सुविधाभन्दा सास्ती धेरै

यस्तै सुनौली, गैरीगाउँ, रामचाउना र ढोरपीपललगायत बस्तीका बासिन्दालाई पहिरोको सास्ती भएको छ । सबैको पहिलो माग सडक हुने तर कम खर्चमै जथाभावी डोजरमार्फत खनिने गरेकाले गाउँमा पहिरोको त्रास बढेको हो । बन्गाड कुपिण्डे नगरपालिकाका करिब पाँच सय परिवार पहिरोको जोखिममा छन् । प्राविधिक इस्टिमेट भन्दा पनि डोजर चालकले मनपरी तरिकाले सडक खन्दा गाउँ जोखिममा परेको स्थानीय देवबहादुर बाँठाले बताए ।

‘गाउँभन्दा तल र माथि दुवै स्थानमा पहिरो खसिरहेको छ,’ उनले भने, ‘गाउँलेहरू त्रासै त्रासमा रात बिताउन बाध्य छौं ।’ ठाउँठाउँमा गएको पहिरोका कारण गाउँ नै पुरिने खतरामा रहेको खहरेखोलाका चन्द्र दमाईले बताए । ‘बस्ती आसपासको ठाउँ भासिएको र चिरा परेको छ,’ उनले भने, ‘धेरै पानी परेको समयमा पहिरो आएर बस्ती नै बगाउँछ कि भन्ने चिन्ता छ ।’

जथाभावी सडक खनेकै कारण ब्युरेनीका २५ घर पहिरो प्रभावित भएको स्थानीय केशर रानाले बताए । ‘बस्तीको बीचबाट सडक खनेकाले पहिरो चारैतिरबाट खस्दै गएको छ,’ उनले भने, ‘लगातार एक/दुई दिन वर्षा थपिए बस्ती नै बगाउने खतरा छ ।’ उनका अनुसार भलाखर्क गैरागाउँका ११ परिवारसमेत पहिरोको जोखिममा छन् । प्राविधिक इस्टिमेटबिनै सडक खनिएकाले समस्या भएको छ ।