भवन निर्माण अलपत्र

दुई वर्ष मै निर्माण हुनुपर्ने भवन ४ वर्षमा पनि अधुरै
भीमबहादुर सिंह

जाजरकोट — खलंगास्थित भेरी ज्ञानोदय क्याम्पसको भवन निर्माण कार्य अलपत्र परेको छ । दुई वर्षमा निर्माण सम्पन्न भइसक्नुपर्ने भवन चार वर्ष बित्दा पनि सम्पन्न हुन सकेको छैन ।

जाजरकोट खलंगास्थित भेरी ज्ञानोदय क्याम्पसको निर्माणाधिन भवन । तस्बिर : भीमबहादुर

भारतीय राजदूतावासलगायत निकायको लापरबाहीले भवन निर्माण अलपत्र परेको हो । समयमा भवन नबन्दा क्याम्पसको पठनपाठन तथा प्रशासनिक कार्य सञ्चालनमा समस्या भएको छ । भारतीय राजदूतावासको पाँच करोड आर्थिक सहयोगमा भवनको निर्माण जिम्मा कार्य डाँफे कन्स्ट्रक्सन काठमाडौं र खड्का कृष्ण कन्स्ट्रक्सन जाजरकोटले लिएका छन् ।

निर्माण कम्पनीले भवन दुई वर्षभित्र कार्य सम्पन्न गर्ने गरी आर्थिक वर्ष २०७१/७२ मा ठेक्का सम्झौता गरेका थिए । सम्झौता अवधि सकिएकै दुई वर्ष बितिसक्दा पनि काम सम्पन्न हुन नसकेको क्याम्पस प्रमुख चन्द्रबहादुर बुढाले बताए । उनले भवनको भौतिक स्ट्रक्चर निर्माण भइसकेको र फिनिसिङको काम नहुँदा समस्या भएको बुढाको भनाइ छ ।

Yamaha

‘अन्य भवन नहुँदा फिनिसिङ नै नभएको भवनमा पठनपाठन र कार्यालय सञ्चालन गर्न बाध्य छौं,’ उनले भने, ‘सम्बन्धित निकायको ढिलासुस्तीले काम अघि बढ्न सकेको छैन ।

क्याम्पस प्रशासनले निर्माण कम्पनी, जिल्ला समन्वय समिति र दूतावासलाई कार्य सम्पन्न गर्नका लागि पटक पटक ताकेता गरे पनि सुनुवाइ भएन ।’ डाँफे कन्स्ट्रक्सनले तीन करोड १६ लाखमा एउटा भवन र खड्का कृष्ण कन्स्ट्रक्सनले एक करोड ४३ लाखमा अर्को भवन निर्माण ठेक्का लिएको थियो । भारतीय दूतावासबाट समयमा रकम निकासा नहुँदा निर्माण कार्यमा ढिलाइ भएको निर्माण कम्पनीका प्रतिनिधि तेजविक्रम शाहले बताए ।

अधिकांश काम सम्पन्न गरिसकेको र फिनिसिङको काम मात्र बाँकी रहेको शाहको भनाइ छ । उनका अनुसार दूतावासले दुई/दुई वर्षसम्म रकम नपठाउँदा निर्माणमा ढिला भएको हो ।

‘केही दिनअघि मात्र दूतावासले केही रकम निकासा पठाएकाले तत्काल काम सुरु गरिनेछ,’ शाहले भने ।

जिल्ला समन्वय समितिका समन्वय अधिकारी कमलराज भण्डारीका अनुसार दूतावासले जिससमार्फत रकम पठाउने गरेको छ । प्राविधिक जिम्मा जिल्ला प्राविधिक कार्यालयले लिएको छ । ‘दूतावासमा बारम्बार ताकेता गर्दा रकम निकासा भएको छ, तर निर्माणको जिम्मा लिएका व्यवसायीले रकम आइसकेपछि पनि फिनिसिङको काम सुरु गरेका छैनन्,’ उनले भने, ‘निर्माण कम्पनी र दूतावास दुवैको ढिलासुस्तीले काम अलपत्र परेको हो ।’ सुविधा सम्पन्न दुई ठूला भवन अलपत्र हुँदा क्याम्पसको शैक्षिक गतिविधि प्रभावित भएको छ । निर्माण कम्पनीले कुल रकमको ७० प्रतिशत भुक्तानी लिइसकेका छन् ।

त्रिभुवन विश्वविद्यालयबाट सम्बन्धन प्राप्त भेरी ज्ञानोदय २०४२ सालमा सामुदायिक क्याम्पसका रूपमा स्थापना भएको थियो ।

जिल्लाकै सबैभन्दा जेठो क्याम्पसमा स्नातक तहमा शिक्षा, मानविकी र व्यवस्थापनको पठनपाठन हुने गरेको छ ।

Esewa Pasal

प्रकाशित : भाद्र ९, २०७५ १०:२८
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

पूर्णिमा जात्रामा देउडाको रौनक

सदरमुकाममा जम्मा भएका स्थानीयल जोडी मिलाएर देउडा गीतमै सवालजवाफ गरिरहेछन
जयबहादुर रोकाया

हुम्ला — सदरमुकाम सिमकोटमा धामी नचाउँदै देउडा प्रदर्शन गरेर पूर्णिमा जात्रा सुरु भएको छ । जात्राका कारण सिमकोटमा चहलपहल बढेको छ ।

जात्राका लागि नयाँ कपडा र गहना खरिद गर्ने चलन छ । जात्राका लागि नयाँ कपडा र गहना खरिद गर्ने चलन छ ।

त्रयोदशीका दिनमा सुरु भएर पूर्णिमाको दिनसम्म मेला सञ्चालन हुनेछ । जात्राको अवसरमा देवताको मन्दिरमा धामी नाच हुने गरेको छ । तीन दिनसम्म देउडा नाचेर स्थानीयले रमाइलो गरेका छन् । एकादशीदेखि पूर्णिमासम्म धामी र पुजारीले व्रत बसेर सादा एक छाक खाने गरेका छन् ।

धामी नाचबाट सुरु हुने जात्राको पहिलो दिन त्रयोदशीमा स्याम्नेको मष्टोको माडु (मन्दिरमा) देवताको पूजा गरिन्छ ।

दोस्रो दिन चतुर्दशीमा कालासिल्तो र पूर्णिमाका दिन बाँडफालो देवताको मन्दिरमा पूजा गरी धामी नाच्ने प्रचलन छ । सबै देवताका आआफ्नै धामी र पुजारी हुन्छन् । दिनभरि मिष्ठान्न खाने र धामी नचाउने चलन रहेको अगुवाको भनाइ छ ।

देवताको पूजा पुजारीबाहेक अन्यले गर्न नमिल्ने परम्परा छ । देवताको मन्दिरलाई स्थानीय भाषमा माडु भनिन्छ । पूजाको दिन बिहान ब्राह्मणले माडुमा होम गरेपछि मात्रै पूजा सुरु हुन्छ । पूजा सकिएपछि दिउँसो धामी नाच्ने र नाचपछि मुख्य धामीले महत्त्वपूर्ण भविष्यवाणी गर्ने गरेका छन् । बेलुका युवायुवती देउडा नाचमा रमाउने गर्छन् ।

परेवाका दिनदेखि तीन दिनसम्म देउडा नाचमा रमाउँदै मनोरञ्जन लिने गरिएको छ । जात्रा हेर्न छिमेकी गाउँबाट सबै धर्म र जातजातिका युवायुवती, बालबालिका र वृद्ध आउने गरेका छन् । सदरमुकाममा जम्मा भएका स्थानीयलले आआफ्नो जोडी मिलाई सवालजवाफ गर्दै देउडामा दोहोरी गाउने गरेका छन् । हुम्लामा दसैंभन्दा धामीको नाचलाई महत्त्व दिने प्रचलन छ ।

दसैंमा नयाँ कपडा खरिद नगर्ने यहाँका बासिन्दालाई धामी नाचमा भने नयाँ कपडा लगाउने अनिवार्यजस्तै छ । जात्रामा नयाँ गहना बनाउने, खरिद गर्ने र मिष्ठान्न खाने प्रचलन कायमै छ । जात्राका लागि सुरक्षा व्यवस्था कडा बनाइएको स्थानीय प्रशासनले जनाएको छ ।

प्रकाशित : भाद्र ९, २०७५ १०:२७
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT
ADVERTISEMENT