ठूला योजना वर्षौंदेखि अलपत्र

राजबहादुर शाही

मुगु — जिल्लामा सञ्चालित ठूलो लगानीका दुई योजना अलपत्र परेका छन् । सरकारले पर्याप्त रकम नछुटयाउँदा रारा विमानस्थल र गमगढी–नाक्चेनाग्ला–तिब्बत जोड्ने सडकमा काम हुन नसकेको हो ।

मुगुको नाक्चेनाग्ला–तिब्बतखण्डको छाइल भीरमा सडक निर्माणमा जुटेको डोजर । तस्बिर : राजबहादुर

रारा विमानस्थलको काम सुरु भएको ३५ वर्ष पुगे पनि अझै पूरा हुन सकेको छैन । गमगढी–नाक्चेनाग्ला सडकको गति पनि सुस्त छ । यो सडकमा दशकअघिबाट काम सुरु भएको थियो । विमानस्थलको टर्मिनल टावर, यात्रु जाँच पोस्ट, घेरबार, सार्वजनिक शौचालय र सुरक्षाकर्मी बस्ने भवन अझै बन्न नसकेका हुन् ।

काठको टहरामा उपकरण राखेर जहाज अवतरण गर्ने गरिएको छ । काठकै टहरो बनाएर सुरक्षाकर्मीले यात्रु जाँच गर्छन् । वरिपरि गतिलो घेरबार नहुँदा कुकुर र चौपाया धपाउन सुरक्षाकर्मीलाई हैरानी हुने गरेको छ । छायाँनाथ–रारा नगरपालिका ४, का वडाध्यक्ष विष्णुकुमार भामले विमानस्थलको काम ‘कछुवा गति’ मा भइरहेको बताए ।

Yamaha

ढल निकास नहुँदा थप समस्या भएको विमानस्थलका कर्मचारी बताउँछन् । चालु आवमा टर्मिनल टावरलगायत अन्य भौतिक पूर्वाधारका संरचना निर्माण गर्न १५ करोड बजेट माग गरिएको थियो । तर, स्वीकृति भएर नआएको विमानस्थल सुधार आयोजना प्रमुख प्रकाश श्रेष्ठले बताए ।

उनका अनुसार विमानस्थल तलमाथि रिटेनिङ वाल लगाउने काम भइरहेको छ । ‘कहिले बजेट अभाव त कहिले समयमा काम नहुँदा समस्या भयो,’ उनले भने, ‘वर्षायाममा जहाज ग्राउन्ड गर्ने पार्किङमाथि र दक्षिण–पूर्वपट्टिको भागमा पहिरो जाँदा समस्या भएको छ ।’ निर्माण सुरु भएदेखि हालसम्म २७ करोड बढी खर्च भइसकेको आयोजनाले जनाएको छ ।

यस्तै मुगुलाई छिमेकी जिल्ला र तिब्बत जोड्न सुरु गरिएको गमगढी–नाक्चेनाग्ला सडक पनि अलपत्र छ । सडक डिभिजन कार्यालय प्रमुख माधव अधिकारीका अनुसार यस वर्ष सडकका लागि सरकारले एक रुपैयाँ पनि विनियोजन गरेको छैन ।

गमगढीदेखि छाइलसम्म ठेकेदारमार्फत डोजरले सडक निर्माण गरेको छ । ८५ किमि लम्बाइको यो सडकले गति नलिँदा सडक सुविधाबाट सर्वसाधारण वञ्चित छन् । करिब १७ किमि मात्र ट्रयाक ओपन गर्दा १० करोड बजेट खर्च सडक डिभिजनले जनाएको छ । जिल्लाका २ ठूला योजनाले गति नलिँदा स्थानीयले विकासको अनुभूति गर्न नपाएको जिल्ला समन्वय समिति प्रमुख पूर्णबहादुर रोकायाले बताए ।

दुवै योजनाको निर्माणलाई गति दिन सरकारले पहल गरिरहेको प्रतिनिधिसभा सदस्य गोपाल बमको भनाइ छ । उनले मन्त्रीले पनि सकारात्मक जवाफ दिएकाले दुवै योजनाले यसै वर्षबाट गति लिने जानकारी दिए ।

Esewa Pasal

प्रकाशित : भाद्र ११, २०७५ ०९:५८
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

रारामा महिनायता पर्यटक शून्य

राजबहादुर शाही

मुगु — रारामा अहिले पर्यटक संख्या शून्यमा झरेको छ । साउन पहिलो सातादेखि प्रतिकूल मौसमका कारण भरपर्दो हवाई र सडक यातायात नहुँदा पर्यटक संख्या शून्यमा झरेको हो । राराका होटलहरू अहिले खाली छन् ।

भारी वर्षाले गमगढी–नाग्मा सडक अवरुद्ध छ भने रारा विमानस्थलमा नियमित हवाई उडान हुन सकेको छैन । साउन पहिलो सातादेखि पर्यटक नआएको रारा राष्ट्रिय निकुञ्जले जनाएको छ । पर्यटक घुम्न नआउँदा रारा ताल वरपरका डाँफे गेस्टहाउस, भिलेज हेरिटेज रिसोर्ट, माझघट्ट होमस्टेलगायत ठूला र साना दुई दर्जन बढी होटल सुनसान छन् ।

आन्तरिक पर्यटकले प्राय: खाली नहुने डाँफे गेस्टहाउस र भिलेज हेरिटेज रिसोर्ट साउनदेखि खाली रहेको सञ्चालकको भनाइ छ । झरीका कारण रारामा आन्तरिक पर्यटक घटेको रिसोर्टका स्टेसन मेनेजर दीपक रावतले बताए । उनका अनुसार अरू समयमा दैनिकजसो ३० देखि ४० हजारसम्म आम्दानी हुने गथ्र्यो । अहिले होटलमा आम्दानी शून्य रहेको व्यवसायीहरूले बताएका छन् ।

मौसम सुधारिए आन्तरिक पर्यटकको आमगनमा वृद्धि हुने होटल सञ्चालकको भनाइ छ । सधैजसो आन्तरिक पर्यटकले चहलपहल हुने रारा सुनसान देखिएको स्थानीयले जनाएका छन् । खत्याड गाउँपालिका आवतजावत गर्ने बटुवाबाहेक पर्यटक देख्न मुस्किल भएको छ । पर्यटक शून्य भएपछि रारामा डुंगा चलाउनेदेखि घोडा व्यवसायीसमेत मारमा परेका छन् ।

दैनिक करिब ६० वटा घोडाले रारामा आन्तरिक पर्यटक बोक्ने गरेका छन् । आन्तरिक पर्यटक नआएपछि स्थानीय घोडा चराउन पाटनतिर लागेका छन् । ‘एक दिनमा घोडाबाट तीन/चार हजार कमाइ हुन्थ्यो,’ मुर्मा गाउँका गोर्ख रोकायाले भने, ‘हिजोआज एक रुपैयाँ कमाइ छैन ।’ रारामा सञ्चालन भएका तीनवटा रबरका डुंगा पनि एक महिनादेखि बन्द छन् । अहिले निकुञ्जका कर्मचारी र सेना मात्रै रारा क्षेत्रमा छन् ।

रारामा पर्यटक घटेपछि ताल्चा, रिगधारा, सल्लेरी र झयारी, जुम्ला घुच्चीडाबलगायत क्षेत्रमा सञ्चालित होटलको आम्दानी घटेको छ । रारा घुम्न पर्यटक नआएपछि स्थानीय उत्पादन दही, मही, घीउ, आलु, कुखुरा, तरकारीको बिक्री ठप्प भएको छ ।

रारा आउने सडक यातायात र हवाई सेवा भरपर्दो नहुँदा समस्या भएको पर्यटन व्यवसायी पदम न्यौपानेले बताए । उनका अनुसार यातायात भरपर्दो नहुँदा नै रारालाई बाह्रै महिनाको पर्यटकीय स्थल बनाउन सकिएको छैन ।

प्रकाशित : भाद्र ११, २०७५ ०८:२८
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT