असारे विकास रोक्न भदौमै काम

भदौमै योजना संचालनका लागि वडामार्फत उपभोक्ता समिति गठन गरी धमाधम काम भइरहेको छ
तुलाराम पाण्डे

कालिकोट — पलाता गाउँपालिकाले आर्थिक वर्षको अन्तिममा हुने असारे विकास रोक्न भदौ पहिलो सातादेखि नै काम सुरु गरेको छ ।

कालिकोटको पलाता–९ थिर्पुस्थित सरस्वती माविको छात्रामैत्री शौचालय निर्माणका लागि ढुंगा बोक्दै स्थानीय महिला । तस्बिर : तुलाराम

वैशाख जेठमा सझौता गर्ने र असारको झरीमा हतारमा काम गर्दा कामको गुणस्तर पनि नहुने र अनियमितताको सम्भावना हुने भएकाले आर्थिक वर्षको सुरुदेखि नै योजना सुरु गरिएको हो ।

पलाता कालिकोटको सबैभन्दा विकट र अभावग्रसत क्षेत्रका रूपमा चिनिन्छ । विगतमा असारे विकासले कामको गुणस्तर नभएको, बजेट मात्र सकिएको, काम गर्ने स्थानीयलाई पनि खेतीपातीको काम गर्ने बेला विकास निर्माणको काम गर्नुपर्दा समस्या हुने गरेको थियो ।

Yamaha

भदौ पहिलो सातादेखि योजनाको सम्झौता गरेर काम सुरु गरेको गाउँपालिकाका प्रमुख प्रशासकीय अधिकृत रामप्रसाद कुस्माले बताए । ‘वर्षको सुरुमै काम गरेपछि समयको पनि चाप हुँदैन,’ उनले भने, ‘उपभोक्तालाई जवाफदेही बनाउन पनि सहज हुन्छ ।’ उनका अनुसार अनुगमनका लागि पनि पर्याप्त समय हुने भएकाले कामको गुणस्तरमा कम्प्रमाइज गर्नुपर्ने अवस्था रहँदैन ।

गाउँपालिकाले वार्षिक कार्ययोजना बनाएर भदौमै योजना सञ्चालनका लागि वडामार्फत उपभोक्ता समिति गठन गरेर अधिकांश योजनाको सम्झौता भएको जनाएको छ ।

वडा तथा गाउँसभा हुँदै योजना तर्जुमा प्रक्रियाबाट छनोट भएका आयोजनाको इस्टिमेट गरेर काम थालिएको नायब सुब्बा राजबहादुर बमले बताए । ‘पहिले जिविस हुने बेला जहिले पनि जेठमा सम्झौता गरेर असारमा काम सक्नुपथ्र्यो,’ बमले भने ‘योजना झारा टार्ने खालका मात्र हुन्थे ।’

गाउँपालिकाले यस वर्षदेखि एक सय ५० जना युवाको सहभागितामा विकास निर्माण कार्यदल गठन गरेको छ । मासिक २४ हजार रकम तलब दिने गरी कार्यविधि पारित गरेर युवा परिचालन गरिएको जनप्रतिनिधिको भनाइ छ ।

युवालाई काम दिन पनि १२ महिना निर्माणको काम गरिने गाउँपालिका अध्यक्ष लक्ष्मणबहादुर बमले बताए । ‘हतार हतारमा काम गर्दा गतिलो हुँदैन,’ अध्यक्ष बमले भने ‘असारे विकासको बेतिथि रोक्न समयमै काम थालनी गरियो ।’ ६ महिनाभित्र काम सम्क्ने गरी उपभोक्ता समितिसँग सम्झौता गरिएको छ । सम्झौता नभएका योजनाका लागि पनि ९ वटै वडा कार्यालयलाई पहल गर्न गाउँपािलकाले पत्राचार गरेको छ । समयमै विकास निर्माणका प्रक्रिया अघि बढाउँदा काम नगरेर भनसुनमा योजना फरफारक गर्न दबाब दिनेको मनोबल घट्ने, गुणस्तरका संरचना बन्ने अध्यक्ष बमले जानकारी दिए ।

पलातामा चालु आर्थिक वर्षमा सञ्चालन हुने २० भन्दा बढी योजनाको सम्झौता भइसकेको छ । असोज मसान्तसम्म एक सय बढी योजनाको सझौता गरेर काम थालिनेछ । अहिले खानेपानी, साना सिँचाइ, विद्युत्, सडक, विद्यालय भवनलगायत पूर्वाधारको काम सुरु भएका छन् । पलातामा यस वर्ष ५० हजारदेखि दुई करोडसम्मका सय बढी योजना छन् ।

तीमध्ये सबैभन्दा बढी वन तथा खानेपानी निर्माण गर्ने टुक्रे योजना छन् । प्रदेश सरकारअन्तर्गतका कार्यक्रममा १३ योजनाका लागि १४ करोड रकम छ । प्रदेश र गाउँपालिका गरी ५ करोड बढी रकम सडक निर्माणमा खर्च गरिनेछ । पलाताले यस वर्ष ४१ करोड रुपैयाँ विनियोजन गरेको छ । गत वर्षको पलाता गाउँपालिकाले सबै क्षेत्रको कुल २३ करोड बजेट अनुमोदन गरेको थियो ।

Esewa Pasal

प्रकाशित : भाद्र ९, २०७५ १०:२९
ADVERTISEMENT
प्रतिक्रिया
पठाउनुहोस्
ADVERTISEMENT

भवन निर्माण अलपत्र

दुई वर्ष मै निर्माण हुनुपर्ने भवन ४ वर्षमा पनि अधुरै
भीमबहादुर सिंह

जाजरकोट — खलंगास्थित भेरी ज्ञानोदय क्याम्पसको भवन निर्माण कार्य अलपत्र परेको छ । दुई वर्षमा निर्माण सम्पन्न भइसक्नुपर्ने भवन चार वर्ष बित्दा पनि सम्पन्न हुन सकेको छैन ।

जाजरकोट खलंगास्थित भेरी ज्ञानोदय क्याम्पसको निर्माणाधिन भवन । तस्बिर : भीमबहादुर

भारतीय राजदूतावासलगायत निकायको लापरबाहीले भवन निर्माण अलपत्र परेको हो । समयमा भवन नबन्दा क्याम्पसको पठनपाठन तथा प्रशासनिक कार्य सञ्चालनमा समस्या भएको छ । भारतीय राजदूतावासको पाँच करोड आर्थिक सहयोगमा भवनको निर्माण जिम्मा कार्य डाँफे कन्स्ट्रक्सन काठमाडौं र खड्का कृष्ण कन्स्ट्रक्सन जाजरकोटले लिएका छन् ।

निर्माण कम्पनीले भवन दुई वर्षभित्र कार्य सम्पन्न गर्ने गरी आर्थिक वर्ष २०७१/७२ मा ठेक्का सम्झौता गरेका थिए । सम्झौता अवधि सकिएकै दुई वर्ष बितिसक्दा पनि काम सम्पन्न हुन नसकेको क्याम्पस प्रमुख चन्द्रबहादुर बुढाले बताए । उनले भवनको भौतिक स्ट्रक्चर निर्माण भइसकेको र फिनिसिङको काम नहुँदा समस्या भएको बुढाको भनाइ छ ।

‘अन्य भवन नहुँदा फिनिसिङ नै नभएको भवनमा पठनपाठन र कार्यालय सञ्चालन गर्न बाध्य छौं,’ उनले भने, ‘सम्बन्धित निकायको ढिलासुस्तीले काम अघि बढ्न सकेको छैन ।

क्याम्पस प्रशासनले निर्माण कम्पनी, जिल्ला समन्वय समिति र दूतावासलाई कार्य सम्पन्न गर्नका लागि पटक पटक ताकेता गरे पनि सुनुवाइ भएन ।’ डाँफे कन्स्ट्रक्सनले तीन करोड १६ लाखमा एउटा भवन र खड्का कृष्ण कन्स्ट्रक्सनले एक करोड ४३ लाखमा अर्को भवन निर्माण ठेक्का लिएको थियो । भारतीय दूतावासबाट समयमा रकम निकासा नहुँदा निर्माण कार्यमा ढिलाइ भएको निर्माण कम्पनीका प्रतिनिधि तेजविक्रम शाहले बताए ।

अधिकांश काम सम्पन्न गरिसकेको र फिनिसिङको काम मात्र बाँकी रहेको शाहको भनाइ छ । उनका अनुसार दूतावासले दुई/दुई वर्षसम्म रकम नपठाउँदा निर्माणमा ढिला भएको हो ।

‘केही दिनअघि मात्र दूतावासले केही रकम निकासा पठाएकाले तत्काल काम सुरु गरिनेछ,’ शाहले भने ।

जिल्ला समन्वय समितिका समन्वय अधिकारी कमलराज भण्डारीका अनुसार दूतावासले जिससमार्फत रकम पठाउने गरेको छ । प्राविधिक जिम्मा जिल्ला प्राविधिक कार्यालयले लिएको छ । ‘दूतावासमा बारम्बार ताकेता गर्दा रकम निकासा भएको छ, तर निर्माणको जिम्मा लिएका व्यवसायीले रकम आइसकेपछि पनि फिनिसिङको काम सुरु गरेका छैनन्,’ उनले भने, ‘निर्माण कम्पनी र दूतावास दुवैको ढिलासुस्तीले काम अलपत्र परेको हो ।’ सुविधा सम्पन्न दुई ठूला भवन अलपत्र हुँदा क्याम्पसको शैक्षिक गतिविधि प्रभावित भएको छ । निर्माण कम्पनीले कुल रकमको ७० प्रतिशत भुक्तानी लिइसकेका छन् ।

त्रिभुवन विश्वविद्यालयबाट सम्बन्धन प्राप्त भेरी ज्ञानोदय २०४२ सालमा सामुदायिक क्याम्पसका रूपमा स्थापना भएको थियो ।

जिल्लाकै सबैभन्दा जेठो क्याम्पसमा स्नातक तहमा शिक्षा, मानविकी र व्यवस्थापनको पठनपाठन हुने गरेको छ ।

प्रकाशित : भाद्र ९, २०७५ १०:२८
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT