार जना मृतकका आफन्तलाई प्रतिमृतक २५ हजारका दरले राहत उपलब्ध गराउने निर्णय गरेको छ । भेरीले घाइते लालबहादुर लुहारको उपचारका लागि २० हजार दिएको प्रमुख प्रशासकीय अधिकृत डिल्लीराज बेल्बासेले बताए । कुशेले पहिरो पीडित परिवारलाई तत्काल राहतका लागि भाँडाकुँडा, दाल, चामल, नुन, तेल, कम्मल लगायत सामग्री वितरण गरेको उपाध्यक्ष रामछाया शाहीले बताइन् ।


नेपाल निजामती कर्मचारी संगठनका जिल्ला अध्यक्ष डम्मर बिष्टले संगठनका तर्फबाट प्रति परिवार २५ किलो चामल, दुई किलो दाल, दुई किलो चिनी, दुई किलो चिउरा, एक लिटर तेल, एक केजी नुन र कम्बल उपलब्ध गराएको बताए । नेपाल रेडक्रस, उद्योग वाणिज्य संघ लगायत संघसंस्थाले पनि पीडित परिवार राहत सामग्री उपलब्ध गराएका छन् ।


पहिरो पीडित पत्रकार तीर्थराज बोहरालाई नेपाल पत्रकार महासंघ जाजरकोट शाखाले १० हजार, अर्थसरोकार अनलाइनले ५ हजार ५ सय ५५, मिरमिरे अनलाइनले ५ हजार १ सय र गर्जनपोस्ट साप्ताहिकले ५ हजार ५ सय सहयोग गरेका छन् । पहिरोमा परेका लालबहादुर लुहारको जीवित उद्धार गरिएको थियो । पहिरोले घर भत्किँदा पुरिएका १२ वर्षीय गोविन्द परियारको शव निकाल्न सकिएको छैन ।

प्रकाशित : श्रावण २५, २०७५ १०:४७
प्रतिक्रिया
पठाउनुहोस्
ADVERTISEMENT

बिरामीले विद्यालय बन्द

कान्तिपुर संवाददाता

रुकुम पश्चिम — जनकल्याण माध्यमिक विद्यालय बाँफिकोट गाउँपालिका–९, पुरानागाउँले कक्षा ७ र ८ को पठनपाठन केही समयका लागि बन्द गरेको छ । विभिन्न लक्षण देखिँदै विद्यार्थी बिरामी हुन थालेपछि तीन दिनका लागि बन्द गर्ने निर्णय गरिएको हो ।

कक्षा ७ र ८ का छात्राहरू एक्कासि रुने, कराउने, चिच्याउने र अचेत हुने क्रम नरोकिएपछि बाध्य भएर विद्यालय नै बन्द गर्नुपरेको शिक्षक बलबहादुर खत्रीले बताए । तीन महिनाअघि देखिएको समस्या समाधान हुनुको साटो अन्य छात्रामा पनि सरेपछि पठनपाठन नै बन्द गर्नुपर्ने अवस्था आएको शिक्षक खत्रीले बताए । गाउँपालिकासँगको सल्लाहमा ७ र ८ कक्षाको पठनपाठन बन्द गरिएको हो ।


विद्यालयमा यसअघि पनि नियमित हुन सकेको थिएन । कक्षा ७ र ८ मा अध्ययन गर्ने छात्रा बिरामी पर्ने भएपछि अरु कक्षाका विद्यार्थीहरू समेत त्रासमा पर्ने गरेका थिए । बिरामी विद्यार्थीको व्यवस्थापनमा सबै खटिनुपर्ने भएकाले अरू कक्षाको पठनपाठनमा असर पर्ने गरेको थियो । अन्य कक्षाको पठन पाठनमा असर नपरोस् भनेर २ वटा कक्षाको पठन पाठन बन्द गरिएको शिक्षक खत्रीले बताए । हरेक दिन १२ बजेदेखिपछि विद्यार्थीमा समस्या देखिने गरेको थियो । ७ र ८ कक्षाका १६ जना छात्राहरूमा उक्त समस्या दोहोरिएर देखिने गरेको छ ।


त्यस अघि पनि केही विद्यार्थीमा यस्तो लक्षण देखिए पनि श्रावण १४ गतेदेखि धेरै छात्रामा यस्तो समस्या सुरु भएको उनले बताए । यसअघि बिरामी भएकै छात्रामा समस्या दोहोरिरहन थालेपछि थप विद्यार्थीलाई उक्त समस्याबाट बचाउन कक्षाको पठनपाठन नै बन्द गरिएको हो । विद्यार्थीमा समस्या देखिएपछि विद्यालयमै आराम गराउने, हावाको व्यवस्था गरिदिनेबाहेक अरू उपचार हुन सकेको छैन । यस विषयमा जानकारी गराउँदा गाउँपालिका, शिक्षा समन्वय शाखा कसैले पनि वास्ता नगरेको गुनासो विद्यालयको छ । उक्त विद्यालय हाल विद्यालय व्यवस्थापन समिति विहीन छ । पुरानो समितिले राजीनामा दिएपछि नयाँ समिति गठन नै हुन सकेको छैन ।


यो सहित यस विद्यालयका विद्यार्थी तथा यो विद्यालयले यस्तो समस्या दुई पटक भोग्दै छ । यसअघि गत जेठ महिनाभर पनि केही छात्रामा यस्तो समस्या देखिएको थियो ।

प्रकाशित : श्रावण २५, २०७५ १०:४७
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT