बाढीपहिरोले सास्ती वल्लोपल्लो गाउँ सम्पर्कविच्छेद

कान्तिपुर संवाददाता

डोल्पा — अविरल वर्षाका कारण भेरी नदीमा आएको बाढीका कारण खुइतेगौंडा जाने मोटरबाटो बन्द भएको छ । सडकमै बाढी पसेपछि आउजाउ बन्द भएको हो । त्यस्तै पहिरोका कारण दुनै–जुफाल र जुफाल–सुंपानी सडक अवरुद्ध भएको छ ।

वर्षाका कारण भेरीमा पानीको बहाव बढेपछि सडक बुधबार बिहानबाट अवरुद्ध भएको व्यवसायी भरत खड्काले बताए । उनका अनुसार पानीको बहाव धेरै भएकाले दुनै–जुफाल, सुंपानी–जुफाल र सुंपानीदेखि दुनैसम्म सञ्चालन हुने जिप सेवा बन्द भयो ।

स्थानीयका अनुसार बाढी र पहिरोका कारण डाँगीबाडा, भित्ती, लामालोटेलगायत ठाउँमा गाडी जान सक्ने अवस्था छैन । लामालोटेको पहिरोमा ट्याक्टर फसेर आवतजावत बन्द भएकाले स्थानीयले जनाएका छन् । धुपीचौरबाट मोतीपुरसम्म मात्र जिप सेवा सञ्चालन भएको प्रहरीले जनाएको छ ।

Yamaha

त्यस्तै अविरल वर्षाका कारण पहिरोले त्रिपुरासुन्दरी नगरपालिका ३, जिउँमा हरिचन्द्र बोहराको घर भत्केको छ । स्थानीय कालीबहादुर केसी र बहादुर रोकायाको घर जोखिममा छन् ।

Esewa Pasal

प्रकाशित : भाद्र ७, २०७५ १०:५१
प्रतिक्रिया
पठाउनुहोस्
ADVERTISEMENT

जथाभावी सडक अतिक्रमण

सवारी आवागमनमा अवरोध
स्थानीय प्रशासनको अनुरोध स्थानीयले टेरेनन्
दुर्घटनाको जोखिम बढ्यो
विप्लव महर्जन

सल्यान — सल्लीबजारको मुख्य सडकमा सरकारले मापदण्ड २१ मिटरको तोके पनि स्थानीयले लामो समयदेखि अतिक्रमण गरिरहेका छन् ।

सल्यानको बन्गाड कुपिन्डे नगरपालिकाको बजार क्षेत्रमा सडक अतिक्रमण गरी राखिएका पसलका सामान र दाउरा । तस्बिर : विप्लव

सडक क्षेत्रमै अस्थायी संरचना निर्माण गरी व्यवसाय गर्नेको संख्या बढ्दै गएको छ । सडक क्षेत्रमा घुम्ती निर्माण गरी व्यवसाय गर्ने र निर्माण सामग्री अलपत्र छाड्ने गरिएकाले बजार कुरूप बन्दै गएको हो ।

बढ्दो अतिक्रमणका कारण सडक साँघुरो भएपछि गाडी आउजाउमा समस्या भएको छ । स्थानीयले लामो समयदेखि अतिक्रमण गरे पनि स्थानीय तहले ध्यान दिएको छैन । बजार आसपासमा सडकको ट्रयाक खोल्दा २१ मिटर कायम गरे पनि अधिकांश स्थानमा १५ मिटरमा सीमित रहेको स्थानीयको भनाइ छ । कतिपय स्थानमा सडक १० मिटरमा खुम्चिएको छ । स्थानीयका अनुसार दाउरा, निर्माण सामग्री, घुम्ती र सडक व्यापारका कारण समस्या भएको हो ।

स्थानीय गणेश बीसीले पटकपटक नगरपालिका र जनप्रतिनिधिलाई यसबारे भने पनि बेवास्ता भएको बताए । उनका अनुसार छाडा चौपायाले झनै समस्या बनाएको छ । व्यवसायका नाममा अतिक्रमण गर्नेले प्रहरी प्रशासनलाई समेत टेर्न छाडेको स्थानीयको भनाइ छ । प्रहरीका अनुसार अतिक्रमणका कारण दुर्घटना बढ्दै गएको छ ।

अहिले सडककै जग्गामा सरकारी निकायको मिलेमतोमा पक्की घर निर्माण हुन थालेको स्थानीय प्रेमबहादुर रानाले बताए । ‘पहिले ससाना टहरा थिए,’ उनले भने, ‘ती फालेर सडकका जग्गा च्याप्दै पक्की घर बनाउन थालिएको छ ।’ सडक आसपासमा जताततै दाउरा र पशुचौपाया देखिने गरेको उनको भनाइ छ ।

इलाका प्रहरी कार्यालय, सल्लीबजारका प्रहरी नायब निरीक्षक लालबहादुर बुढाले वर्षाको समयमा भेरीले बगाई ल्याएका काठहरू संकलन गरी स्थानीयले घर अघि राख्दा सवारीसाधन आउजाउमा समस्या भएको बताए । उनले आफूहरूले पटकपटक स्थानीयलाई आग्रह गर्दै आए पनि नटेरेको बताए । १/२ दिनभित्र नहटाए प्रहरीले अतिक्रमण गरिएका सामग्री हटाउने उनको भनाइ छ ।

बजार आसपासका सडक अतिक्रमण हटाउन स्थानीयलाई सूचना जारी गरेको नगरपालिकाले जनाएको छ । सामान हटाउन स्थानीयले अटेर गरेकाले बल प्रयोग गर्ने तयारी भइरहेको नगरप्रमुख गोविन्दकुमार पुनले बताए । ‘बजार व्यवस्थापन समितिसँग यसबारे छलफल भइरहेको छ,’ उनले भने, ‘अन्य सरोकारवालासँग छलफल गरी थप कारबाही अगाडि बढाइनेछ ।’

प्रकाशित : भाद्र ७, २०७५ १०:४९
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT